My Visitors If you cann't read arabic you can know how I think you can visit this link

October 05, 2008

السلام عليكم

بقالي كتير اوي مكتبتش على المدونة
و بقالي كتير اوي سايب مصي للنهاية
يمكن و لاني بعد طول تفكير قررت اني احاول ابعد عن البوستات السياسية مهما كان
و عن احوال البلد
و عن حتى الشعر الوطني
مش عايز اكلم في حاجة تخص السياسة دلوقتي و لا الفترة الجاية
لية و عشان اية لازم هقول في يوم من الايام
لكن برضة مش هبطل كتابة اوي هتلقوني بكتب على مدونة اتعلم اتنور
عشان نكمل مشوار بداناه سوا
و هسيب كمان الاغنية على خلفية المدونة تعبر عن كل لحظة كنت عايز اتكلم فيها و مش عايز
و نتابع مع بعض لى اتعلم اتنور


------------------------
مع تحياتي
شمس الزناتي

August 20, 2008

البداية

شمس الزناتي : انا هروح بقى يا مدير
المدير : بدري كدة يا شمس
شمس الزناتي : مجلس الشورى بيولع هروح اصلي و ادعي على الشعب ، عادي بقى يا ريس افرجها
المدير : بكرة تعوض الشغل دة
شمس الزناتي : ماشي الكلام
المدير : سايب شغل من النهاردة
شمس الزناتي : اه
المدير : امشي يا شمس بسرعة عشان لو وقفت تاني هقلك اقعد ما تمشيش

------------------

و على القهوة

----------------


شمس الزناتي : اه يا شلة فقر اغيب اغيب و ارجع الاقي نفس المنظر الشاي و الشيشة

الاصحاب : شمس الزناتي اية الغيبة دي كلها

شمس : وحشتوني

صديق شمس : سمعت عن حريقة مجلس الشوري

شمس : سمعت

الصديق : بيقولوا وصلت لوزارة الصحة

شمس : و وصلت مبنى الضرايب العقارية كمان يا مسهل عقبال كل الوزرات اللي في بالي على العموم في وزارة في لاظوغلي قريبة يعني و الله نفسي ربنا يستجيب و يكرمها

الصديق : نفسك ترجع تكلم في السياسة

شمس : ما قلنا بطلناها ، انا خلاص من البيت للشغل و من الشغل للبيت


الصديق :تفتكر فعلا ماس كهربي


شمس : الراجل الكبير فاضي قال عود كبريت و يولع في البلد عملها قبله الملك فاروق


الصديق : بتكلم في السياسة تاني


شمس : من بكرة الناس كلها هتكلم


الصديق : هتكتب ؟؟؟؟؟


شمس : هههههههههههههههههههههههه


الصديق : ههههههههههههههههههه


شمس : ارحم شجاعتي اللي عمال تتهمها بالانهيار


الصديق : هتكتب ؟؟؟؟


شمس : انا هقوم امشي


الصديق : طب هات حساب الشاي


شمس : حاسب انت


الصديق : يبقى هترجع تكتب


شمس : لسة البلاد دي بلادي و الحريق كان البداية


الصديق : ابقى اكتب اللي قلتها دي عشان تتحبس


شمس : مش قلتلك اروح احسن


الصديق : انت عندك حق الحريق اللي في صدورنا اكبر


شمس : يبقى هكتب


----------------------------


اللي عايز اكتبه كلمتين الاولى مش عايز حد يزعل اني مش برد على التعليقات عشان كل بوست بيكون رد على تعليقات البوست اللي قبله


و التانية اني مع طلعت السادات و بأيده في انتخابات نقابة المحامين


و هعلق صوته من دلوقتي


و السلام ختام




عـــــــــــــــــــــــــاشت مصر

August 07, 2008

رباعيات الزناتي البداية


مرفوع مؤقتا من الخدمة

ساكت مؤقتا

فاسد مؤقتا

لا عيب فيه غير انه

مغلوب على امره مؤقتا



امضاء

شمس الزناتي

---------------------------------

ملحوظة الكلام اللي تحت الصورة دلالة على التليفون

احسن حد يفكر الكلام دة على شمس الزناتي

July 26, 2008

بين الظالم و المظلوم ؟؟؟


عندما سألني صديقي الغالي محمد ابو جولدا

هو احنا الشباب مظلومين لكوننا شباب؟

بمعني ان اباك في بعض الاوقات يقسو عليك بمنطق ان راية صواب

او ان مديرك في عملك يظلمك بدعوا انه الاكبر دائما و راية الصواب

او ان دكتوره الجامعة يظلمك بدعوى انه المتحكم و انه الصواب

و امثال هذه من تحكم كبار السن في صغاره

و رددت بكل سرعة بل ان شباب هذه الايام لظالمين جاحدين

و لكني عندما اجبت بهذا كنت اقصد فئة معينه من الشباب

فئة ارادت ان تضل طريقها سواء بأن يرموا بأنفسهم في طريق الضياع ( من المخدرات و خلافه ) نعم هذا الشاب ظالم

ظالماً لاسرته او لوطنه او لدينه

او شباب اخرى رمت بأنفسها في السجون بدعوى حب الوطن

نعم تصورت شاب سهر والده ليعلمه و سهرت امه لتربيه ليكبر و يرمي بنفسه في غيابات عالم لا يعرف له نهاية عالم امتلأ بكلمه لا امتلئ بالمظاهرات و الاعتراضات حتى ينتهي به هذا العالم الي السجن لايام او لشهور او لسنوات

و لا يهمني الان اذا كان السجن ظلماً او عدلاً

و لكن اقصد في نهاية الامر ان منطق هذا الشاب يجعله ظالم ان لم يكن ظالماً لنفسه فهو ظالم لإبية و امه و اخوته و محبوبته

اما عن شاب مبدع يتمنى النجاح في عمله فيظلمه كبرياء مديره او فساد مديرة فهو مظلوم

شاب ذاكر و سهر الليالي و يرسب في مادة لمجرد ان الدكتور اقسم بأن لا ينجح احد فهو مظلوم

شاب يطيع الله و رسوله و يطالبه ابواه بفعل ما يغضب الله فيصبر عليهما فهو مظلوم

اردت قول هذا و لكنى ما قلته كم تمنيت لو كنت صحت به لصديقي ابو جولد و تمنيت اكثر لو بلغ صياحي بالاجابة الي اسماع مصر كلها

-

-

عاشت مصر

--------------------------------------

بالنسبة لكل اللي ردوا على البوست اللي فات يا ترى اية اخبار الفارس

تم التأكد من الخبر و الفارس لم يمت و لكنه في حالة مزرية من الاعياء و التعبلا ينقذه منها غير رحمه ربه

انتهي الخبر

--------------------------------

تحديث

توفي الي رحمه الله الرائع دائما و ابدا

اخر المبدعين

المبدع / يوسف شاهين


وداعاً يا استااااااااااااااااذ

June 15, 2008

مات الفارس

مات الفارس


هل حق الخبر ام هاجس
تعالي الصوت اليائس
يسئل في حال هامس
هل حقا مات الفارس ؟

ما بال الصمت يخيم
و سماء الامل تظلم
و بصيرة المظلوم تعتم
من يأكد الخبر و يقسم

فلتطفئ كل الانوار
و لتبكي حتى الاحجار
و تفيض عيون الانهار
مات الفارس منهار

سأجمع كل الغلمان
و اصيح في الناس نيام
فلتسمع كل الاذان
انقرض زمن الفرسان

May 24, 2008

كيف ينساكي القلب

كيف ينساكي القلب

كم يتعبني هذا المساء
و القلب يصرخ في عناء
متي يا حبيبتي اللقاء
متى احطم جسور الجفاء

حبيبتي لقد تمنيت النسيان
و سجنت قلبي خلف الجدران
و تمنع كبريائي عن الاحزان
فما وجدت من قلبي غير العصيان

و كيف ينساكي و انتي الحياة
انتي الوجود الي منتهاه
و انتي القمر في ضياه
انتي البسمة على الشفاه

و الان يعصرني الندم
و استغيث من هم السقم
و احاول الا ارتطم
بسيوف و رماح الالم

April 28, 2008

كلمتين للاحباب

كلمتين لكل الأحباب

كم اشتقت إلي الكتابة على صفحات مدونتي الغالية و التي و كما قلت قبل ذلك اعشق الكتابة عليها و لكني عدت اليوم لأسباب كثيرة أولها أني رغبت في أن ابعث برسالة قصيرة من كلمتين إلي كل من أحببتهم رسالة لا تتعدى الكلمتين
أين انتم ؟
و دعوني اشرح لكم و لعلي لا أطيل ما معنى هذه الرسالة لقد تركت التدوين لفترة و أنا ابحث عن نفسي أين ذهبت و هل تجربتي على صفحات هذه المدونة مفيدة
هل استطعت أن اكسب ما يفيدني من هذه التجربة أم أن التدوين هو من ربح مني ؟
و لكني فوجئت بعد دراسة موسعة أن التدوين سرقني من حياتي و سرق مدونين كثيرين و صرفهم عن اهتمامات أخرى فعدت و نظرت إلي العالم الخارجي فوجدت من يستخدم الانترنت في تعلم البرمجة أو الجرافيك أو في أبحاثة العلمية و تساءلت أين نحن الآن ؟ أين الشباب المصري من رحله يخوضها شباب العالم كله في سباق مع الزمن ، أين من جعلوا الثقافة شعارهم هل أبدعوا لنا شيئا جديدا ؟
هل وقفت حدود التعلم و الثقافة عند تعلم معاني الليبرالية و اليسارية و الشيوعية و الناصرية و مبادئ الإخوان و لوائح السلف و قراءات القرائنين و ثقافة أهل السنة أين هم الشباب المصري أصحاب الأقلام الرائعة من الطب و الهندسة و العلوم و الاتصالات و الجولوجيا و الفيزياء ؟
توقفت جميع صفحات المدونات فقط عند فساد مبارك أو صلاحه بل و توقفت العقول عند تأييد النظام أو معارضته ، فتح معبر رفح للفلسطنين أو إغلاقه ، تفسير ما إذا كانت العلمانية ضد الإسلام أو المسيحية أم معهم ، توقفنا و نحن لا ندري في غيابات حرب التنصير و التبشير و التهجير و الدعوة إلي الإسلام و تناسينا أن هناك ما يمكننا فعله غير ذلك .
و قد حاولت أن اخرج من جدران هذا السجن الفكري و أنشأت مدونة أتعلم أتنور و تصورت للحظات أني سأجد أعداد جمة من المتسائلين و ذلك لعلمي أن فئة كبيرة تستعمل المدونات بمشقة عالية و حلمت أن يصل نقائنا على مدونة أتعلم أتنور إلي حد أن نتحدث عن البرمجة و لغات البرمجة و يصعد من بيننا شباب نفخر بهم ، إلا أنها كانت أضغاص وأحلام فائرة استيقظت منها على مأساة أننا في زنزانة للأفكار شيدناها بأنفسنا و أغلقنا أبوابها و أطلقنا عليها اسم التدوين
أثق في أن من بيننا من هو طبيب و لم يكتب كلمة واحدة عن الطب ليفيد الجميع و نستفيد منه و من بيننا من هو إداري و لم يقترح أو يحلم معنا بنظام إداري سليم في بلدنا الحبيب مصر و ألوم نفسي و أنا اعلم أن بينا المهندس الذي لم يعطنا من علمه شيء
شباب مصر الأحباب إخواني و أخواتي أصدقائي و صديقاتي آبائي و أمهاتي يجب أن تكون لنا وقفة مع أنفسنا أين نحن و إلي أين نسير ؟
هل يعلم أحدكم أن الزنزانة الاحتياطية ( facebook ) التي شاركنا في ازدهارها هي من أفكار شاب في الرابعة عشر من عمرة فأين نحن ؟
لن أطيل عليكم أو أقف على منبر مدعيا الكمال و لكني سأشارككم فرحي و عملي لقد عدت من جديد إلي عالم البرمجة و الجرافيك الذي تركته طويلا و بذلك أكون قد بدأت بنفسي و دعونا نضيق المسافات بيننا ( نقرب من بعض ) و نجتمع على مائدة واحدة من الآن لنضع لأنفسنا الطريق الصحيح
و سوف يأتي يوم نجلس فيه لا لكي نتباهى و نتفاخر بما صنعناه بل لنعلم أبنائنا و أحفادنا كيف استطعنا أن نكتب على صفحات التغيير أن هذا الجيل كان جيل التغيير و الازدهار كيف كان هذا الجيل هو من رسم لنفسه الطريق الصحيح و سار به ليرسم لمصر كلها حلم يضئ أراضيها من مشرقها إلي مغربها و لن أنسى أن أشارككم احتفالي الصغير هذا اليوم بعودتي إلي التدوين
و انتظروا البوست القادم على مدونة انا مش معاهم

و لكم مني اعز القبلات القلبية
عاشت مصر

February 12, 2008

اجازة ......اجازة

بسم الله الرحمن الرحيم

اخواني و احبائي قراء المدونة الاعزاء لطالما كنت فرحا دائما و ان اكتب اليكم كل كلمة على صفحات هذه المدونة و طالما كنت سعيدا و انا داخل هذا العالم التدويني الرائع الذي تميز بحرية الراي و التعبير و الكلمة الحرة

و لن اثقل عليكم كثيرا خاصة و اني بعد فترة طويلة اعود للكتابة باللغة العربية الفصى

و لكني و بعد هذه الفترة الدوينية الرائعة اطلب الاستئذان من قراء المدونة في طلب اجازة من التدوين و لا اعلم مدتها ربما طالت ربما قصرت و لكني لن اهجر هذا العالم الذي طالما اثر في و ملك على كياني

ربما اني و الي هذه السطور لم اعد بالعودة الي التدوين و لكني لن استطيع ان اقطع هذا الوعد لاني ما عدت اثق في ان استطيع تنفيذه او لا

و لكني اعدكم و اقر و الزم نفسي بأني ما اخذت و لن اّخذ اجازة من حب هذا البلد الغالي و لا اكذب ان قلت اني وهبتها ما فات من عمري و اهبها عمري المقبل ايضا

اتمنى ان يسعني ربي بالمقدرة على العودة الي عالم التدوين متمنيا من الله ان اجد هذا العالم قد ملئة السلام و اصبح عنوانه الامل و صفحاته انشودة التفائل
و لا اخفي عليكم اني لا استطيع ان اتنفس بانفاس الافتقاد لكل من حببتهم و قرأت لهم و امنت بهم
قد اكون قد اختلفت مع البعض في طريقة حبنا لهذا البلد الا اننا في النهاية عشقناها معا و سنظل نعشقها
و الي لقاء اتمنى من الله ان يكون قريب

و اترككم مع اخر ايامي التدوينية في مدونات كثيرين ممن احببتهم و عشقت لقاءهم

http://alsha3r.blogspot.com/2008/02/blog-post.html

http://ahmedelsabbagh.blogspot.com/2007/02/blog-post_11.html

http://iloveyouegypt.blogspot.com/2008/02/blog-post_3001.html

اخوكم دائما و ابداً
شمس الزناتي

February 07, 2008

هفضل فداكي و احبك يا مصر

هفضل فداكي و احبك يا مصر

انضرب برماح تملى الضلوع
و انجرح و اتعذب و اعطش و اجوع
و ابكي و خدودي تملاها الدموع
و افضل فداكي و احبك يا مصر

و اسيبك و اهجر و اسافر بعيد
و اقسم و احلف دة هجرك اكيد
و اشوفك في مأزق و جرحك شديد
ارجع و اقلك فداكي يا مصر

و اشوف السوس في عظمك بينخر
و ينهى فيكي الفاسد و يأمر
و يملى ارضك كل سيئ منكر
و اشوفك و احزن لحالك يا مصر

و اصمم اجاهد و اقاتل عشانك
لا هبعد و لا اهرب و هطلب وصالك
و احارب الخاين الفاسد قصادك
و اموت شهيد في حبك يا مصر

--------------------

طبعا زوار المدونة اللي متعودين انهم قاعدين هنا شاي و قهوة الصبح و بالليل هيستعجبوا من الشكل الجديد للمدونة بس دة على فكرة مش تصميمي ، دة اهداء من

Coca

هي بصراحة صاحبة الفضل في الجمال اللي هب على المدونة كدة و من مقعدي و مكاني هذا باتقدم لها باعز

كلمات الشكر و العرفان

February 05, 2008

هييييييييييه .........اتعلمت اللغة

"اتعلم اللغة "
الكلمة دي اتقالت في فيلم " الكيف " مرتين مرة من بوسي و هي عايزة تعلم ابنها الصغير اللغة الانجليزية و مرة من محمود عبد العزيز و هو عايز يعلم اخوة لغة تجار المخدرات
و السؤال هنا احنا عندنا هنا في مصر بلدنا الحبيبة كام لغة
واحد ذكي اوي و نبيه يرد و يقول ----->اللغة العربية
اقله انت فالح اجابتك غلط و اخرج من المسابقة لان احنا عندنا اكتر من لغة
مبدئيا اللغة العربية اللي قال عنها الخالق عز و جل
إنا أنزلناه قرآناً عربياً
و اللغات الاخرى بقى خد عندك مبدئيا اللغة المنطوقة فيما بيننا اللي اختلفت و اقتحمتها اللغات الانجليزية و الفرنسية
و تيجي تكلم واحد يرد عليك بكل شياكة
merci
خلاص الفرنساوي واخد حقه قوى من الثقافة يعني لو كان رد و قال "شكرا " كان هيدفع دمغة مثلا
و يا سلام لو بتكلم واحد و بتسأله عن حاجة و بيجاوبك بالنفي
never never
خلاص اصل الاخ مثقف اوي و حتى لو لاحظنا نفسنا و احنا بنتكلم هنلاقي نفسنا بننطق بكلمات انجليزية كتير جدا مش عارف لية
و خد عندك بقى اخر اللغات اللي لسة نازلة مصر جديد
لغة حقيقي انا مش عارف اسمها لكن ممكن اقلكوا على بعض مفرادتها و انتوا هتعرفوها
نفض - كبر - احلق - ظبط - امرز - عيش - زنجف - هشك - بشك -فلسع - مانتم
و طبعا الكلمات دي حروفها عربية بس اتحداك لو جبت قاموس في العالم كلة يترجمها و عشان تترجمها يتوجب عليك في هذه الحالة ان تسئل ناطقها عن معناها و بعد ما تعرف معناها يتوجب عليك استخدامها و إلا فلن تصبح من هذا الجيل المتحضر
طبعا دة كان عرض سريع للغات اللي احنا بنحاول ننطقها
و هنا يأتي السؤال
هل نخجل من التحدث باللغة العربية ؟
هل اللغة العربية تورثت الينا ناقصة بعض الكلمات فاضطررنا للتعويض بلغات اخرى ؟
الاسئلة دي انتوا اللي هتجاوبوا عليها مش انا
نيجي بقى و نتكلم عن اللغة المكتوبة و دي موالها موال ، انا عايز حد و نفسي و منا عيني الاقي حد يديني تفسير اية سر الفرانكوا عرب المنتشر على الماسنجرات و رسايل المحمول دة
قال يعني خلاص الواد يا عيني ايدة مش بتعرف تروح الا على الحروف الانجليزي و بس
انا مش هحاول اطول في موضوع الفرانكوا عرب دة عشان اتكلمنا عنه قبل كدة في بوست سابق
طبعا انا ممكن الاقي حد ساب الموضوع كله و علق على الموضوع
طب ما انت يا شمس كاتب البوست اهو باللغة العامية
مش هقدر ارد غير اني بحاول اوصل لعقول و قلوب قرائنا بسرعة و ان كان هذا خطأ ممكن من الان فصاعدا اكتب باللغة العربية و لكن هل دة راي قراء مدونة مصري للنهاية ؟؟؟؟ دة كمان سؤال اخر كدة بقوا ثلاث اسئلة ناخد بالنا
------------
طب و الحل اية هل انا كاتب البوست دة عشان اقول المشكلة و امشي
لا طبعا و اطلاقا
بس قبل ما نقول الحل لازم نعرف حاجة مهمة جدا
ان الالماني او الفرنسي لو قابلته و حاولت تتكلم معاه بلغة غير لغته عن قصد ممكن يتجاهلك
لازم نعرف ان من اهم سمات الشعب الفرنسي الحفاظ على لغته
لازم نعرف ان لو فضلنا كدة بعد سنين مش قصيرة طبعا و ممكن تكون عقود هنلاقي المصريين كلهم لا يتحدثوا بالعربية و ساعتها يبقى لغة القران اندثرت في مصر
لازم نعرف ان اللي بيتكلم عربي فقط دة مش فلاح و لا بيئة ( و طبعا انا مش ضد تعلم اللغات الاخرى لزيادة ثقافتنا ) لكن انا ضد عدم الانتماء الي اللغة الام
طبعا انتوا بعد قصيدة لازم نعرف اللي عدت دي مستنين الحل
الحل بسيط مبدئيا نشعر بجمال اللغة العربية
ثانيا راجع سطور لازم نعرف اللي لسة كاتبها دي
و ابقى اشوف حد تاني بيكتبلي فرانكوا عرب عشان الموضوع دة بينرفزني جدا
و قبل ما اقول النهاية كنت عايز اخلي قرائنا كلهم يتفرجوا على المقطع دة لمصطفى محمود
و اخص بالشكر ربة السيف و القلم على ارسالها هذا المقطع لمدونة مصري للنهاية
و الي اللقاء في الحلقة القادمة
كان معكم
شمس الزناتي
من امام شاشة الكمبيوتر

February 01, 2008

عرفت الخبر و شفت اللي حصل

عرفت الخبر شفت اللي حصل ..........لا و النبي انت معرفتش طب اقلك بقى
سعاد اتخانقت مع سها
و محمد ادخل بينهم و محسن اتخانق معاه
و سعيد قال كلام وحش على سيد
و مصطفى عمل مقلب في عبده
و اكرم بقى هزق فاطمة و نجلاء
و لا ما شفتش انت بقى زينب شكلها بترسم على بهاء


طبعا يا جماعة الاسماء اللي فوق دي اسماء وهمية بس دة اللي لاحظتة في الفترة الاخيرة في المجتمع التدويني الفترة الاخيرة ان المدونين اللي حبيت قلمهم القوي اللي كان بيكتب عن كل كلمة و قضية انت حاسس بيها سواء كانت قضية وطنية او اجتماعية او حتى رومانسية


اتقلبت الاقلام دي كلها لتتوجه في طريق واحد و هو العداء لبعضها


و تلاقي فلان كاتب بوست يشتم فية فلانه و فلانه بترد على فلان بتعليق سخيف


و حاولت كتير ادور على الاسباب وراء كدة............ ملقتش


اية هو المانع وراء ان احنا نحافظ على اسلوبنا و رقي حديثنا و نتحدث مع بعض بالمنطق و من الصحي ان نختلف او نتفق و لكن بالدلائل و ليس بالشتائم


انا حبيت بس يا جماعة انوه عن الموضوع دة في كلمتين


ياريت يا جماعة نعود كما كنا و يعود لنا اسلوبنا الراقي في التحدث مع الاخر


و ان كنا افتقدنا هذا الاسلوب فيجب ان نتعلمه من جديد


و لنجعل الكلمة هي الثمرة على الشفاه


و النغمة على الاذن


دعونا نحول الامل الي حقيقة تعيش بيننا و تترعرع


******************************************


الموضوع التاني ان انا جالي كذا تاج و اصحاب التاجات كلموني و قربوا يزعلوا فكرني منفض عشان كدة انا هجاوبهم كدة في السريع




اول تاج وصلني من كل من




تاج الحصانة





دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
الكوز طبعا


عشان بيلم كتير و بيستحمل في قلبه كتير و انا هيطلع عيني عقبال ما انجح
كنت تفضل الدخول مستقل او تتبع حزب معين ؟؟؟؟
هو محدش سمع اني بكتب في مدونة انا مش معاهم


و دة معناه اني مش معجب بفكر اي حزب
اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
ما لقيتوش غير الوطني طب قولوا حاجة عدله


حزب وداد قلبي مثلاً


لا طبعا انا دخلت مستقل و سأظل مستقل
اول حاجه هتعملها لنفسك ولاسرتك ؟؟؟؟؟
طبعا اول حاجة هعملها لنفسي هجيب بطارية للموبيل عشان لما اهل الدايرة يكلموني الموبيل ما يفصلش كل شوية زي عادته


و لاسرتي هحاول اشغل كل العاطلين زيهم زي اهل الدايرة
ايه المشروع اللى ناوى تعمله لاهل دايرتك ؟؟؟؟ دون ذكر اسم الدائره
اولا عايز اعمل مستشفيات و اجيب مواصلات نظيفة و جديدة بدل المهانه الانسانية ، ههتم جدا بالمدارس اللي بقت صفايح زبالة ، الاهتمام بالطرق عشان لحوادث الكتير اللي على الطرق ، ههتم برغيف العيش في المنطقة ( معندناش حد بيبيع عيش إلا ابو نص جنية ) خلاص انا فلست


قعدت في المجلس جنب نائب مميز . من هو النائب ؟؟؟
طلعت السادات
قدمت سؤال للحكومه ايه هو السؤال ؟؟؟؟؟
سؤال مهم جدا : متى يمكن للحكومة ان تقدم استقالتها و ما هو المطلوب من الشعب لتقدم الحكومة على هذه الخطوة الجريئة ؟

طلب احاطه موضوعه ايه ؟؟؟ وبتقدمه لمين ؟؟؟؟


طلب احاطة هيبقى لرئيس الجمهورية و اقله ممكن يا ريس تسيب الحرس بتوعك و الديوان الملكي بقيادة زكريا عزمي و تنزل تعيش يوم واحد وسطينا في القلعة في الباطنية في الضرب الاحمر في كرموز و لا في طنطا


............ممكن ...........
استجواب لاتنين من الوزراء موضوعه ايه ؟؟؟؟وبتستجوب مين
السيد وزير الخارجية عملت اية في الاراضي المصرية المنهوبة ( ام الرشراش ) و ما تستعبطش و تقول فلسطينية


السيد وزير المالية : فلوس الشعب بتروح فيييييييييييييييييييييييييين
انت مع الخصخصه ؟؟؟؟؟؟
لا طبعا و لو ان الشعب كدة كدة مسروق بالخصخصة او من غيرها بس انا مش معاها
هل انت مع قطع العلاقه مع اسرائيل ؟؟؟؟؟


جدا جدا


يارب نقطع العلاقات من بكرة الصبح


لا بكرة بعيد من دلوقتي لو امكن
وما يترتب عليه من معامله العدو هل تؤيد الحرب على العراق ؟؟؟؟؟؟؟؟
اطلاقا


لا طبعا


دي دولة عربية شقيقية
هل تؤيد مرور الامريكان فى القناه ؟؟؟؟؟؟


مرور سلمي ممكن


مرور اسلحة و ذخيرة و الالات حرب يبقى لا و الف لا
هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟
مين .....فين ....اية


لا و النبي ما اعرف


بس لو اعرف كنت اشتركت


بتمرر التاج ده لمين ؟؟؟؟؟؟


هتعرف في التاج اللي بعده


********************************************


التاج دة بقى جاني من




نشوفه هيقول اية


هل توافق على حزف خانة الديانة من البطاقة الشخصية ؟


لا طبعا


دة في عيال انا مش بعرف ملتهم اية غير من البطاقة
ما رأيك فى المثليين ؟


منهم من هم مرضي نفسيين و ندعو لهم الله بالشفاء دة لو كانوا هما عايزين يتعالجوا


و منهم اللي بيستعبط و عايز الولعة بجاز


هل هى حرية شخصية ؟


مفيش حاجة تخالف الدين الاسلامي و يبقى اسمها حرية شخصية


الله يقطع الحرية على الشخصية لو دي نتيجتها


هل توافق على الإعتراف بالمثليين ؟


شمس الزناتي اساسا مش معترف بالمثليين يبقى هوافق على اعتراف المجتمع بيهم


هل لديك أصدقاء من المثليين ؟


صداقة بمعني الصداقة لا طبعا محصلتش الفرصة


بس اتكلمت مع بعض منهم


هل تعتقد بوجود إضطهاد للمسيحين فى مصر ؟


لا طبعا اطلاقا


انت بتصدق الاشاعات اللي المغرضين بيطلعوها


من هو الشخص الذى تختارة لرئاسة مصر ؟


اختار من الاسماء الاتية


طلعت السادات - عمرو موسى - كمال الجنزوري


أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟


طلعت السادات - عمرو موسى - كمال الجنزوري - مهدي عاكف - خيرت الشاطر -المشير طنطاوي - فاروق الباز - البابا شنودة - عمرو خالد - احمد زويل -


هل توافق على مشاركة كل من : الإخوان المسلمين - الأقباط فى الحكم ؟


اه طبعا مسموح لكل الفئات في المشاركة


فى رأيك الشخصى .. ما هى أفضل مدونة على بلوجر قمت بزيارتها ؟


كل اللي همررلهم التاجات دي زي العسل و في كتير بس اكيد انا عندي زهيمر


و في اكتر بس اكيد محصليش الشرف ازورهم


للذكور فقط : أيهما تفضل كزوجة .. إمراءه عاملة ، أم ربة منزل ؟


انا مع المرأة العاملة فلبا و قالبا


بس انا هتجوز ربة منزل


اذا تزوجت وأنجبت ولدين وبنتين .. أى الأسماء تحب أن تسمى ؟


تعرف اني لغاية دلوقتي مفكرتش في الموضوع دة


بس لما اوصل لنتيجة هتصل بيك اقلك


او هعدل البوست


هل تعتقد أن توريث الحكم فى مصر . . سيتم فعلا أم لا ؟


طبعا سيتم


احنا بنعمل اللي علينا بس الحكومة هتعمل اللي هي عايزاه


فى رأيك الشخصى : ماهو أفضل إنجاز لحكومة مبارك ؟


انجاز واحد يا راجل قول انجازات


و هي ضرب جميع الارقام القياسية


من اول معدلات الفقر لحد معدلات الظلم و الجهل


وما هو أسوأ عمل قامت به ؟


كتيييييييييييييييييييييييييير اوي


بس اللي حازز في نفسي لغاية دلوقتي


السكوت على الطائرة المصرية اللي سقطت على حدود القارة الامريكية و كانت تضم 36 ضابط مصري


و كفاية عشان كل ما افتكر الموضوع دة اتعكنن


ثم لمن تمرر هذا التاج ؟


خد عندك بقى يخدوا التاج دة و اللي قبله




اتكلم

طرقعات فجائية

Nidalpal
احمد سعيد - نيجر
هشام - بر مصر

January 29, 2008

ام الرشراش الحلقة التانية - دقيقة حداد

طبعا انا زي ما قلت انا هقدم حلقة تانية عن ام الرشراش انا مش بخلف وعودي
بس البوست دة مش الحلقة التانية دة الاعلانات
احمد المصري اللي بيحب مصر ( و انا و الله بس سعات بزهق )
اعلن ان مدونته هتعلن الحداد يوم 10 مارس 2008 لانه زكرى يوم سقوط ام الرشراش و طبعا عشان موضوع ام الرشراش دة احنا اتكلمنا فية قبل كدة و كان حارق دمي فانا كمان في نفس اليوم هعلن الحداد
و ان شاء الله كلنا نعلن الحداد من الساعة
00:00
الي الساعة
24:00
طبعا كل من يحمل موبيل فهم في الساعة اللي انا كتبتها دي
انا كدة الاعلانات خلصت و اقوم بقى اجيب انبوبتين اسود الون المدونة استعدادا للحلقة التانية من ام الرشراش

January 27, 2008

هتمشي يا ريس

هتمشي يا ريس

في اشاعة كدة رايحة و جاية
يا رئيس الجمهورية
انك في الفترة الجاية
هتسيبنا و ترحل عنا

ازاي انا مش مصدق
دي اشاعة صحيح تقلق
و إن صدقناها هنغرق
دة انت عملهالنا جنه

هتسيبنا كدة في النار
وسط الغلا و الاسعار
و الشعب يعيش محتار
و النبي ترجع و ارحمناه

بصراحة انا مش كداب
جبتلنا الاكتئاب
بالظلم و الارهاب
بس فراقك وجعنا

و اكملك الاشاعات
دة قالوا حاجات و حاجات
انك ابو الواجبات
على طول دايما فاكرنا

بس اوعى لصوتنا تسمع
دة شعب عايز يدلع
و فاكرك آل اية مجدع
على طول نفسك تكرمنا

ما تقلي بجد يا ريس
انا ضايع و لا كويس
انا فايق و لا بهيس
اصل انت حبيبنا اللي فهمنا

طب كلمة و خدها بجد
و ابقى اسأل أي حد
في بينا و بينك سد
شيله و حاول تسمعنا

January 23, 2008

شهيد غزة

شهيد غزة

في كل صباح غزة تحترق بالنار
و الاهل و الاحباب بين الموت و الانهيار
و ما عاد قلبي يحتمل الانتظار
ما عدت اطيق وداع الابرار

لازلت احلم بحلم من بعيد
ان احمل سيفي من جديد
و عن درب غزة لا احيد
و اعود منتصراً او شهيد

لازلت احلم و حلمي ملعون
ماذا يفيد غزة من التائهون
ما يفيد الجرحى من الغافلون
ما عاد يكفيني السكون

ما عادت تكفيني الكلمات
ما عاد يرويني الهتافات
ينتابني من الذنب نوبات
عند رؤية اهل غزة اموات

يا قومي سامحوني فإني غاضب
و لا لوم عليّ في غضب صائب
و لصمتكم و سكوتكم عاجب
تموت غزة و انتم بين مندد و شاجب

January 21, 2008

الي متى السلبية تجاه عزة ......انا مش سلبي

طبعا اتكلمت مدونات و جهات اعلامية كثير عن غزة

غزة تحت الحصار الاسرائيلي




المؤن تنقطع عن غزة




كلنا مع غزة - فداكي يا غزة




كهرباء و الغاز ينفذان من غزة




القتلي و الجرحى يتزايدون في غزة




معكم يا اهالي غزة الابطال




يا اما شعارات يا اما اخبار و كل واحد قاعد قدام شاشة الكمبيوتر بيشرب النسكافية المتين ابو ثلاث معالق سكر و بيسمع الموسيقى الهادية و يبكي بالدموع على غزة طب لحد امتى هنفضل ساكتين لحد امتى الوطنية اللي جوانا هتبقى عبارة عن ضغطيتين زي على الكي بورد هنقدر نعمل حاجة و لا لأ




ايوة هنقدر مش لأ عمر المصري ما كان ضعيف و عمر الوطني ما كان ضعيف




"و إن الله لا يغير ما بقوم حتى يغيروا ما بأنفسهم "




و من هذا المنطلق فقد اجتمع بعده مدونين في اجتماع على الياهو للوصول الي طريق ايجابي نسلكة و قد استقرينا على احد الطرق الايجابية التي سوف نعلن عنها عبر الميل و المجموعات البريدية ( و انتوا طبعا عارفين انا مش ناشرها على المدونة لية عشان اخوانا البعدا ) ثم استقرينا على ايضا بناء دور لمن لا يستطيعوا النزول الي الارض و الشارع للتعبير عن رايهم




بالنسبة لهؤلاء المصريين للنهاية سيكون عليهم معنا و من على صفحاتهم المطالبة بالاتي




مطالبة حكومة جمهورية مصر العربية بالسماح بمرور التبرعات العينيه والماديه عبر رفح
مطالبة الحكومات العربية بقطع كل العلاقات الدبلوماسي مع المغتصب الصهيونى
مطالبة الأمين العام لجامعة الدول العربية للدعوة العاجلة لقمة عربية طارئةلإتخاذ مواقف حقيقية للرد على ما يحدث مع ملاحظة تخطي مرحلة الشجب والتنديد
الربط الكهربائى بين مصر وفلسطين وأمداد غزه بالغاز الطبيعى الذى يعطى للصهاينة بسعر مدعوم
نطالب جميع الحكومات العربية والإسلامية بطرد سفراء بنى صهيون من بلادها
ندعوا جامعة الدول العربية تبنى حملة دولية للمطالبة بتعويضات مادية لأسر الشهداء من اهل فلسطين على غرار الحملة الصهيونية على النازية وعلى غرارالتعويضات التى حصل عليها الأوربيون والأمريكان من ليبيا فى حادثة لوكيربى
نطالب بفتح باب الجهاد أمام من يريد من الشعوب العربية فى حالة عجز الحكومات العربية عن إتخاذ موقف عسكرى مساند لإخواننا فى غزة فإذا كانت الحكومات لا تستطيع فعل ذلك فدعوا الشعوب تفعلها

و من مدونة مصري للنهاية




يرفع شمس الزناتي شعار( بانر ) اول مطلب للجماهير قفل سفارة و طرد سفير



مبقاش في حاجة تاني تتقال غير


ربنا مع اهل غزة


January 17, 2008

ام الرشرارش ( إيلات ) مصرية و الله

طبعا انا معرفش اذا كان كل قرائنا يعرفوا ام الرشراش و لا لأ لكن اللي فيكوا مش عارف ام الرشراش اكيد سمع عن مدينة او ميناء اسرائيلي اسمه ايلات ( Eilat ) حكايتها هي اللي هنقلها ، و اللي عارف الحكاية يستني برضة معايا شوية



طب اية الحاية اقلكوا اية الحكاية بس استحمولوني لو اطلت عليكوا المرة دي



ايلات مينا اسرائيلي على الساحل الجنوبي من خليج العقبة يحد مدينه ايلات الاسرائيلية اراضي سيناء غربا و اراضي الاردن شرقا و البحر الاحمر ( خليج العقبة ) من الجنوب المساحة 84.789 كم مربع و عدد سكانها 45700 نسمة حسب احصائية عام 2004



طب هنفضل نحكي عن ايلات كدة كتير يا شمس



لالالالالالالالا مش هطول عليك و هديك الساعقة دلوقتي ان مدينة ايلات دي مدينة مصرية الاصل و اسمها ام الرشراش و محتله من قبل اسرائيل منذ عام 1949 بالتحديد في 10 مارس 1949 و الي الان محتله و لحد بيتكلم و لا حد شايف و لا حد سامع



و النبي يا عم شمس مش عايزين فرقعات و كدة يعني ما تديناش خبر عشان تسخنا و يطلع غلط



لا مش غلط و الادلة كثرا فقط سيادتك كلف نفسك و اتعب دقيقة و ابحث على الشبكة عن " الجبهة الشعبية لاستعادة ام الرشراش " الجبهة دي يا جماعة تأسست من 15 سنه على يد مؤسسها محمد الدريني



و قد صرح محمد الدريني بأن الجبهة نشرت ادله عن ان هذه الاراضي هي اراضي مصرية كما نشرت وثائق عن مجزرة جماعية اقامتها القوات الاسرائيلية ضد 350 جندي و ظابط مصري كانوا يتولو حماية ام الرشراش عام 1949 كما اوضح انهم يمتلكون في الجبهة ما لايقل عن 7500 وثيقة تثبت صحة ان ارض ام الرشراش ارض مصرية



طبعا يا جماعة الجبهة دي مؤسسة من 15 سنة اية اللي انا جايبة جديد هقول لحضرتك



اخر الاخبار المصرية عن هذا الموضوع ان هذا الموضوع اثير في مجلس الشعب بجلسة 18/12/2006 م في لجنة الشئون الخارجية و قد كان رد الحكومة على لسان مساعد وزير الخارجية وقتها ان هذه الاراضي اراضي فلسطينيه ( معرفش جاب الكلام دة منين )



الجديد في الامر ان النائب المحترم / طلعت السادات تقدم للدكتور / فتحي سرور بطلب احاطه يوم 6/1/2008 يعني من ايام قليله لنقاش مسئلة قضية ام الرشراش على اثر اكتشاف مؤسسة الاقصى لاعمار المقدسات الاسلامية عن اثر اكتشافها مقبرة جماعية جديدة لمسلمين قتلوا في ام الرشرام رميا بالرصاص و دفنت مصاحفهم معهم و على هذا الاعلان تقدم النائب حبيبي / طلعت السادات بطلب الاحاطة اللي رد علية رئيسمجلس الشعب و مش هقول اسمه تاني عشان قرفت بان الموضوع هيتم مناقشتة يوم 13/1/2008 و الي الان انا مستني 13/1/2008 دة يجي مع ان حسب النتيجة التاريخ دة عدى



المهم اللي منكوا هيبحث فعلا في الموضوع انا بقدم لكم خريطة ايلات من الانترنت





و دي خريطة ايلات جبتهالكوا من جوجل ايرث حضراتكوا ممكن تشوفوا ام الشرشراش انا محددها بالخط الاحمر


هسيب الموضوع معاكوا و هنكمل كلامنا فية تاني قريب جدا بعد ما اشوف رايكوا اية
و على فكرة يا جماعة في جروب على الفيس بوك للمهتمين بهذا الموضوع دة اللنك بتاعه

January 16, 2008

ممكن كلمة يا ريس

ممكن كلمة يا ريس

يا ترى ممكن احلم بعد ما فات الاوان
احلم بعد ما سرقوا منى الحنان
طب احلم ازاي و قلبي مقتول من زمان
طب بلاش احلم خليني من اهل الحرمان
بس بلاش تحرمنى من حق النوم كمان
و وعد مش هتكون غفلتي فيها احلام
بس متحرمنيش من حقى في اني انام

و لو مستكتر علية النوم و حتى النوم الخفيف
سيبني اعيش و اشم هوا نضيف
اسمح للربيع يعدي علية بعد ما قتلني الخريف
تعبت و القلب مات و الجسم اصبح نحيف

كلمتى انا قلتها و معرفش عنوان المعتقل
لو هتبعتنى قول للبيضربني ان الجسم اتنحل
و خلية يسامحنى و انا احلفلة ان الحنك اتقفل
الكلمة يا ريس كلمة معتوه و انا دماغى صابها الخلل

January 13, 2008

الووو.....الووووو....مكالمة غريبة


ترررن ترررن ترررن ترررن
شمس : الو ..... السلام عليكم
المتصل : ازيك يا شمس
شمس : اهلا و سهلا اقدر اعرف مين معايا
المتصل : جهات عليا
شمس : انا ساكن في الدور الخامس حضرتك بتكلم من السابع
المتصل : شمس احنا قرينا بوستاتك اللي كاتبها 1 ، 2 ،
شمس : ربنا يستر .........اية المطلوب
المتصل : انت عايز توصل لفين
شمس : لو كان علية عايزك تبلغ سيادته ان فطار الفول و الطعمية بقى غالي .............. بلغة ان الجنبة بالقوطة بقت للاغنياء بس ........... قوله ان الشباب قاعدة مش لاقية شغل و الناس جعانه و الصرخات في كل مكان ....... بلغة ان احنا مقتولين من الحرمان من الطغيان و الشعب في حالة هذيان و البلد على بركان و الغني في الفقير طمعان و النظام لغى من البطاقة صفة الانسان و عشان تعرف تاكل يا تلف بظهرك عريان يا تقلع لغيرك و يتقال عليك فنان
المتصل : مش عايز حاجة تاني يا شمس
شمس : اه و النبي اهم حاجة قول لسيادته انا مش ارهابي و لا تابع لمنظمة و لا عايز اكفر حد و لا عايز ادعو لحد و قوله اني حلفتلك انا مش ارهابي
المتصل : هههههههههههههههههههههههه
شمس : استنى اقول لسيادتك قولة انا مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون مجنون
---------------------------------------------------
و مرة واحدة لقيت اخويا بينادي
اخو شمس : شمس يا شمس
شمس : نعم
اخويا : انت ماسك السماعة و عمال تقول انا مجنون و التليفون بيصفر
شمس : اصل التليفون رن و انا رديت و بعدين حصل ان ................
اخويا : شمس انت بتحلم
شمس : بحلم يعني برضة الكلام دة مش هيوصل خلاص اقوم بقى اكتبه على المدونة

January 03, 2008

عاطل لية يا بلادي

عاطل لية يا بلادي

فك قيودي انا عايز اتكلم
سبني احكيلك ازاي بتألم
سبني اقول كل اللي في قلبي
دة انا قلبي عايز يترمم

انا واحد زيك غلبان
عاش يحلم بحقه كانسان
شخصه كشخص الفارس
و قلبه دة قلب الفنان

الحكاية من اول المدرسة
كانت امي تقول كلمة كويسة
اتعلم و اكبر بشهادتك
علامك سند الجيوب المفلسة

ادينا خدنا شهادة العلم سلاح
شهادة كبيرة مضمونها فلاح
مكتوب عليها مبروك للمهندس
و المهندس جاي المهندس راح

قومي يا بلدي و ردي علية
انا جايلك و سماتي قوية
انا جاي بايع حبي لمصر
و في حبك طالب العبودية

من غير ما هطول و لا اماطل
كان رد بلادي " بقيت عاطل"
و دة ردك يا بلادي علية
اسمحيلي دة رد باطل باطل

يا مصر انا عايز حق الحب
انا عايز حق دموع القلب
حبيتك يا بلادي فين ردك
و لا الوطنية دي كدب في كدب

January 01, 2008

مصري للنهاية 2007 - 2008

طبعا الاول كدة


كل عام و انت بخير و السنة الجاية 2008 تبقى اجمل و احلى و اعظم


و كل عام و الاخوة المسيحين بخير


طبعا زي بعض القنوات الاعلامية الكبيرة ما بتعرض ملخص لسنة 2007 لازم مدونة مصري للنهاية برضة نعرض الملخص للقراء و ناخد رايهم و اقتراحاتهم


طبعا يا جماعة زي ما انتوا عارفين السنة دي كانت مزدحمه جدا


لكن احنا هنحاول نعرض اهم ما تناولناه فيها و كان اهم ما فيها


حملة الاقصر مصرية اللي طالبنا فيها بحقنا المشروع في ان اسم الاقصر اسم مصري لا يملكه الا المصريين و لا يحق لاحد استغلاله


حملة إلا رسول الله و كانت ناجحة جدا الحمد لله و كان في يوم 9 أكتوبر يوم للمدونين للكتابة عن سيد الخلق علية الصلاة و السلام و بالفعل كان ليها تأثيرها


و طبعا كان فية الحملة الكبرى على موضوع تهريب الاثار و حماية تاريخ مصر و احنا لسة على نفس الطريق مش هنتغير


و مؤخرا كانت حملتنا للتضامن مع الشريف / جمال طه ضد نظام الكفالة في السعودية


و اخيرا كان تضامنا مع وائل عباس ضد المكائد اللي بتنفزها الجهات اللي ما تتسمى


------------------------


طبعا دة كان مشوارنا في 2007 و اللي هنكمله للافضل في 2008


و نتمنى نشوف اقترحاتكم و ارائكم في الاداء


طبعا انا عايز اقلكوا اهم ما كانت تمتاز بيه المدونة و هو القصة و الشعر


و دة اللي هسيبكم معاه و اقلكوا


كل سنة و انتم بالف خير يا احلى قراء