My Visitors If you cann't read arabic you can know how I think you can visit this link

December 29, 2007

تاني موضوع كليب وائل عباس

بالنسبة يا جماعة للبوست السابق

انا عايز انوه عن شوية حاجات منها تعليق الاستاذ / احمد حلمي المحامي اللي عمل مداخلة في البرنامج و انا هعرضة و نركز فية شوية

شكرا يا حاج شمس .. حلوة مش مسيس دى !! شوفوا يا اخونا انا مكنتش مقرر اننى اعمل مداخلة لكن لما لقيت البرنامج ماشى فى سكة ادانة وائل لقيت انه من المهم انى ابدأ عمل خطوط دفاع لانى من زمان متوقع ان ده يحصل مع وائل .. اللى عملته طريقة محامين علشان كده ممكن تلاقى محسن بهنسى فهم انا باعمل ايه وماعلقش على كلامى .. لا يمكن الدفاع عن وائل بكلام مرسل أو الاصرار على ان الكليب لضابط شرطة .. لكن لما شوفت بداية الحلقة افتكرت قضية هويدا وطه وانا محاميها وعارف كويس ازاى رسموا لها كمين وفخ وحسيت ان وائل على وشك الوقوع فى نفس الفخ .. ممكن جدا وائل يرجع من الاستديوا يغير كلمة ضابط اللى على المدونة وساعتها مش حايبقى فيه تهمة الاساءة لهيئة الشرطة لكن شريط الحلقة يدينه .. لذلك قررت انى اتدخل علشان اركز على حسن نية وائل مستفيد من البلاغ الى قدمه محسن .. فاذا صدقى احساسى واتعملت قضية يبقى شريط الحلقة لنا ولهم فى نفس الوقت .. لذلك تلاقينى اتكلمت كتير عن موقف الداخلية واحمد ضياء والكليبات السابقة . عايز بس انبه لشىء مهم فعلا شغل تفكيرى قبل ما اطلع على الهوا .. لما اتصلت طبعا اخدت وقت على ما الخط لقط .. لكن اللى خلانى اشك أن موظفة القناة لما قلت لها عايز اعمل مداخلة اصرت انها تعرف انا حاقول ايه ولما حاولت ارواغ معها سالتنى صراحة يعنى انت مع الكليب ولا ضده وبعدها قالت لى هات رقم تليفونك وحانكلمك وواضح انهم اتناقشوا وبعدين اتصلوا بيا بعدها بمفيش دقيقتين .. الموقف ده فكرنى بموضوع هالة سرحان وحسسنى انهم بيحضروا حلقة معينة وعايزين مداخلات محددة .. وقتها كنت بافكر لو دافعت عن وائل حايبقى مجرد كلام مرسل ملوش لزوم .. واحساسى بوجود فخ لوائل خلانى افكر بطريقة المحامى ازاى اثبت حسن نيته بحيث لو طلع الكليب مش صحيح نتمسك بحسن النية بعد كده .. علشان كده اديت اشارة لمحسن بهنسى اول المكالمة واعتقد انه فهمها علشان كده مادخلش فى الحوار معايا .فهمت يا أحمد يا جيزاوى احنا كنا نقصد ايه .. علشان ما تتعجبش ليه ما دفعتش عن وائل .. أما موضوع الكليب ففعلا وائل اتسرع شوية فيه وكان الافضل نشره بدون تفاصيل .. يعنى نقول واقعة تعذيب جديدة بدون ما نقول كلمة ضابط والناس فاهمة لكن محدش يمسك عليك حاجة .. انا ماعرفتش اسمع الصوت كويس على مدونة وائل لكن سمعته فى البرنامج وفوجئت ان فيه عبارات تقتطع بانه مش كليب تعذيب مش عارف فاتت على وائل ازاى .. يعنى الحوار اللى بينهم ما ينفعش لواحدة بتتمسك من ضابط اداب .. وكلمة هس وطوا الصوت توضح انهم مجموعة شباب فى شقة ومش عايزين الجيران يسمعوا .. الولد بتاع باى باى لا مرشد ولا مخبر هو المرشد بيعمل باى باى والشرطة بتصور ثم المرشد بيختفى وقت الضبط لانه مفروض فيه يكون سرى مش بيطلع يعمل باى باى والولد شكله ما يجبش غير شباب واخدين بنت من اياهم والغالب حصل بينهم مشكلة . وارجوا ملاحظة أن مش كل ضرب اسمه تعذيب ووفقا للقانون اذا ماكنش الراجل ده ضابط مش حايبقى فيه قضية تعذيب خالص لان التعذيب فى القانون اما اجبار على الاعتراف أو استعمال قسوة والاتنين لازم فيهم صفة الموظف العام . هى دى المشكلة الى عندنا فى الكليب ده .. ولذلك محتاجين نعمل دفنس سريع اى دفاع استعدادا لاى مشاكل ونحاول بكل الطرق نجيب اى معلومات عن اشخاص الكليب . وربنا يستر وما يبقاش لقائنا القادم فى التجمع الخامس !!!أحمد حلمى المحامى

بعد الكلام دة يا جماعة و بعد كمان ما وصلني الكليب وصلتني تعليقات مهمة برضة كان لازم اعرضها عليكم احداها كان من المدون الجميل نوشة و كان على لسانة

إن وائل عباس أتخدع والكليب ده ولا كليب تعذيب ولا حاجة وملهوش أي علاقة بالشرطة من الأساس وأنا مش عارف إزاي حاجة زي دي واضحة زي الشمس تعدي على مدون كبير زي وائل عباس وفيه دلائل كتير تأكد الكلام ده ولو حد أتفرج على الكليب لآخره هيقدر إنه يقرر بنفسه إن كلامي صح ومنها :ـــ
** لو ده كليب تعذيب فعلاً وحقيقي يبقى المفروض يبقى فيه ولو حتى عسكري أو أمين شرطة .......... مش أربع شباب كاجوال وواقفين بيتفرجوا وبيضحكوا
** فيه واحد طلع قبل لما الكليب يخلص أدام الكاميرا وقعد يتنطط ويسقف لا ... ومربي شعره كمان ............ هو ده شغل حكومة يا عم أنت ............ ده شغل عيال سيس وزبالة
ومن الآخر كده يا عم شمس أنا متأكد تماماً إن الشغل ده مش شغل حكومة ولا هو تعذيب ولا نيلة ... و لو ده شغل مباحث آداب ما هي كده كده هتروح على القسم ويمين أو شمال هتتعرى هناك من هدومها و هتلبس أي قضية يبقى إيه لازمة التصوير و اللي بيعملوه ده

دة يا جماعة كان بعض الاراء اللي جمعتها بالاضافة الي راي شخصي بعد ما شفت الكليب في الاتي
اولا : شكل الولد اللي بيضرب صحيح هو بهيئة ظابط لكن مفيش ظابط في اعتقادي سوالفة طويلة
ثانيا : اللي يركز في الصوت يعرف ان البنت لم يكن عندها اعتراض للخروج الي الشارع عارية و انما الاعتراض على التصوير و دي ضحكتني بصراحة
ثالثاً : لو افترضنا الاشخاص اللي في الكليب مرشدين فشكلهم حديث السن جدا
رابعاً : الشقة محل التصوير متواضعة جدا عن انها تكون شقة دعارة

و بالرغم من ذلك ممكن يكون وائل عباس اتخدع ممكن يكون كمين اتعمل عشانه بس دة ما يمنعش انه وصله حاجة و نشرها لرغبته في البحث عن الحقيقة زي ما كلنا نفسنا حقيقة كل شئ تتضح امامنا
و لذلك فللمرة الثانية اعلن تضامني مع المدون وائل عباس في عدم اتهامة بالترويج لاية اشاعات او اتهامة بتشوية سمعه الامن
و الامر لازال مطروح للنقاش و في انتظار نتيجة تحقيق النائب العام

December 24, 2007

وائل عباس من المحور الي اين ؟

منكم يا جماعة اللي اتفرج على برنامج 90 دقيقة اليوم 24/12/2007 م و طبعا اتفرجنا على وائل عباس صاحب مدونة الوعي المصري اللي عرض كليب كان عنوانه كما هو منقول من مدونتة ضابط يجبر فتاه على خلع ملابسها و اللي اتفرج فيكوا على البرنامج هيلاحظ ملحوظة غريبة ان معتز المذيع بالبرنامج و المتصلين بالبرنامج شبة مقتنعين تماما ان اللي حاول انه يهتك عرض الفتاه ليس ظابط شرطة و لا يمت للشرطة بصله ( طب هو مين ؟؟؟ ) بل و منهم اللي اتهم وائل عباس انه بيحاول انه يسوء سمعة الشرطة قال يعني هي حلوة اوي
السؤال اللي نفسي اعرفة من امتى المشاهدين المصريين بيحبوا الشرطة كدة
إلا اذا كان المفروض علينا نشوف سيناريو مرسوم يظهر فية وائل عباس بدور صاحب الاشاعات المغرضة لنرى بعد ذلك انه من المنطقي ان يعاقب وائل على فعلته
و الغريب هو اصرار المخرج على عرض الصور في مدونه وائل عباس و تجاهل فكرة ان صاحب الفعل الشنيع وصف على انه ظابط شرطة من قبل مرسل الايميل
لم ار وائل عباس في حياتي إلا مرة واحدة و لم تربطنا اي علاقة و لكنة مدون يبحث عن الحق و لزاما عليّ ان اقف الي جانبه في وجة الباطل لاظهار الحق
و ربنا مع النائب العام عشان نشوف اللي كان في الكليب مين
و نم حقنا ان نطالب بالقبض على كل من ظهر في هذا الكليب و عرضهم على الراي العام و محاكمتهم امام القضاء
و اللهم ادلنا على الحق و وفقنا الية

December 20, 2007

في العيد يا مصر

في العيد يا مصر

حمد الله بالسلامة يا عيد
ملقيش معاك خبر جديد
مش جايلي ابدا بخبر سعيد
مليت شكل القضبان و الكلبش الحديد

لو كان شرط علية اضحي
عشان يزول عني جرحي
و الحزن يزول من فوق ملامحي
راح اضحي بقوتي و زرعي و قمحي

على ارضك يا مصر انا مسجون
من غير زنزانة و لا سجان و دة مش جنون
مسجون يا بلدي قدام كل العيون
مسجون يا مصر و ممنوع عني المعون

و في العيد و الناس بتفطر
هصارحك يا مصر و اعبر
حطك في قلبي على قد ما اقدر
بس بلاش من العذاب نكتر

علشانك يا بلدي انا ضحيت
و عذبني بعادك ما بكيت
و بكل جراحك حسيت
انا عاشق في حبك ما مليت

December 13, 2007

للبيع في المزاد

للبيع في المزاد

للبيع للبيع في المزاد
بلد حلوة و جميلة تبقى اجدع البلاد
للبيع بكل رخيص حقوق العباد
للبيع بلد انتشر فيها الفساد

قالوا هتبيع : ثمنها اية
هبعها حتى و لو بجنية
هبعها و متسألش لية
عايز اطفش من وش الباشا و البية

للبيع ابو الهول و التلت اهرام
للبيع شعب شادد على بطنة الحزام
للبيع قلوب نسيت الاحلام
للبيع عيون نسيت طعم المنام

للبيع شوارع بقت صندوق قمامة
للبيع جلبابي و الشال و العمامة
و لو بعنا النيل و السد يا له السلامة
اشتروا منى كل حاجة بس سبولي الكرامة

حد شاري احزاب عليها الوقت فات
حد شاري شباب ماتوا و الامل فيهم مات
حد شاري القمر الصناعي بالافلام و الكليبات
حد شاري الفنادق و مارينا و الرقاصات

اشتروها و اشتروا العقول الممسوخة
و خدوا فوق البيع اودية توشكى المدروسة
و فوق البيعة كنافة رمضان و البسبوسة
و الثمن انكوا ترجعولي زمن المحروسة

وحشاني يا مصر و انا فيكي
عايش جواكي مش لاقيكي
انا عايزك اتونس بيكي
اكتبلك روحي و عمري و اعيش ليكي

December 09, 2007

من لم يمت بالتاج

التاج دة يا جماعة اتمررلي من دينا عمر و طبعا انتوا عارفين انا مقدرش ارد حد عشان كدة هجاوب
نبدأ
كنت طالب شاطر في المدرسة؟
امال انا طالع مهندس بالوسطة ، الحمد لله كنت طالب متفوق كمان
ايه كانت أحب مادة ليك في المدرسة و الكلية؟
و الله احب مادة في المدرسة كانت الهندسة و التاريخ
اما في الكلية انا مش فاكر درست اية اساسا
أكره مادة ليك في المدرسة و الكلية؟
طبعا كنت بكرة الانجليزي جدا بلا شك اما في الكلية بقلك مش فاكر انا درست اية مش عايز احراج اكتر من كدة
كنت عايز تطلع ايه و انت صغير؟
و الله كان نفسي اطلع مهندس و اديني طلعت و هو دة كان حلمي كنت محتار بين هندسة طيران و هندسة نووية و الحمد لله دخلت هندسة طيران
أغرب حاجة اتمنيتها هي إني ابقى؟
بيني و بينك و متقلش لحد رئيس جمهورية بس دة بعيني طبعا
اسم مدونتك؟
مصري للنهاية
ولماذا اخترته؟
عشان انا من يوم ما اتولدت فخور بمصريتي و هفضل مصري بمعني الكلمة لاخر يوم في عمري
هل فكرت في اغلاق مدونتك؟ و السبب
فكرت في يوم من الايام لما حسيت ان مفيش فايدة و رجعت عن تفكيري
صورتك فى المدونة رمزيتها؟
الصقر اللي على جنب دة بحس انه شابهي يعني حاول تقرا عن الصقور تعرف ان فيها شبه مني
أحلى جملة قيلت لك في وصف مدونتك؟
و الله ناس كتير قالت كلام جميل زيهم بس كانت اجمل كلمة من مدونة
وحدانية وصفتني باني فارس الصقور و انا حابب اللقب دة
التعليقات بالنسبة لك. أهميتها؟
من غير التعليقات هكتب لمين ، لازم احس ان في حد بيسمعني
ما احلى بوست كتبته ضع اللينك واذكر لماذا؟
و الله بجد كل بوست بحس انه حلو بس انا فخور بالبوست
بحبك يا صاحبي حاسس اني بهدية لكل قارئ و لكل صديق و صاحب
احلى مدونة قريتها؟
كتير اوي لما هتشوف انا همرر التاج لمين هتلاقي ان كل دول بحبهم
اسمى؟
كل دة و بتسأل على العموم شمس الزناتي
اسم الدلع المشهوره بيه وسط اصحابى؟
هو مش دلع اوي و انا هقوله بس يارب محد يعلق و يقول مغرور بس فية اللي بيقلي الزعيم
مجال دراستى؟
هندسة الطيران و الحمد لله و ياريتني ما درستها على الاقل كنت لقيت شغل في مجال تاني
شخصيتك نوعها ايه؟
ستة سلندر دفع امامي و خلفي
ههههههههههههههههههههه
بص هو انا برج العقرب اقرا عن برج العقرب تلاقيني
مودك ايه؟
عادة مهرج عشان مش بحب النكد و ممكن برضة تلاقيني كتله كأبة حسب الوقت
بتعمل ايه فى وقت فراغك؟
زي ما انت شايف قاعد اجاوب على التاج
الاكلة المفضه؟
المكرونة بالبشاميل
ماما بتعملها حلوة جدا
السفر بالنسبه لك؟
التعرف على كل ما هو جديد
صفات اخدتها من بابا؟
الكرم و طيبة القلب و الغموض
صفات اخدتها من ماما؟
الحذر و اللباقة و الثقة بالنفس
اكتر 6 حاجات بكرهها؟
الكدب
الخيانه
العنف
اللماضة
الخبث
الخبص
الشغل بالنسبه لك؟
حياتي اللي مش لاقيها و مش هزود مش عايز اعيط
الكمبيوتر والنت بالنسبالك؟
حياتي دلوقتي
تمرر التاج لمين؟
خد عندك و انا في التمرير ما بتوصاش
مجموعة الفاجومي كلها
ثم
و طبعا مش هنسى حبيب قلبي نوشة دة انا سايبه للاخر عشان ما يقولش ما شفتش
و طبعا اي حد عايز يخدة يتفضل

December 02, 2007

نسيانك يا اميرتي

نسيانك يا اميرتي

يا اميرة ملئت كوني بالبهاء
يا حبيبة حملت قلبي للصفاء
يا ملكة حكمت على قلبي بالجفاء
اجيبي ندائي يا اميرتي الصماء

حلمت بعينيكي في كل مكان
رسمتك بقلبي برغم كل الاحزان
و تمر بي الايام و الازمان
لادرك انه لا مفر غير النسيان

اميرتي لقد رئيتك مضيئة كالقمر
تترجلي فتناجيك اوراق الشجر
و لكني لست سوى بشر
لا ارقى للوصول للقمر

انا فارس الفقر له صفة و حال
لي كتف لا يحمل الا الاهوال
و طريق هو رمز للمحال
كيف اعشق من هي رمز للجمال

سامحيني فقد احببتك و سوف انساك
و لو انك لا تعلمي اني اهواك
و ما كان لقلبي حياة لولاك
و لا زالت روحي فداك

اعذريني فلا حل لضيق ذات اليد
و الدرب بيني و بينك ملئ بالف سد
انتي ملكة للامس و اليوم و الغد
و انا فارس و الفارس مملوك و عبد

لا نتظري الي قلبي فالقلب موجوع
و قطرات الماء على وجهي دموع
اميرتي ليس عن الصمت رجوع
و اظل احبك سرا في خشوع

November 28, 2007

هنتحرك و لا هيسلبونا كل حاجة

الموضوع بكل بساطة انهم كل يوم بيسلبونا كرامتنا و هويتنا

و كرامتنا المصرية و العربية و الاسلامية و الانسانية

بصوا من الاخر مبقاش فاضل لينا حاجة

غير حاجة واحدة اللي فاضلالنا

ان لسة فينا شوية ناس صغيرين لسة عندهم دم و بيحسوا و هم دول اللي لسة بحبهم دول بقى اللي هكلمهم النهاردة

-

-

-

بصوا عشان الموضوع كبير انا هخش في صلب الموضوع

و اسمحولي اطول
عشان لو مش هطول في موضوع زي دة يبقى احسن ما اكتبش

الموضوع ان الرسام لارس فليكس ذاك السافل اللي تطاول على رسول الله محمد ( علية الصلاة و السلام ) بالرسوم المسيئة

بيحضر لعمل مسرحية غنائية عن سيدنا محمد ( ص ) يظهر فيها الرسول عليه الصلاة و السلام يرتدي الجينز و تلعب المسرحية باغني البوب

طبعا انتوا كدة عرفتوا الموضوع و منكوا اللي هيقفل المدونة على كدة

و منكوا اللي هيقول حسبي الله و نعم الوكيل و يمشي

و منكم اللي هيعلق و يمشي

بس انا لسة عندي امل في حد يقول لا
لازم يبقى لينا وقفة و وقفة كبيرة

خاصة اذا علمت ان ايطاليا اصدرت اغطية مراحيض عليها اية الكرسي

هتقلي طب و نعمل اية يا زناتي انا اقلكم

بس ادعى الاول قبل ما اقول اصلي بحب الدعاء دة معلش

اللهم إليك أشكو ضعف قوتي00000 وقلة حيلتي 000000 وهواني على الناس يا أرحم الراحمين 00000000أنت أرحم الراحمينوأنت رب المستضعفينوأنت ربيإلى من تكلني إلى عدو بعيد يتجهمني00000 أم إلى صديق قريب ملكته أمري 000000000إن لم يكن بك غضب علي فلا أبالي 0000000غير أن عافيتك أوسع لي000000أعوذ بنور وجهك الذي أشرقت له الظلمات0000000وصلح عليه أمر الدنيا والآخرة أن ينزل بي غضبك أو يحل بي سخطك00000000000ولك العتبى حتى ترضىولا حول ولا قوة إلا بك

طبعا بعد نقاش طويل مع مدونون عدة رجعنا بشوية حلول من اهمها

1- مقاطعة جميع البضائع الدنماركية

2- و دة كان حل مقترح من الجيزاوي اللجوء الي حوار الاديان و مهاجمتهم و توضيح فكرة تحريف الانجيل

و طبعا اعذروني اني بقترح الاتي

1- تأييد الاقتراحات السابقة

2- عندنا مدونة تسمى إلا رسولي و الادمن بتاعها اسكندراني اوي ياريت انا بدعو الجميع للاشتراك فيها

3- عندنا مدونة


ياريت كل اللي ثقافتة الانجليزية كويسة يشارك فيها الادمن بتاعها المدون انسان

او مدونة


الادمن بتاعها هقلكوا علية اول ما اعرفه او حد من محرريها هيعلق و يقلنا ياريت يا جماعة نهتم بالمدونات دي و نعملها دعاية

4- ياريت يا جماعة نشكل لجنة من المدونين ترد و توضح الاسلام في المنتديات و المدونات الاجنبية و المواقع الاجنبية عشان نوصلهم الفكر الصحيح عن الاسلام استكمالا لتجربة الاستاذ / عمرو خالد اللي بدأها في الدنمارك

5- ياريت بقى اللي ما يقدرش يعمل حاجة من اللي فات ينشر دعوتنا دى يمكن حد غيرة يعمل او يعلق البانر اللي انا علقته دة هو مفيهوش اي فن بس انا من كتر مضايقتي عملته بسرعة

طبعا مش هقول الا اني في مدونين كتير و ناس كتير مش هتخسر حاجة لو شاركت في دعوتنا دي بكلمة

November 21, 2007

لا شئ

اخواني الاعزاء و قرائي الاجلاء كم افتقدتكم كثيرا و افتقدت مدونتي التي اعشقها بشدة
و لكني و لفترة طويلة ترددت كثيرا ماذا اكتب و عن ماذا ؟
فلا يوجد شئ
نعم انه لا شئ
و ليس معني ذلك ان كل ما يحيط بنا جميل إلا انه يمكن ان يكون العكس
فلو كانت الاحتمالات تدور حول ان كل ما يحيط بنا لا يشوبه شئ من الجمال فاننا سوف نصل الي نفس النتيجة انه لا شئ يستحق الذكر
إلا ان مأساه كفر العلو لا تعتبر الاولي و لا اتوقع ان تكون الاخيرة لذا فقد عدت و سألت نفسي سؤالا طالما استطعت الاجابة علية لما فتحت هذه المدونة ؟
و لما فتح غيري مدوناتهم ؟
و اكتشفت انه مهما كانت الاجابة فهي غير مقنعة
و لاني متعلق بهذه المدونه بشده كما تعلقت بكم كثيرا فكان لازاما علي ان اجد اجابة مفيدة لهذا السؤال و الاسئلة كثيرة مماثله لكل الناشطين و المدونين
لماذا نكتب و لماذا نستمر في هذا ؟
-
-
-
-
لا توجد اجابه مقنعة سوى واحدة
لازال رغم كل ما يجري حولنا و يدفعنا لليأس
الا انه هناك شعاع خافت من النور يظهر وسط الظلام ليعترف انه يوجد امل للغد
نعم نصف الكوب الممتلئ لازال ممتلئ بمدونين احرار اعرفهم جيدا لا يعرفون تفاهات الاختلاف بينهم طعماً
لا يعرفون للاشاعات مجالاً
يؤمنون بتقبل الاخر و تفهمه و استيعابه
ايناس و اخوة تعلمت منهم الكثير
و لعل القارئ لازال يتسائل لما اكتب هذا البوست
لاجيب
-
-
-
لا شئ لا شئ
مجرد الامل في ان تبقى المدونة موجودة
مجرد الامل في ان يبقى المدد في القلم
مجرد الامل في شمس تظهر بعض الغيوم
و يبقى سؤالي لك هل لديك نفس الامل ؟
و سؤال اخر اثقل عليك به لكنه يحيرني
من منكم لازال مصري للنهاية ؟

November 14, 2007

قلب اراد الحب

قلب اراد الحب

احتار العقل و القلب في امرا
لماذا اكتب الكلم شعرا
و لما ارضى بالصمت قدرا
ايعيش الحزن بقلبي عمرا

ايظل قلبي مقيدا مسجون
و ابقى انا سجان للشجون
و ترقب ضعفي العيون
و امضي اسئل عني و من اكون

صالح انت يا قلبي ام فاسد
اظنني فارس للقوم و قائد
فيرهقني قلبي و يقف لي معاند
يدعوني ان اظهر بين الذئاب مارد

و كيف لي و قد خلقت محبا للحياة
كيف اخفى وجهي و استعير وجه الجناة
و لي قلب طيب يعيش صباه
و لي رب اعشقة و لا انساه

يا قوم اني لكم مشتاق
احبكم في الله دون نفاق
ابتاع قلب في الحب نور براق
اكتب عقد للحب فيه عهد و ميثاق

November 09, 2007

بحبك يا صاحبي

بحبك يا صاحبي

بحبك يا صاحبي يا غالي علية يا اعز الصحاب
بحبك لشخصك
بحبك و حبي دة من غير حساب
بحبك و حبي حنين و اغتراب

بحبك و عارف اثار الزمن
يفرق و يبعد من غير ثمن
بحبك و عارف انك صديق
في زمن غريب لا يأتمن

بحبك و عارف بينا اختلاف
بحبك و من حبك بخاف
بحبك و حبي نقاء و احترام
بحبك و سجل علية اعتراف

بحبك يا صاحبي و خايف عليك
و خايف علية اضيع من اديك
بحبك و عارف بتغلط و بغلط
و عشان ما نغلط انا ايدي في اديك

November 03, 2007

الي متى السكات

الي متى السكات


و تدور في بينهم الهمسات
تتبادل هذه الأعين لمحات
لتنظر الي قلب جريح في ثبات
متسائلين حائرين الي متى هذا السكات

ألا ترى ظلم و طغيان و فساد
ألا ترى وطن نزيفه في ازدياد
و عبده بين الإيمان و الإلحاد
و أيام تنقلها الظلم و الاستبداد

القلم يعجز أن يكمل السطور
و النفس ترجو برهة لتثور
و العين بين هنا و هناك تدور
و القلب بين الأحزان يعيش وحيدا مكسور

و تدور الهمسات لتبحث في جنون
تتبعها نظرة أمل من كل العيون
تتسائل عن سر ظل ملعون
ايتحول الكلم الي سكون

November 01, 2007

هنقول و نرد تاني و نلخص

ردا على تساؤلات الجميع
من المهتمين بالحملة و اللي بقدملهم الف شكر و امتنان و اعزاز
Emy
Coca
سارة
شاهندة
بطة بكر

بالاضافة للاساتذة اللي متبنين الموضوع على عاتقهم
الاستاذة نوارة
و احمد الجيزاوي
وسواس مصري


انا هحاول اكتب بوست طويل شوية فية ملخص الموضوع باكملة
اولا اللي بيسأل عن البيع و الشرا و الكلام دة
احنا لا نملك عشان نبيع
تقلي مش فاهم نوضح اكتر يعني بالمعني الاصح احنا لا نملك حق الملكية الفكرية لاستخدام اسم الاقصر
و لذلك لا نملك حق بيعه او وهبه لحد
تمام
امال اية الموضوع
الموضوع ان احنا بنطالب بحقنا في الاقصر لانها اقدم مددينة على الارض من حيث الحضارة يبقى مفروض محدش يقلد الطراز المعماري الفرعوني اللي فيها من غير ما يحصل على اذن مننا
دة المفروض اللي هو ما بيحصلش و المسئولين متهاونين في المطالبة بي
و تهاونا دة وصلنا لاية
وصلنا لان دبي اصبحت تملك حق الملكية الفكرية لتقليد الطراز المعماري لمدينة الاقصر
يعني دبي اللي هي تقليد تملك حق الملكية الفكرية لتقليد التقليد
و احنا يا عيني علينا الاصل العالم كله نسينا
يعني يا جماعة موضوع حملتنا المطالبة بحق مصر الفكري لمدينة الاقصر
حقنا في ان اسم الاقصر الاصل هو اسم مصري
الطراز المعماري لمدينة الاقصر من حيث طريق الكباش او المعابد مصري الاصل يعني اي حد يقلده لازم ياخد موافقة مننا و لازن احنا نستفيد ماديا من هذا التقليد و لازم ما يكنش يسئ لسمعة الحضارة الفرعونية
يارب اكون قدرت الخص اجابة للتسائلات اللي عندكوا و يارب مصر كلها تطالب بالحق دة
يا جماعة دي حق مصر
يعني لا حقي انا و لا حق اخويا و لا حق حد دة حقنا كلنا
اديلكوا بقى تلخيص بالمستندات المتاحة
نص الخطاب الموجه الى زاهي حواس
نص الخطاب الموجه الى زاهي حواس ( الخطاب الثاني
صور المقالات المنشورة 1 ، 2 ، 3 ،4 ،5 ، 6 ، 7 ، 8
الابحاث و الخطابات دي يا جماعة انا نزلتهالكوا على ملفات ورد عشان اللي عايز يحتفظ بيها و الجديد سنوافيكم به
----------------------------
حاجة كدة بقى على الهامش في السريع اني اعلنت انسحابي من مدونة يلا نفضحهم و دة راجع لاسباب شخصية غير راجع ابدا لجروب العمل لان جروب العمل من افضل الشخصيات اللي قابلتها و عرفتها
----------------------
كان معكم شمس الزناتي من امام شاشة الكمبيوتر

October 29, 2007

نقول كمان و اللي مش فاهم يركز

يا جماعة انا هحكي تاني في موضوع الاقصر عشان اللي مش فاهم حجم القضية يركز معايا شوية
و محدش يفتكرني مغرور و عامل نفسي فاهم
بس انا و الله بخاف على البلد دي و بحبها
و عارف ان كل واحد بيقرا كلامي دلوقتي بيحبها جدا
بكل بساطة حضرتك لو قمت الصبح رسمت شخصية كارتونية و كتبت عليها ميكى ماوس
امريكا ترجع عليك بالتعويض
و انا لو قمت الصبح عشان انا مبرمج و عملت برنامج سميتة وندوز
مايكروسفت تبيعني هدومي
دلوقتي اسم الاقصر دة بتاعنا احنا
بتاع المصريين
لما امريكا تطلع و تعمل مدينة اسمها الاقصر لاس فيجاس
يبقى احنا لينا حق في هذه المدينة نتيجة استغلال الاسم
و المصيبة الاكبر لما الاقصر لاس فيجاس دي يبقى بيمارس فيها الدعارة و القمار
يبقى شبهه لكل غريب عن مصر ان الاقصر دي مدينة الفحشاء يعني سمعه تاريخية بايظة عننا
و لما نلاقي زاهي حواس راح وافق على انهم يستخدموا اسم الاقصر فعلا يبقى باع الاسم اللي هو بتاعنا اساسا
يعني احنا خسرنا ماديا و خسرنا تاريخيا و معنويا
اللي مفكر الموضوع تافه
نوارة كانت كاتبة بوست بخطاب مرسل من الدكتور أحمد يحيي محمد جمال الدين راشد
و دة يبقى رئيس قسم الهندسة المعمارية – جامعة المنصورة
بجواب مرسل من سيادته للدكتور نظيف رئيس الوزراء بيطالبه بحقنا راح فين
حقنا في حقوق الملكية الفكرية
اللنكات اهي
و على فكرة يا جماعة الدول المحترمة زي فرنسا رفضت رفضا قاطعا ان دبي تنشأ مدينة و تمثل فيها نسخة من متحف اللوفر
عشان الفرنسين ناس بيخافوا لى بلدهم و تاريخهم
الله اعلم بالمصريين
يعني يا جماعة الموضوع قصره ان احنا اتسرقنا من امريكا و غيراها و في الوقت الحالي بنوافق على السرقة و بنأيدها و سكوتنا هيأيدها اكتر
عشان كدة هصوت تاني و اقول يا جماعة ما نسكتش نطالب بحقنا
فية اقتراحات عديدة اولها
التقدم بشكاوي لمجلس الشعب و مجلس الوزراء
و انا بقترح نثير الموضوع اعلاميا اكتر عشان الشعب كله خارج الشبكة العنكوبوتيه او داخلها يعرف
و على العموم اهم القنوات الاعلامية اللي قدرت احصل عليها اهي
عشان لو حب حد يشارك في الحملة
ايميل الاستاذ خيرى رمضان
ايميل الاستاذ احمد رجب
ايميل الاستاذ مصطفى بكرى
ايميل الاستاذ بلال فضل
ايميل الاستاذ هانى شمس
العاشرة مساء
برنامج 90 دقيقة
جريدة اخبار اليوم
جريدة المصرى اليوم
الاستاذة هبه عمر
عمو حليم
على العموم يا جماعة انا عشان عارف ان المرحلة الجاية منيله
اللي هيبدأ بجد يبقى معانا و عارف ان احنا مصريين بجد و بنحب بلدنا
انا اقسمت القسم دة و هحطة على جنب حالا هيبقى قسم المدونة
اقسم بالله العظيم ان اكون مخلصا
لجمهورية مصر العربية
متمثله في كل مصري محب لوطنه يعيش على ارضها
، و ان ابذل جهدي لرفعتها و الدفاع عنها ضد كل عدو و كل غاصب في الداخل او الخارج
و الله على ما اقول شهيد
-----------------------------
تعديل بسيط
افادتنا الاستاذة الغالية بطة بكر
بايميل و تليفونات الاعلامي عمرو اديب
0127755555
8555338
يلا يا جماعة شغل بقى

October 28, 2007

باعونا خلاص

طبعا انا مش هحكي تاني و لا هيتحرق دمي تاني
و اقول ان د / زاهي حواس اللي ما شاء الله مصري جدا
عشان هو مصري جدا باع حقوق الملكية الفكرية لأسم الاقصر
و عشان مشرحش مش بخل في الشرح بس عشان ميتحرقش دمي
و انا واحد شعري نصه بقى ابيض و اعصابي مبقتش تستحمل حرقة الدم
من الاخر الموضوع هتلاقوه عند نوارة و اللينكات اهي
اللي بستغربله بقى حاجة
ان الامريكان يخطفوا مننا اسم الاقصر غصب و اقتدار
و يعملوا بيه مدينة و يسموها الاقصر لاس فيجاس
المدينة دي تبقى كلها دعارة و قمار
عادي الامريكان ولاد كلب بلطجية و قله الادب مش جديدة عليهم
اني لما اجي في محركات البحث سواء
google
او
yahoo
و اكتب كلمة
luxor
و يطلعلي الاقصر لاس فيجاس مش مشكلة احنا بلد مستضعفة لازم نضرب علي قفانا و ناخد بالجزمة و محدش يعرف عننا حاجة
و حتى حضارتنا تتسرق عشان كدة هنسكت
انما نيجي بمزاجنا و نبيع حقوق الملكية الفكرية بتاعتنا
و يبقى اسم الاقصر دة مش بتاعنا و اي حاجة في الدنيا على اسم الاقصر يبقى اسمها الاقصر لاس فيجاس
طبعا للعلم دي صور من محركات البحث

شفت الجمال و الحلاوة و الطعامة

يعني لما واحد ابن حلال نازل كوكب الارض جديد يسمع عن حاجة اسمها الحضارة المصرية في الاقصر و يخش يدور على الاقصر دة اللي هيظهرله اللي سيادتك شفته

لا و استنى علية بقى لما اوريك موقع الاقصر لاس فيجاس

شفت المزة اللي على الشمال دي

هي دي رمز الحضارة المصرية و هي دي رمز الاقصر و رمز مصر

بتريق طبعا هو احنا ورانا حاجة غير كدة

نصوت و نهلل و نقول يا جدعان حقنا بيضيع

يا ناس احنا بنتباع

يا بشر احنا بنتسرق بنتهلب و لا حياة لمن تنادي
و افضل انا احرق في سجاير على صدري من قهرة قلبي
و بكرة نلاقي اليهود اشتروا الهرم ما هو من دلوقتي في صهاينه بيقولوا احنا اللي بنينا الهرم

بكرة حواس يبعهلهم مش قضية و برضة هنصوت و نهلل و لاجديد

على العموم برضة المرة دي انا مش هيأس يمكن ربنا ينفخ في صورتنا و نقدر نعمل حاجة

انا يا جماعة بقترح حملة للدفاع عن حقنا في اسم الاقصر و اديني ببدء اهو و بقول و ياريت يا جماعة كل الناس تنادي بحقنا ما نسكتش يا جماعة

السكوت هو اللي جايبلنا الكافية

و دي مش سياسة عشان الناس اللي عندها شيزوفرنية و فوبيا الكلام في السياسة دي مش سياسة دة حقك لما الاقصر اسمها اتباع حد جه اداك عشرة جنية

ما علينا نتكلم في المفيد

دي بنرات من تصميمي مقترحة للحملة دي ياريت تقولوا رايكوا فيها






و البانر دة انا لقيته عند نوارة
يمكن اللي فوق ما يعجبش حد
و يارب نعمل حاجة

ياريت يا جماعة نقدر نعمل حاجة و انا بقول تاني ياريت الكل يشارك في الحملة دي على الاقل التاريخ يفتكر ان فية مجموعة من الاحرار حاربوا عشان الحق

--------------------------------

تعديل

دي يا جماعة اخر بانرات تم تصميمها و رفعها


October 21, 2007

عبدك يتذلل

عبدك يتذلل


الهي يا من انت للبشرية خالق
يا من خلقت النبي و العبد و الفاسق
جئتك مكسور مهزوم بالامل عالق
جئتك بقلبي الضعيف في رحمتك واثق

حاط بي ذل من كل جبار و حمل
علموني كيف اكون افاق مفسد لكل عمل
اثقلوني الاحمال بشكل لا يحتمل
علموني ان اقتل كل حلم و امل

مولاي اني اخطئت في كل حد و صوب
و غدرت بكل امنية او امل او حب
و كسرت لكل من بنت حواء قلب
و نسيت ان لكل هذه القلوب رب

الهي جائك من يتباها بشجاعته يخشاك
لا يرضى و لا يقنع برب سواك
يبغى رحمتك و عفوك و رضاك
سئل المظلومين السماح فردوا اسئل مولاك

الهى انا صاحب قلب متروس بالجفاء
لا انا صاحب قلب مجروح ما من شفاء
هل يمكن ان احبك دون استحياء؟
اتأذن لي بحبك بجراة الاحباء

October 15, 2007

تاج كنت هنساه

التاج دة يا جماعة من زمان جاني من
و بصراحة بقى لازم ارد علية
لو قالولك اختارعصر من عصور مصر عشان تعيش فيه تختاراى عصر وفى عهد اى حاكم واشمعنى؟
اختار عصر قطز عشان احارب التتار
او عصر السادات عشان بحبه و عشان كنت احارب في 73
اول اولوية فى حياتك عيلتك ولا شغلك ولا اصحابك؟
كل حاجه في دول ليها اولوية خاصة ما ينفعش نخلط بينهم
ايه اكتر حاجة بتحبها فى رمضان ؟
الزينة و الفرحة و تهاني رمضان و فرحة المسلمين بية و زيادة العبدة في رمضان
اللى بيبوظ الحكام ..نفسهم ولا الشعب ولا الحاشية المقربة؟؟
الثلاثة و الله
بس سكوت الشعب اولا ثم نفاق الحاشية و هو في الاخر
مين اكتر اعلامى مصرى بتحترمه؟؟
أبراهيم عيسى - حمدي قنديل
لو ممكن تشتغل شغلانة تانية غير اللى انت بتشتغلهااو كنت بتشتغلها كنت تتمنى تبقى ايه؟؟
خبير مفرقعات او دكتور مخ و اعصاب او خبير طاقة ذرية
ايه تانى بلد تتمنى تعيش فيها بعد مصر؟؟
بصراحة انا ما ينفعش اسيب مصر
بس لو انت مصر اوي يعني يبقى سوريا
بحب السوريين
اوصف ليا ترتيبات اجمل فرح ممكن تحضره؟؟
يا لهوي دة انت جبت السؤال التمام
مبدئيا زحمة و ناس كتير و رقص و ضحك و اغاني و فرحة و اكل و شرب
و ود و حب
بتراعى كلام الناس والقيل والقال؟ لو اه او لو لا قولى ليه؟
لا انا بعمل اللي يرضى ضميري الناس ما بيعجبهاش حاجة
صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟
هتعامل مع الحياة الجديدة عادي جدا
بس هعمل غية حمام فوق السطح
السعادة هى؟؟
انك تبقى راضي عن نفسك
عندك امل ؟ اسبابك ؟
اكيد عندي امل امال انا عايش لية
لما تحب تهرب من كل شىء بتروح فين؟؟
عليك و على السرير ( جزيرة القطن )
امتى مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟
من عشر دقايق
لما بتعمل عمل خيرى بيكون ايه هو دافعك الاول؟؟
رضا ربنا اولا و اخيرا
بتشرب سجاير؟لو الاجابة اه ايه شعورك لو شفت ست بتشرب سجاير وليه؟
اه بشرب للاسف
و لو شفت ست كدة دي حرية شخصية
بتعرف ايدك اليمين من الشمال ازاى؟
لما باكل الايد اللي باكل بيها هي اليمين
ايه اكتر اله موسيقية بتحبها؟
الكامنجا
فى رأيك ليه الذوق والنخوة اتعدموا؟
عشان مفيش حد بيأيدهم و لا ينادي بيهم
كله بيعلم بعضه النداله و قله الاصل
ايه الحاجة اللى لو حصلتلك تبقى سعيد قوى؟
لو قصدك حاجة بتحصل
يبقى لو شفت عيل صغير بيضحك ببقى سعيد
اما
لو بتسال عن امنية تخليني سعيد
تحرير بيت المقدس و المسجد الاقصى
تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟
و لا كل دة
كفاية الستر و راحة البال
البحر ولا النيل؟
الاتنين طبعا اصل انا طماع
مركب ولا طيارة؟
طياااره عشان لما تعطل اصلحها
ما بفهمش في المراكب
عاقل ولا مجنون؟
مجنون رسمي
بشهادة الخلق كلها
تقرا كتاب ولا تتفرج على فيلم؟
اقرا كتاب
و بعدين اقوم اتفرج على فيلم
مش بقلك طماع
بتمرر التاج لمين
هو مبدئيا انا هبعت البوست دة على جروب الفاجومي
فانا همرره لكل اعضائة اما بقى عن المدونين خد عندك
coca
و كل الناس اللي هتقرا التاج دة

October 09, 2007

إلا ابن عبد الله


بسم الله الرحمن الرحيم

و الصلاة و السلام على اشرف المرسلين


طبعا يا جماعة من يوم ما اعلنا عن كتابة بوست دفاعا عن الرسول علية الصلاة و السلام

سيد الخلق اجمعين

و طبعا لازم اوفي بالوعد

و انا مش عارف هكتب اية

اصل هكتب عن مين و لا اقول اية

و بعد ما اكتب و ادافع و اقابل وجهه الكريم يوم الحشر و يتشفعلي

اقلة اية

يا رسول الله

يا حبيبي و حبيب الله

ماذا اقول و انا لا امل كمن القول شئ

كيف ادافع عنك و قد استضعفوني في البرية

كيف اشترك في الدفاع عنك

و قد نسيك الحكام و السلاطين و الامراء

يا رسول الله ادعو لية و انت امامي و اكون انا المأموم خلفك


اللهم إليك أشكو ضعف قوتي

وقلة حيلتي وهواني على الناس

ياأرحم الراحمين

...أنت أرحم الراحمين

أنت رب المستضعفين وأنت ربي

إلى من تكلني إلى بعيد يتجهمني

أم إلى عدو مكلته إمري؟

...إن لم يكن بك غضب علي فلا أبالي

...ولكن عافيتك هي أوسع لي

...أعوذ بنور وجهك الذي أضاءت له السموات و الأرض

وأشرقت له الظلمات

وصلح عليه أمر الدنيا والأخرة

أن ينزل بي غضبك أو يحل علي سخطك

لك العتبى حتى ترضى

ولاحول ولاقوة إلا بك.

---------------------------------------

يا رسول الله

اترى من يتعدى على سيرتك الكريمة

انه رويبضة لا يتفوه لسانه و لا يصدر من عقله الا كل سبيل الي جهنم و بئس المصير

اللهم سلط عليهم جنودك في الارض يسقوهم نار العذاب و تزلزل الارض من تحت اقدامهم

اللهم انا نبكي على حق رسولك

اللهم انا نحاول الدفاع عنه بما وهبتنا من مقدرة

اللهم انصرنا على اعداءك اعداء الدين و الله الموفق


October 06, 2007

ذكرى منيله......... اه و الله

طباعا النهاردة ما شا الله



عايز اقلكوا كل سنة و انتوا طيبين
اولا لأن النهاردة



فية احتمالية تبقى ليلة القدر



و عشان كدة دة يوم في السنة ناخد بالنا بقى



السبب التاني بقى ان النهاردة ذكرى النصر العظيم



السادس من أكتوبر1973



ذكرى منيلة ..............اه و الله


انا مش بحبط حد و لا حاجة
بس طبعا كله فرحان بنصر اكتوبر و بيتفرج


على فيلم محمود ياسين رصاصة لا تزال في جيبي


و عبرنا و الحمد لله عبرنا و انتصرنا و زغردي يا ام سيد و الف مبروك يا ابو احمد
و عقبال عندكوا جميعا


و طبعا كله نسى قضية الاسرى المصريين


الابطال اللي ماتوا في يونيو 1967


و الاسرى اللي اتقتلوا و اتعذبوا


طبعا هيطلع واحد ثورجي يقلك


مش ناسينهم


طب عملت اية انت بعدم نسيانك و لا حاجة


و على فكرة انا كمان معملتش حاجة
لاني مش عارف اعمل اية عشان الابطال دول؟؟؟؟


احنا قدام عدو ارادتنا الحرة كقراء و كتاب مش بس هي اللي تقدر علية
لازم يا جماعة ما نسكتش عن موضو زي دة و لا نهادن و لا ننسى و لو لحظة


و كمان محتاجين حاجات تانية كتير


لو حد يعرفها يقلنا عليها


بس لحد ما حق الاسرى دة يجي بالنسبة لية


السادس من أكتوبر ذكرى منيلة


خلينا في ليلة القدر احسن


كان معكم من حجرة الاعتكاف


شمس الزناتي


October 01, 2007

معلش بقى استحملوني

معلش بقى يا جماعة الفترة الجاية
ههريكوكوا بوستات و مقالات
و اللي بيحبني هيتابعني و ينصحني و لو شاف رايي صح يأيدني
انا يا جماعة الفترة اللي فاتت لاحظت حاجات كتير اوي من ساعة ما بدأت التدويت لحد
ما شفت و عرفت مدونين و بقت لية اشتراكات في مجموعات
لا حظت اننا كمدونين احرار نحتاج قبل ان نتفق على هدف
ان نجرب الاتفاق على اهداف صغيرة و لو مبادئ و لو حتى جمل مأثورة
الاهم ان نتفق
و اني على ثقة من الله ان هذه الاتفاقات الصغيرة على اهداف صغيرة هي ما ستجمعنا
الي الهدف الاكبر لكل مسلم
و لكل مصري
لذلك سأخذ بنصيحة الاستاذ عمرو خالد و الزم نفسي بواجب عملي
لقد عرضت عدة افكارة في مقالاتي و وجدت مؤيدها
و واقترحت عدة خطوات عملية و وجدت مؤيدها
و وجدت ايضا معارض و ذو فكر اخر لكلا الاثنين
لذلك فاني متطوعا لخلق و تحقيق حلم كل مدون حر
اعرض خطواتي العملية
2-اقترحنا حملة لمساعدة الجهات المسئولة للوصول لكل مهرب للاثار تجدونها هنا في نص الايميل المرسل من قبلي الي مجموعة ابناء مصر و مضمونة الاتي

بسم الله الرحمن الرحيم
( واعتصموا بحبل الله جميعا ولا تفرقوا واذكروا نعمة الله عليكم إذ كنتم أعداء فألف بين قلوبكم فأصبحتم بنعمته إخوانا )
صدق الله العظيم

الاخوة و الاخوات الزملاء و المدونون و الاشقاء
السلام عليكم و رحمه الله و بركاته
هذا توضيح منا لما قد وعدناكم به من خلال عملنا في حملتنا ضد مهربي الاثار و قد كان من افضل الخطط اموضوعة هو تحويل القضية الفردية الي قضية راي عام و ذلك عن طريق احد الدربي
أولا : اما اكتساب استعطاف كل من هو له مصلحة في حماية هذا البلد و اثارها و تحويل جهده للدفاع عن هذه القضية
ثانياً : محاولة البحث و التنقيب عن قضايا مشابهة للوصول الي ملف كامل عن مهربي الاثار لنتمكن من امتلاك سلاحنا الرادع في استقطاب الراي العام و اثارته
لذلك فقد سرنا على الدربين متوازين عن طريق الايحاء اولاً ثم
http://masryforever.blogspot.com/2007/08/blog-post_22.html
http://anameshm3ahom.blogspot.com/2007/08/blog-post_27.html
http://masryforever.blogspot.com/2007/09/blog-post_10.html
http://kalam3eal.blogspot.com/2007/09/blog-post_17.html
http://masryforever.blogspot.com/2007/09/blog-post_21.html

ثم توجية الدعوة للاخرين للانضمام الينا ثانياً
هذه هي الخطوات التي اتبعت حتى الان في حملتنا ضد تجار الاثار من خلال الشبكة العنكوبوتية و قد اسفرت عن ملامح نجاحات بسيطة و لكنها في تقدم لاستقطاب المهتمين بذات القضية
و من خلال ارض الواقع فقد تم عرض القضية من قبلي على الاستاذة / نوراة نجم كما تم عرضها ايضا بترشيخ من شقيقنا مصطفى الحسيني على الاستاذ / هشام علام الصحفي و قد اكتسبنا تعاطف الاثنين نحو الدفاع عن القضية في حين اعلانها
و اقتراحاتنا للمرحلة القادمة تكون في الاتي
أ - اعلان تأييد مجموعة ابناء مصر للقضية من خلال مقالات الراي
ب - عمل لقاء مع احد الشيوخ بدار الافتاء لأخذ فتوى منه بتحريم التنقيم على الاثار دون معرفة الدولة و ذلك لتفادي الثغرة المقامة لدى جمهور من القراء بان التنقيب على الاثار و التجارة فيها لا يحرمها الاسلام
ج - عمل لقاء مع احد المسئولين للتنوية عن اهمية دور القطع الاثرية تأثيراً على الاقتصاد المصري
د - الاستناد الي الدور الاعلامي في تشجيع نخبة هائلة من الجمهور على ازلة الخوف من صدورهم و مواجهه الفساد ( و ذلك لأن الافواه الصامته من اهم معوقات اي حمله ) مهما كانت في اي تخصص
---------------------------------------------
تلك كانت مقترحاتنا للمرحلة القادمة للعرض عليكم و في انتظار ردودكم و اقترحاتكم

---------------------------------------------
ملحوظة للحبايب اللي بيحبوا يعملوا
repaly all
اميل الاستاذة نوارة في القائمة المرسل لها ذلك الميل و ذلك لثقتي الغتالية بوطنيتها و لأهتمامي باطلاعها على مراحل تطور قضية مهربي الاثار
هذا و سنوافيكم كلما كان يوجد ما يستحق ان نوافيكم به

مصري للنهاية
شمس الزناتي
3- نقترح بصفتي مدون مسلم و بعد الاستئذان من اسكندراني اوي الي الاشتراك في مدونة إلا رسولي لكل المدونين
و لغدا بعد ان اخذ نصائحك من تعليقاتكم لنا لقاء اخر
------------------------------------------------------------------------------------
تعديل بسيط
تم افتتاح مدونة هنعمل حاجة

September 21, 2007

و بدأنا نحارب علني


معلش بقى يا جماعة انتوا عارفين ان النشاط في رمضان بيبقى محدود



و كمان حتى انا شايف ان الناس اللي بتعلق في كل المدونات قليله و مفيش اهتمام بالنت في رمضان



بس بيني و بينكوا انا كنت ناويت اكتب البوست دة من فترة و انتوا اللي شجعتوني اكتبه بعد الكليب



لما لقيت المدون






بيقول ما انا كنت بشوف تجار الاثار في عين شمس و اعرف عنهم كتير






لما قال ههجمهم لو سنحت الفرصة



لذلك فقد فتحنا باب التطوع للجهاد كدة علني على المدونة احنا بيهمنا



احنا فتحنا باب التطوع لتكوين كتيبة من المدونين لمحاربة تجار الاثار



منها تقدر تحارب تجار الاثار و تقول اللي انت عايزة لو تعرف اي معلومات عنهم



لو ممكن توصل صوتنا لاي حد يقف جنبنا و يساعدنا المهم انك تقدر تشارك في الحرب دي



و تقدر تدافع عن حقوقك اللي بتتنهب



مبدئيا



دة اميلي على هوت ميل



aerospace_m_e@hotmail.com
اي حد يحب يتطوع للمشاركة في الحرب يتفضل



و بسم الله الرحمن الرحيم



" اذن للذين يقاتلون بانهم ظلموا و ان الله على نصرهم لقدير اللذين اخرجوا من ديارهم بغير حق إلا ان يقولوا ربنا الله "



صدق الله العظيم



على العموم يا جماعة انا عايز اقول برضة



ان المدونة الرائعة






بدأت تقدملنا الدعم الاول



و عملتلنا البانرات دي و البانر اللي في اول البوست



اللي عايز يحطها عنده في مدونته يتفضل



و بكدة اقلكوا ان باذن الله دي اول بوستات حربنا العلنية على تجار الاثار