My Visitors If you cann't read arabic you can know how I think you can visit this link

August 07, 2007

مواقف سريعة




بصراحة يا جماعة انا كنت ناوي اعمل تاج لذيذ جدا و طالع بيتنا و انا في دماغي اكتب التاج دة


بس حصلي موقف خلاني لازم اناقش قضية مهمة جدا


-


-


-


-


-


-


-


الموقف الاول


مستعجل تعرف الموقف لية هتعرفه


الموضوع ان احد اصدقائي اتهمنى ان ثقافتي في اللغة الانجليزية تقريبا ضعيفة


و منطقيا مني اني اسئل عن السبب اللي خلاه يكون راية دة


و كان سببه اني لا انقح عباراتي ببعض الكلمات الانجليزية و ان تدخلت في احد الحوارات الثقافية احاول ترجمة اي كلمة انجليزية او التعبير عن اي كلمة انجليزية باخرى عربية


و منطقيا حاولت اعمل لنفسي كام اختبار انجليزي كدة كانوا عندي على الكمبيوتر و لقيت ان مستويا كويس


و قبل ما اتجاهل الموضوع قعدت افكر مع نفسي شوية و ارقب اللي بيحصل حوليه لقيت ان اغلب الناس حوليه لازم كل دقيقتين ثلاثة كدة تلاقي كلام انجليزي ترقع كدة في وشك


طب لية هو انت مش قادر تعبر عن اللي جواك بالعربي و لا اللغة العربية فقيرة لدرجة انها مش قادرة تقول اللي انت حاسس بيه


الموقف التاني


الغريبة بقى اني كنت هقفل البوست على كدة


لكن قبل ما اقفله لقيت واحد صديق بيكلمني على الياهو الغريبة اني لقيتوا كاتب بالطريقة المسماه


franco arabic


و الغريبة ان صديقي دة بالفعل ثقافته الانجليزية ضعيفة طب انجليزي لية للدرجة دي مش بنحب العربي


الموقف الثالث


و الاغرب من دة كله انك لو تابعت اي قناه من قنوات الدش في مسلسل او فيلم او حتى مذيعة قاعدة هتلاقيها تلات اربع كلامها بقى انجليزي


ما هو يا اما العربي مش مكفينا فنلغية و نستعين باي لغة تانية


يا اما في حاجة غلط في زمن بقى كله غلط

30 comments:

Anonymous said...

موضوع جميل ياعم شمس
انا على فكره كان نفسى اتكلم فيه من زمان
ده من ضمن الاحتلال الثقافى الاجنبى لينا
او لاننا ماقدرناش قيمة اللغه العربيه ومش بنفتخر بيها بالرغم من انها تمتلك الكثير مما يجعلنا نفتخر بها

ممكن ناخد قدوتنا فى ده الفرنسيين
الفرنسى ممكن يعرف اكتر من لغه ولكن مايحبش يتكلم غير بلغته عندهم اعتزاز بلغتهم رهيب واحنا مفتقدين ده للاسف
ومش مقياس انه انا لو قلت كلمتين انجليزى فى وسط كلامى تبقى ثقافتى الانجليزى عاليه ماهو ممكن يكون مايعرفش غير الكلمتين دول وغاوى فزلكه وللا حاجه

موضوع جميل جدا واشكرك انك اتكلمت فيه وسلام

هشام رمضان said...

انا و الحمد لله في مدرسة لغات و لا فخر

Anonymous said...

اخى الكريم

ما يحدث ناتج من اختلال الموازيين فى مصر......وده مش بعيد عن اختلال كل شيئ..
هو جزء من الغزة الفكرى الذى يحول كل المجتمع لقبول نمط الثقافة الغربية ولا يتوجس منها خفية
لان مشكلتنا فى مصر حاليا ضبابية الهوية....
اول شيئ التمسك باللغة التى هى جزء اصيل من الثقافة العربية

معظم العلوم اصلها كان بالعربى حتى لا يقول انسان ان التعليم بالانجليزى لانه لغة كل العلوم

الموضع طويل ويحتاج لدراسة خاصة اعدك بها عما قريب

محمد الوكيل said...

شكراً يا أخ شمس على البوست الجميل.زبصراحة فعلاً معاك حق..بحس زي ميكون الناس بيستعروا من لغة القرآن..لغة أهل الجنة..يمكن لأنهم شايفين إنها (بلدي) أو (موضة قديمة)..عموماً هم أحرار في رأيهم، بس فقط أرجومن الإخوة دول يفكروا كويس في كلامي ده..ساعتها بس هيعرفوا قيمة لغتهم بجد..
شكراً..
محمد المصري

Anonymous said...

مجرد فقر فكرى وضياع هوية ومنظرة فارغة...على شوية رغبة فى جذب الانتباه

بحكم طبيعة عملى
اكتشفت حاجة مهمة جداااا
الألمانى والفرنسى لو حاولت تتكلممع واحد منهم بالانجليزية
حيتجاهلك تماماااا ومش حيرد عليك
ولا كأنك أدامه

احتراما واعتزازا منه للغته الأم
وطالما اخترت انك تكلمنى يبقا لازم تكون بتحترم لغتى وتتقنها وتخاطبنى بها سواء ألمانية أو فرنسية

ودة بيمثل لى مشلكة فى الألمانى بما أن معلوماتى فى الألمانى بالضبطزى معلومات عن حياة جد الجدع اللى معدى جنبى فى الشارع

دة الفرق بينا وبينهم
اربتط التقدم او التحضر فى المفهوم العربى بعدة مظاهر سطحية سخيفة منها استخدام الانجليزية بلزوم ومن غير لزوم

mo'men mohamed said...

لا هو اللى فى حاجة غلط
اللغة العربية هى أكمل اللغات و يكفينا انها لغة القرآن و انما ما يحدث فهو نتيجة لأن الأجيال الجديدة فقدت الهوية العربية بل نقل تركتها وفضلت التوجه الى هويات أخرى
السلام عليكم

شــــمـس الديـن said...

موضوع مهم فعلا و رعميق اوي

انا علي فكرة خريجة مدارس اجنبي و كل دراستي في الكلية كانت بالعنجليزي كمان و لكن اعتبرها لغة دراسة فقط و لكن لغتي الحقيقية هي العربية و التي احب اناتكلم و اكتب بها كل شئ

عارف ليه يا شمس :) لانها ببساطة لغوا تدريس و حفظ كتاب الله كاملا لانه كان هو صمام الامان للغة و عندك مثل " ام كلثوم رغن انها اتجهت للغناء لكن كانت تتذوق العربي بشكل سليم و تستوعب القصائد و تتذوقها , لانه في بداية حياتها كانت تحفظة ...

سياسة تغريب و محو هوية نجحت الي حد كبير و بمشاركة حكومتنا ....
انا اسمع انه في في فرنسا قانون بيدي للاباء و الامهات كتيب فيه اسماء فرنسية مسموح للاباء انهم يسموا ابنهائهم من ضمنها فقط ...

لكن احنا حتي الخريطة تحولت الي مارينا و ماربيلا ... خلاص انسي العربي ... دا كمخطط اكبر مني و منك

تحياتي لهذا التدوينة العميقة والجميلة

Anonymous said...

والله عندك حق , مفيش حد بيتكلم إلا لو طلع وقال كلمتين انجيليزى , وتحس أنه اللى بيتكلم عربي يقولوا عليه انسان بيئه , والله اللغة العربية قربت تندثر والله أعلم , ولولا أنه ربنا هو اللي حافظها كان زمانها اندثرت من زمان...
ربنا يرجع للغتنا العربية اللى حالتها الاولى يارب
حمادة زيدان

جمعاوى said...

شمس الزناتى

تقريبا أول زيارة لمدونتك
و إن شاء الله مش الاخيرة


و متشكرين على قبول التاج

و طرح الموضوع الجامد ده

و القادم....أجمل said...

نعيب زماننا و العيب فينا
:)
------------
بتبأه ممكن منظرة
ال يعني روش و كده
ياما تعليمه باه
:D
--------------
بس صراحة صراحة
بالنسبة ليا عشان دراستي في طب
بعض الامراض و المصطلحات مش بعرف اجيبها عربي
بس بحاول علي اد مقدر اننا لو اتكلمت
في مجموعه ناس مش أطباء يعني
اترجم للعربي
عشان ميضايقوش
------------------
تحياتي و تقديري لحضرتك
:)))))))))

يا مراكبي said...

هأجاوب على سؤالك: طبعا فيه حاجة غلط في زمن بقى كله غلط

ابن رشد said...

محمد جادو
متشكر جدا على المجاملة الرقيقة دي
و على العموم يا انا كدة سبقتك
و مشكلتنا الحقيقية في اللي غاوي فزلكة دة

ابن رشد said...

هشام رمضان
هو فعلا بلا فخر
و مرسي على الزيارة

ابن رشد said...

ايمن مصطفى
انا اولا متشكر جدا لزيارتك اللي شرفتني
و رايك صحيح تماما
و انا مستني الدراسة و التواصل كمان

ابن رشد said...

محمد المصري
و الله العظيم كلامك عسل و في روح الشباب المؤمن
الشباب اللي هيغير الوحش لحلو و لا تتغير مبادئة
شرفتني بزيارتك

ابن رشد said...

شهروزة
انتي اثرتي موضوع مهم جدا
اشمعنا هم بيعيروا على لغتهم و احنا لا
لا هم احسن مننا و لا لغتهم احسن من لغتنا
شهروزة عايزين الزيارة تكرر

ابن رشد said...

مؤمن محمد
تفتكر اللي عايزين يغيروا هويتهم دول احنا هنوافقهم على كدة

ابن رشد said...

شمس الدين
طبعا بعد غياب رجعتي تنوري المدونات تاني و شرف لية زيارتك
بس نفس السؤال اللي محيرني هل الشرفاء يقدروا يغيروا و يرجعولنا الهوية دي تاني

ابن رشد said...

حمادة زيدان
انت شايف ان الدعاء كفاية لازم يكون فيه تحرك
و لا انت شايف اية
انا شايف ان دي زيارة اولي و لازم فية تاني

ابن رشد said...

جمعاوي روش طحن
هستني رايك في الموضوع
و قريب هعمل التاج بتاعك

ابن رشد said...

و القادم اجمل

دة شعور جميل منك للحواليك ياريت كلنا نكون كدة

ابن رشد said...

يا مراكبي
و الله نورتني يا بشمهندس
بس تعرف لسة فية حاجة واحدة و لو وحدة صح في زمن كله غلط
تعرف هي اية ؟

خالد منصور said...

بص يا شمس واضح ان الناس اتسطلت فنسيت ان اللغة العربية لغة القران

ابن رشد said...

خالد منصور
و الله يا استاذنا انا مش عارف اية اللي بيحصل بس فية حاجة غلط
طب الناس هتفوق امتى

ابن رشد said...

الاستاذ اللي كاتب فرنساوي
انا دريتي بالفرنساوي زي ثقافتي عن المجوس بالظبط

nosha said...

حبيب قلبي شمس دخلت على مواضيعك وأديني بعلق عليها علشان متزعلش
الموضوع ده لذيذ أوي في فكرته بس بقى للأسف لما تيجي تبص هتلاقي أن البلد كلها المتعلم والجاهل والمثقف ودكتور الجامعة والعالم كمان
هتلاقي الدنيا دي كلها كده لأننا عمرنا ما تكلمنا عربي من أساسه
لأن اللي بنتكلمه ده مش لغة عربية ولا أي حاجة ده مجرد بطيخ
يبقى هتيجي على الإنجليزي بقى عديها يا شمس
تحياتي ليك يا صاحبي

ابن رشد said...

و الله با نوشة
تعليقاتك رائعة بحس انك بتضرب المشرط في قلب الجرح

Anonymous said...

شمس
بوست جميل
و للأسف أنا من ضمن الشريحة دي
يمكن عشان أنا دراستي انجليزي
فبستسهل أتكلم انجليزي
ساعات فعلا مش بعرف أعبر بالعربي
مع إني الحمدلله متأسسة كويس جدا في العربي
و بكتب خواطر عربي مش بطالة
بس فعلا بستسهل
كمان على الماسنجر
أنا بكتب
فرانكو
و بكتب بالعافية عربي
ببطء شديد
مش عارفة ليه
بس كفاية كده
منى

ابن رشد said...

مرسي جدا يا منى على تعليقك الجميل
وحمد الله على السلامة
و نتمنى ترجعى للغة العربية تاني

حسن مدني said...

كلام جميل جدا يا صاحبي
المشكلة من أكثر من ناحية، أولا احنا لا نتعلم العلربية بشكل جيد يجعلنا نشعر بها بدرجة كافية
ثانيا نتعلمها كما لو كانت لغة أجنبية ليست للاستخدام في شؤون الدنيا
ثالثا هناك احساس داخلي يتم زرعة فينا يجعلنا نشعر بأننا أدنى من الأمم الأخرى، وأن لغتنا أقل شأنا وأضعف قدرة على التعبير
وهذه مصائب ثلاث علينا أن نحاول تداركها بكل الصور، في أنفسنا وفي من حولنا وفي أبنائنا وهو الأهم
تحياتي