My Visitors If you cann't read arabic you can know how I think you can visit this link

August 22, 2011

تهافت الثائر و السياسي

بسم الله و الحمد لله

يمكننا القول ان ما حدث الخميس الماضي على الحدود المصرية الاسرائيلية يحتاج الي وقفة للتأمل فها هي اسرائيل تحاول اختبار رد فعل مصر بعد الثورة هل هو نفس رد الفعل قبل الثورة
لا اختلاف ان الشعب المصري لم يتغير في ردة فعله
و نحن ايضا لم نتغير و قد كتبنا قبل الثورة

ام الرشرارش ( إيلات ) مصرية و الله


و عدنا لنكتب

ام الرشراش الحلقة التانية - دقيقة حداد

و تضامنا معا و ظللنا متضامنين حتي اليوم هنا



و لم يكن هناك مجيب و اليوم و ما بعد الثورة و بعد ما حدث الخميس الماضي لكل من الثائر و الثوري رد و نحن نجزم قطعا ان كل منهم كل دام قلبة على الوطن فلا يختلف عن الاخر و يأتي السؤال
ماذا علينا ان نفعل ؟؟؟؟؟؟؟؟؟؟؟
ان حل هذه الازمة ابسط من ان يستدعي هذا التأخير من القيادة المصرية
فلا حل يأتي قبل ارضاء الجماهير بطرد السفير و لكن هل يكفي ؟؟؟؟
ان الخطوات الواجب اتخاذها تجاه اسرائيل و الممكنة عديدة و لو تركنا العصبية الثورية جانباً لوجدنا انه بامكاننا
سحب السفير المصري من تل ابيب
طرد السفير الاسرائيلي من مصر
طلب عقد جلسة لمجلس الامن
الغاء اتفاقية الكويز المقيته المحزنة
الغاء جميع الاتفاقات الاقتصادية و التعليمية و الزراعية المبرمة مع العدو
و ياتي من بعد ذلك تعديل اتفاقية كامب ديفيد
Link

و لو اخذنا طريقنا هذا على محمل الجدية و التنفيذ فإن الكيان الصهيوني لم و لن يتواني عن رفع كل الرايات البيضاء للعظيمة مصر و لن الثورة حتى الان تطالب بشهدائها و شهدائنا فقد كان لزاما علينا الا ننسى حقوق اسرانا في حرب 1967
و التي نادينا بها كثيرا و مغصت علينا كل احتفالات اكتوبر و التي كتبنا عنها

ذكرى منيله......... اه و الله


و اعترف انني اشتددت في التعبير و لكنه من هول الحزن على مصريين لم يأخذوا حقوقهم حتى الان

ان العداوة بيننا و بين الصهاينه كانت و ستظل قائمة و لا حل لها سوى ان يأمن من استئمنوا على اتخاذ القرار بهذا العداوة كما انه واجب علينا نحن الشعب الا ننسى حقوقنا بما فيها شهداء النكسة و ام الرشراش الارض المغتصبة

لقد كان لي شرف المشاركة في تظاهرات لطرد السفير الاسرائيلي و فرحت عندما رأت عيني ما يقارب العشرة الاف متظاهر و لو اني كنت اتمنى ان اجد الوطن العربي كله معنا
رفقنا الله الي ما فية الخير

اللهم اكتب لي ان اشارك في معركة مع الصهاينة فاقابل شدشدا فاقتله فاقابل الاشد فيقتلني فتسئلني يوم القيامة فيما استشهدت فأجيب في سبيل الله و الوطن

عاشت مصر

June 25, 2011

ثورة يناير من بعيد بعض الشئ



كنت اتكلمت كدة مع نفسي بايجاز شديد عن اية اللي خلا الثورة تحصل في شوية عوامل سميتها نار تحت الرماد و اتكلمت عليها بايجاز
لكن النهاردة يبقى مر 5 شهور بالظبط على الثورة بعدنا شوية و بقينا نبص من بعيد و نقدر نكلم باستفاضة شوية عوامل كتير خلت الثورة تقوم
ذكرناها في البوست اللي فات
نار تحت الرماد
1-النخبة المثقفة يعني المعارضين المعروفين بلال فضل و عبد الحليم قنديل و نوراة و الخ مع حفظ الادوار و الاحترام و حط عليهم شباب الفيس بوك و شباب المدونين
2-احزاب مريضة بمرض الاكتئاب الحاد حتى كبيرهم
3-جماعة الاخوان المسلمين-قضية القرن الجدلية - و ما لقوه من سجن و اعتقال و محاربة في الارزاق
4-
شعب و خد عندك مع كلمة شعب يعني شباب مثقف و ناقم على الاوضاع و فقراء مطحونين لحد ما الجوع خلاهم سكنوا مقابر الاموات و اتحولهم شبابهم لمن سمناهم البلطجية او العيال السيس و ناس طبيعية مطحونة و مسيحيين مظلومين و مسلمين متدينين معتقلين يعني كلمة شعب دي من الاخر تعني قنبلة موقوته
طب اللي حصل للناس دي شافوا بوادر انتصار الشعوب على الحكام في تونس و اتخذوا القرار و تم اختيار
25 يناير 2011
و كبرلي الخط هنا اوي
شباب النت اللي قال عليهم بوش مدونين و شباب الفيس بوك و شوية من المعارضين اللي طلع عين ابوهم في البلد و قالوا بسم الله و نزلوا الفئة الاولى تبدء في الصباح على وش المدفع من امتى يا معلم من الصبح للساعة 5 المغرب و دول كانوا اهم 5 ساعات في تاريخ مصر مع بداية القرن كانت نتائجهم عظيمة الفئة الاولى من النخبة و معاهم بعض من الاحزاب (الفئة التانية) و الفئة التالثة الجماعة عرفوا مدى ضعف الجهاز الامني للنظام امام الشعب كما عرفوا مدى غرور النظام السياسي - فعلا الريس كان مغرور - و من هنا بدءوا يتخذوا القرار
نزلوا الاخوان و حزب الوفد و الجبهه و الغد باعداد لجس النبض و هنا اتضح مدى ضعف الجهاز الامني امام الجماهير مع مراعاه ان الجهاز الامنيلم يتعامل بقسوة الا في الساعات المتأخرة من الليل
اتخيل مجرد تخيل لو كنت مؤلف مسرحي او سيناريست تليفزيوني لكنت رسمت صورة لمجلس شورى الاخوان مجتمع ليلا ليناقش قرار الجماعة هل هذا هو الوقت المناسب لاسقاط النظام مع العلم ان قرارات حظر الجماعة لا تسقط الا بسقوط الانظمة
--------
نعود ليوم 26 يناير الذي كان يماثل 27 يناير
حيث تجد الفئة الرابعة و هي الاهم الشعب متفرج و الفئة الاولى و الثانية و الثالثة لازالوا يرواغون الجهاز الامني في الشوارع و الطرقات كانوا رائعيين سلميين حضاريين و كان النظام يلعب دور المطارد مع الدعم بسلسلة اعتقالات لكل رموز المعارضة و الاخوان و الشباب اللي فيهم وائل غنيم هنتكلم علية طبعا
تخيل معركة نمر عجوز شرس يستنفز قوته امام شراسة سلمية معركة يشاهدها الشعب
مشهد رائع تراه عنما تجد قطة لطيفة تداعب نمر عجوز فترهق قواه ليأتي الاسد بقدم واحدة تسقطة في ظهيرة
28 يناير
بداية السقوط
و دة مش هتكلم علية النهاردة لانه عايز كلام كتير

June 03, 2011

الحمد لله ...........جمعة العمل

دة كان الواحد تعب و الله من جمعة الغضب لجمعة الرحيل لجمعة الصمود لجمعة ابن ام جمعة يعني فعلا الجمعات كانت كتير
بس بكرة في جمعة مختلفة اسمها جمعة العمل يارب تكون فعلا جمعة العمل
و انا قاعد بلعب عشرة طاولة مع الحاج بعد رمية الدش اللي جت من ايده سمعت خبر ان افراد القرية الذكية نازلين بكرة يشتغلوا في الاجازة عشان يحيوا جمعة العمل
الله عليهم حلوين قوي و طعمين قوي و الله اكبر عليهم -مع الاعتذار لحمادة هلال
بس في سؤال محيرني هو احن في مصر عايزين وقت زيادة نشتغله و لا عايزين زمه زيادة في وقت الشغل انا كان نفسي يسموها جمعة الضمير في العمل
الجمعة اللي كل اللي بينتج منتج ينتجه بعديها صح
و اللي بيبيع يبيع بالسعر الصح
و اللي بيقدم خدمة يقدمها صح
المدرس يشرح في المدرسة بضمير
الام تحب ولادها بضمير
المؤمن يصلي بضمير
حبيبتي تحضني بضمير
يا ترى ممكن نعمل الجمعة دي
ممكن نعمل جمعة التعاون في العمل
يعني و انا رايح العمل سواق الاتوبيس لا يتعمد ان يعطلني
و فرد الامن على باب الشركة لا يتعمد ان يبرز لي صفات عدم التعاون
ممكن جاري المسلم يتعاون مع جاره النصراني على المحبة و العكس
ممكن اليساري يتقبل الاخواني و العكس
ممكن محدش يطلع صبحي صالح في الاعلام تاني
يا ترى الاماني دي كلها ممكن تتحقق في جمعة و لا عايزة الف جمعة
عمـــــــــــــــــــار يا مصر

May 20, 2011

حزب الكنبة يقول

حزب الكنبة يقول
عادة ما بتهم نفسي اني من رواد حزب الكنبة و كتير من المصريين كانوا اعضاء في الحزب دة لا نزلوا في انتفاضة يناير و لا اتحركوا و كانوا ممن يجلسون امام التلفاز لمشاهده الاخبار
و لكن عايزين نعتبر ان الاداء دة كان غلط و ان حزب الكنبة مفروض يخلي بقى عنده دم و ينزل ثورة الغب التانية طب السؤال المهم هننزل نطالب باية قبل كدة كان فية رئيس و حكومة و مجلسي شعب و شوري و الناس في التحرير كانت تطالب باسقاطهم جميعا طب المرة دي هنسقط اية
نحاول نفكر في اول مطلب
يعني مثلا هنقول الشعب يريد ان المجلس العسكري يرحل طب و بعد ما يرحل مين اللي هيحكم بعد ما تاخد شفطة شاي نقول مثلا نجيب مجلس رئاسي يحكم طب مين اللي هيترشح في المجلس دة و على اساس اية و مين اللي هيدير العملية الانتخابية يعني مثلا المجلس العسكري هيدير عملية انتخابية تشيلة من الحكم باسم الثورة مش عارف
طب سيبنا من النقطة دي
خلينا مثلا في محاكمة الفاسدين من نظام مبارك فية سؤال مهم هل احنا عندنا قوانين تحاسب الفاسد على فساده السياسي كل الخبراء قالوا معندناش طب نحاكمهم ازاي مفيش حل غير انهم ينزلوا التحرير يضربوا بالشباشب يا اما بقى يفضلوا في السجن لما ننتخب رئيس و مجلس شعب و شورى و نحط دستور و بعد كدة قوانين بعد كدة نحاسبهم بعد كدة تقومني من النوم عشان دة اكيد هيبقى حلم
طب سيبنا من محاكمة الفاسدين خلينا مثلا في اسقاط الحكومة الفاشلة اللي موجودة دلوقتي سؤال بس قبل ما اسيب الكنبة و انزل التحرير هي الحكومة اللي انا هسقطها دي شكل امها اية يعني دي حكومة تسيير اعمال و لا حكومة مستقرة اصلها لو حكومة تسيير اعمال يبقى كدة كدة ماشية و لو مستقرة يبقى نسقطها لالالالالالالالالا لحظة نسقطها لية دة الدكتورر عصام شرف راجل كويس احنا نسيبه و نسقط الفاسدين طيب مين الفاسدين د/سمير رضوان مثلا لا ابدا راجل زي الفل
طب يا جدعان حد يفهمني انا انزل التحرير بناءا على انهي خارطة طريق قولولي هنيل اية في سنتنا السودة دي و انا اعمل انما انزل كدة من غير هدف سليط مليط
و الله انا شايف ان الي بيسموا نفسهم قوى وطنية يقعدوا و يجتمعوا على شخص و ليكن الدكتور البرادعي و يختاروه كرئيس للجمهورية باسم الثورة يدير البلد في المرحلة الانتقالية لو هنعمل كدة انا اول واحد معاكوا في التحرير على الاقل ابقى عارف ان بعد ما يتولى لما احب اكلم مصر هلاقي حد عارف نمرته مش هطلب 140
و السلام ختام

May 10, 2011

تهافت السؤال عندما تتهافت الاهوال




لو بتعاني من اي مرض نفسي او مرض السكر او الضغط اوعى تسئل نفسك الاسئلة دي بس لو كنت عايز تفكر مع نفسك بعيد عن توجيهات الاعلام فكر معايا كدة بصوت عالي
-
-
هي اشمعنا اسرائيل بتعرض صور جديدة للاسرى المصريين في 67 الايام دي؟؟
-
-
المتهم حبيب العادلي اتحكم علية بعديها بــ48 ساعة امبابة عملت بم بم بم بم بم ؟؟؟
-
-
-
احساسك اية لما تسمع ان فية مصريين راحة عند سفارة امريكا يقولولها تعالي احتلي مصر عشان تحمينا
-
-
-
نسيت اقلك ان نفس المصريين بعتوا شكوى لمكتب الامم المتحدة في القاهرة
-
-

لو أحساسك عادي يبقى اكيد احساسك هيختلف لما المظاهرات السلمية للسلفيين يقوم عليها الاعلام و ما يقعدتش و المجلس الاعلى يطلع بيان انما لما تقوم مظاهرة تكسر زجاج مبنى التليفزيون و تضرب ظباط الشرطة و الجيش بالطوب و تضرب اتنين من المارة الملتحين ماشيين في الطريق (يعني مش سلمية) تقوم برامج التوك شو كلها تصقف على الاداء العالي و الاعلام المصري يعتبر دة عادي
-
-
-
-
افتكر لو السفيين عملوا مظاهرة عنيفة كدة يا نهار غامق هيعدموا و انا شخصيا هطالب باعدامهم .....بس مش عارف مين كمان هيطالب معايا
-
-

-
-
-
نشرب كوباية كركدية (عناب عشان بيوطى الضغط) و نرجع نسئل نفسنا هو وزير الداخلية كان بيتكلم بجد لما طلع اول ايام احداث امبابة و قال ضرب النار من الكنيسة و تاني يوم نفى الكلام دة على البرنامج المنيل و قال لأ دة مبنى ملحق بالكنيسة ؟؟؟؟؟اكيد مكنش بيتكلم بجد
-
-
-
-
-
اكيد اكيد اسرائيل و النظام السابق ملهمش علاقة بموضوع امبابة دة

سلام عليكم

April 22, 2011

تهافت الجزيرة ببعض اللقطات الحقيرة

في المغربية ممكن تقعد على الكنبة و تفرد رجلك و في ايدك كوب النسكافية و تمسك ريموت الريسيفر عشان تجيب قناة الجزيرة لمجرد احساسك انها من اقوى القنوات من حيث الاداء الاعلامي و يبدء تركيزك مع القناة حينما تاتي اخبار مصر و تسيب كوب النسكافية من ايدك و تنتبه للشاشة و اثناء مشاهدتك تطلع قدامك صورة مصر عاملة كدة


طبعا حضرتك مركز معايا في الدائرة البيضاء اللي في الصورة الدائرة دي مش بتيجي في التليفزيون دة انا اللي عاملها طبعا ابنك او اخوك الصغير قاعد جنبك و اتسجلت في ذهنه الخريطة دي
هترد علية تقولي طب و اية المشكلة اقلك المشكلة ان خريطة مصر الصح هي دي

شفت الدائرة الحمراء اللي في الصورة الثانية طبعا في فرق كبير

يا خبر ابيض دة في فرق فعلا
ايوة في فرق و فرق كبير اسمه حلايب و شلاتين
او ما يعرف بمثلث حلايب و شلاتين و دي منطقة مساحتها 20,580 كم2 هي حلايب وأبو رماد وشلاتين
المنطقة دي عليها خلاف كبير جدا بين مصر و السودان و لكن رسميا و على ارض الواقع هي اراضي مصرية و على هذا ياريت كل اللي يقدر يوصل فكرة لحد ما يعرفش يبقى عمل جميل فبلده لما يفهمه الفرق الكبير

اما عن قناة الجزيرة فعذرا لن تتركي في عقولنا ما قد يشوه عقولنا او ذاكرتنا فنحن نعرف حدود اراضينا جيدا

عاشت مصر

April 11, 2011

تهافت الكلمات في لسان القيادات

خرج علينا السيد الرئيس السابق محمد حسني مبارك بتسجيل صوتي يوم العاشر من ابريل 2011
اي بعد تنحية بــ 59 يوما
ليهافت قليل من العبارات التي حاولت تحليلها مراراً و تكراراً
كان اولها اعترافه بتخلية عن منصب رئيس الجمهورية و هو امراً كان هاما لاني كني اشك في ايمانه بذلك و قد كان جدير بالذكر ان نذكر ان التنحي يكون عن ما هو مملوك
اما ثانيها فكان ثقته الكاملة في عدم امتلاكه هو او زوجته اي ارصده او عقارات بالخارج و في حديثة عن الارصده ذكر ابناءه ايضا و تجاهلهم في الحديث عن العقارات مع استعداده التام لاي محاسبة
و قد كان الاهم في خطاب مبارك الصوتي بعض النقاط الغريبة و التي لن استطيع ان امنع نفسي عن الحديث ببعض الفكاهه
1-سيادتك يا ريس طالع بعد التنحي بـ59 يوم كنت فين كل دة
2- اشمعنا طالع بعد فجر السبت اللي انضرب فية المتظاهرين و اللبن اللي كان بين الجيش و الشعب بقى شاي بلبن ................ طالبة معاك تخليها قهموة سادة
3- طالع حضرتك تقول انا برئ و دي معناها حاجة من اتنين اما انك فعلا برئ و دي صعب شوية ان حد يصدقها و انت عارف ان محدش هيصدقها فانت جاي عشان التانية يعني تقول بكل صراحة انا في 77 يوم من اول ايام التظاهرات لحد امبارح عرفت اظبط نفسي و مش هتلاقوا علية اي دليل و الجيش بالمصري الفصيح كان عارف اني بظبط نفسي و تستر علية و ايها الشعب العظيم عنكوا الجيش اللي تستر علية حاسبوا و امسسكوا في خناقه

انا لية عندك يا ريس كلمتين
اولهم : اني كنت بقدرك جدا لحد خطاب الخميس 10 فبراير 2011 و من وقتها التزمت الصمت نحوك فياريت لو لسة ليك عندي نقطه تقدير زيي زي بعض المصريين سيبنا نحتفظ بالنقطة الصغيرة دي
ثانيها : مهما حصل احنا واثقين في سياسة الجيش لحد ما يستلمها رئيس مدني مهما حصل من الجيش و لو جاب برسيم و اتشحطر العلاقة بين الشعب و الجيش هتفضل لبن و قشطة
و قشطة عليك يا ريس
السلام عليكم

April 03, 2011

كلمتين لمصر ------تهافت الاحداث

تعني كلمة التهافت بمعنى التساقط و تعني كلمة تهافت القوم بمعنى تساقطوا امواتا

اما تهافت الاحداث فهو ما نراعه الان في مصرنا على التتابع

معركة الجمل
( بقيادة اعضاء من الحزب الوطني)

غزوة الصناديق
( بقيادة محمد حسين يعقوب )

معركة الاضرحة بقليوب
( معركة السلفيين الاولى )

معركة استاد القاهرة
( بطولة التراس الزمالك )

عمار يا مصر
و اللهم اكفنا شر تهافت الاحداث علينا

February 26, 2011

تهافت في ثورة 25 يناير 1 : نار تحت الرماد

ان الحمد لله و الشكر لله اني قدرت اكتب تاني
مع اول بوست احب اسجل ان بساطة النظام السابق و ما قبل ثورة يناير قالها و ليس بصريح العبارة لا تكتب و لذلك قررت الانقطاع
و الحمد لله دلوقتي برجع عشان اكتب و نتكلم مع بعض و نتناقش و نفكر
و يمكن تكون بعض الناس حولية بيكتبوا بتهافت لذلك انا هكتب
تهافت التهافت
و من هنا
بسم الله الرحمن الرحيم
منذ عام 2005 و منذ ان بدأت ادارة الرئيس السابق جورج بوش بالضغط على القيادة المصرية بتسيير جزء من الديموقراطية و بدأ النظم المصري حينها في السماح بظهور بعض الحركات المعارضة و كان من اهم تلك الحركات هي حركة كفاية




و منذ ذلك الحين انتشرت الرغبة في التحرر و التعبير عن الرأي بين فئات المجتمع و ظهرت المدونات التي اقتحمها الشباب المصري بقوة و كانت لغة للتواصل و التعبير عن الراي بعد ان كانت المجموعات البريدية مغلقة على نفسها و على مستوى الشارع لم يكن مسيطر على الشارع المصري سوى الحزب الوطني الديموقراطي و جماعة الاخوان المسلمين و من المدونات و مع ظهور موقع الفيس بوك الشهير بدأت الحياة الاجتماعية المصرية الشبابية في التواصل بحرية خاصة مع البعد الشديد للنظام المصري عن الثورة التكنولوجية كانت كل هذه الامكانات تتضافر فلا تنتج سوى بعذ المظاهرات المحدودة بمنطقة وسط البلد و نقابة المحامين و نقابة الصحفيين
حتى عام 2008 و مع بدايات هذا العام انتشرت الاحتجاجات الفئوية و التي تطالب بحقوق الفئات الفقيرة من العمال و الموظفين و الفلاحين و مع كل هذا كان رد النظام ضعيفاً جدا لايبالي بما يحدث حوله يستضعف كل ما يواجهه جاهز لاسقاط معارضة بالضاربة القاضية في اي وقت
و كل تلك الفترة كان النظام يقضي بكل بساطة على الزعماء من معارضية و ظهرت حركات احتجاجية عدة منها حركة 6 أبريل و حركة القضاة و مؤخرا مجموعة كلنا خالد سعيد .
خالد سعيد هذا الشاب المصري الذي قتله الامن المصري لمحاولة كشفه عن قضية فساد بالشرطة

وعلى هذا بدات جموع المصريين في الاحساس بكم الغيظ و الكبت داخلهم و لكنهم لم يكونوا على دراية بما يمكن ان يفعلون

حتى كانت نهايات عام 2010: انتخابات مجلس الشعب الانتخابات و اللي اكتسحها الحزب الوطني باغلبية ساحقة و تزوير معلن و محسوس اسفرت الانتخابات على اعتراضات قوية كان اهمها انسحاب حزب الوفد و الاخوان من الانتخابات و تكوين بعض الساسة المعروفين لما يسمى بمجلس الشعب الموازي و هكذا تكونت النار تحت الرماد في انتظار ان تخرج النار للنور
و الي الللقاء في تحليلات قادمة

October 05, 2008

السلام عليكم

بقالي كتير اوي مكتبتش على المدونة
و بقالي كتير اوي سايب مصي للنهاية
يمكن و لاني بعد طول تفكير قررت اني احاول ابعد عن البوستات السياسية مهما كان
و عن احوال البلد
و عن حتى الشعر الوطني
مش عايز اكلم في حاجة تخص السياسة دلوقتي و لا الفترة الجاية
لية و عشان اية لازم هقول في يوم من الايام
لكن برضة مش هبطل كتابة اوي هتلقوني بكتب على مدونة اتعلم اتنور
عشان نكمل مشوار بداناه سوا
و هسيب كمان الاغنية على خلفية المدونة تعبر عن كل لحظة كنت عايز اتكلم فيها و مش عايز
و نتابع مع بعض لى اتعلم اتنور


------------------------
مع تحياتي
شمس الزناتي