My Visitors If you cann't read arabic you can know how I think you can visit this link

July 29, 2007

لما حلمت

لما حلمت
لما حلمت قالولي الحلم بعيد
و قالولي عايز تروي الارض بدم شهيد
قلت دة حلمي و حلم اخواتي دة حلم مجيد
بحلم ترجع مصر الحلوة بحلم جو الحب يزيد

قلت انا هحلم قالوا الفسده متير و كتير
قلت و ماله مصير صغيرنا يبقى كبير
لو يظلموني و يسرقوني و يقولوا دة لص خطير
دة طريقي و انا الي اخترته و دة المصير

هحلم عشان كل اخ و كل ام و اب
انا عايز شنطة كبيرة مليانه كتير بالحب
اوزع منها و ابعت رسايل لكل قلب
و عايز صحوة قوية ابعتها لكل شاب

و ادوني كمان سيف و رمح و اسهم
عشان ادافع و احمى كل قلب بيحلم
و احار و اقطع ايادي كتير بتظلم
و اعين حاكم لاهلي مع كل قضية يحسم

بحلم ببكرة و بعد بكرة و السنين
بحلم و قلبي حاسس انه حلم المصريين
حلم سهل و مش كبير حلم مليان بالحنين
ما يستاهلش عشانه ابداً اني بكرة اكون سجين

July 27, 2007

قعدة حلوة : الحلقة الاخيرة

بسم الله الرحمن الرحيم
قعدة حلوة
الجزء الأخير
ملحوظة للاطلاع على الحلقات
الاولى :
http://masryforever.blogspot.com/2007/07/blog-post.html
الثانية :
http://masryforever.blogspot.com/2007/07/blog-post_09.html
محمد الذي صال و جال بحديثة و الذي فاق الي وعية ادرك ان عقله الباطن هو الذي كان يتحدث و طاوع صديقاه في استمرار التجول حتى وقفا على النيل
ممدوح : ناخد سجارة تانية كدة على السريع
محمد : على النيل و في الشارع
ممدوح : هو حد شايف حاجة
محمد : على رايك هو حد شايف و لا سامع و لا حاسس
يونس : حلو قوي التحطيم دة كفاية شرب لحد كدة يا ممدوح احسن حد فينا يموت
محمد : لا و هنموت على النيل
ممدوح : و اية الفرق كله موت
محمد : لا
ممدوح : اشمعنا
محمد : انت كدة هتموت على اعظم نهر في العالم
يونس : و لا اغرب نهر في العالم
محمد : مش فاهم
يونس : في نهر في العالم فية كمية مجاري زي النيل
محمد : واضح ان كان كلامك صح الحشيش بيخليك صريح
ممدوح : قوي قوي
محمد : بقلكوا اية صراحة اكتر من كدة هنتحبس تعالوا نتمشى بالعربية
ممدوح : و هنروح فين
يونس : أي حته لف بينا في وسط البلد
ممدوح : ماشي
و اخذوا يتجولوا بالسيارة في الشوارع حتى مرا امام محكمة القضاء العالي
يونس : أي اللي دخلك الشارع دة يا عم دة كله لبش
ممدوح : اديك مخلصتش كلامك و الشارع مسدود
محمد : مسدود لية
يونس : شكلها مظاهرة
ممدوح : هي فعلا كدة نمشي و نخلع و لا نتفرج
يونس : نتفرج
محمد : نمشي بسرعة مش عايز اشوف حاجة
ممدوح: هي طلبت معاك بحزن كدة لية متشلش هم غصب عننا هنتفرج الشارع مقفول
محمد : طب شغل الراديو نسمع حاجة و حاول تعدي من الشارع دة
يونس : خلص دي شكلها مظاهرة جامدة صحفيين و محاميين و امن مركزي و داخلية خلص يا عم و شغل الراديو على راي محمد مش طالبة سماع هتافات و اقفلوا الزجاج كمان
و عبروا الاصدقاء الشارع بسيارتهم و هم يشاهدوا ما يحدث في الشارع على نغمة الراديو باغنية للفنان محمد منير

ما نرضاش يخاصم القمر السما
ما نرضاش تدوس البشر بعضها
ما نرضاش يموت جوه قلبي ندا
ما نرضاش
تهاجر الجذور أرضها ما نرضاش قلبي جوا يغني واجراس تدق لصرخة ميلاد
تموت حته مني


الاجراس بتعلن نهاية بشر من العباد
دي الحكمة قتلتني و حيتني وخلتني أغوص في قلب السر
قلب الكون
قبل الطوفان ما ييجي خلتني أخاف عليك يا مصرواحكيلك على المكنون
مين العاقل فينا مين المجنون
مين الي مدبوح من الألم
مين اللي ظالم فينا مين مظلوم



مين اللي ما يعرفش غير كلمة نعم
مين اللي محميلك خضار الفلاحين غلابة
مين اللي محميلك عمار عمالك الطيابة
مين اللي ببيع الضمير مين يشتري مين يشتري بيه الدمار
مين هو صاحب المسألة والمشكلة والحكاية والقلم
رأيت كل شيء وتعبت على الحقيقة
قابلت في الطريق عيون كتيرة بريئة
أعرف بشر عرفوني لأ لأ ما عرفونيش
قبلوني وقبلتهم
بمد ايدي لأ طب ليه ما تقبلنيش
لا يهمني اسمك لا يهمني عنوانك لا يهمني لونك ولا ولادك ومكانك



يهمني الانسان ولو ما لوش عنوان
يا ناس يا ناس هي دي الحدوته
حدوته مصرية

و عندها كانت دموع الاصدقاء الثلثة تسيل على الخدود دون قصد او اصتناع ظلت هذه الدموع تسير على خدودهم حتى عبروا الشارع و دموعهم لازالت تنهار حتى بدأ الحديث بينهم بصوت منهزم

محمد : انا عايز اروح
ممدوح : بسرعة كدة
محمد : انا مشروخ
يونس: انا كمان .............هروح
ممدوح : هنزلكوا حالا حاضر
محمد : ااااااااااااااااااااااااااااااااه
و تفرق الثلاثة و انتهت سهرتهم التي بدأت بالضحك الي الدموع و حتى لم يتفقوا على ميعاد للتقابل ثانية
و اتجه محمد لركوب مواصله تستقله الي بيته و منطقته و جلس بجانب السائق و عيناه كانت لازالت بها بعض غرغره الدموع حتى نطق السائق العجوز
السائق : دموع دي يا بني و لا عينك تعبانه
محمد : عايز احاسب نفسي
السائق : لية يا بني دة انت لسة صغير علشان تحاسب نفسك
محمد : انا عملت حاجة غلط النهاردة
السائق : كفاية تعترف بغلطك
محمد : عايز احاسب نفسي
السائق : محدش بيحاسب نفسه لازم اللي يحاسبك حبيبك اللي بيخاف عليك و ينصحك حد ما يرضاش عليك الغلط شخص اكتر من اخوك شخص عايز تكون زية
محمد: و ينفع لو شاب زيي مكافح في الدنيا راضي بالظلم و الفقر و بيقول الحمد لله و مش بيغلط
السائق : هو دة اللي ينفع يا بني بس احنا وصلنا
و سمع محمد كلام السائق و لم يذهب الي بيته بينما ذهب الي بيت صديقة التهامي لينادي علية و يطالبه بالنزول ليقابله في الحال ليستمع الية و لبى التهامي النداء و تلاقيا
التهامي : اية اللي مسهرك لغاية دلوقتي و تنزلني في الوقت دة قلقتني
محمد : انا شربت حشيش
التهامي : انت بتقول اية
محمد : شربت حشيش
التهامي : لية؟
محمد : و لية لأ
التهامي : و لية ايوة
محمد: عشان انسى و متقلش انسى اية عشان انت عارف و بلاش انسى سبني اهرب
التهامي : تهرب من مشكلتك
محمد : مشكلتي قول مشكلة جيل و مشكلة لية قول مشاكل جيل عايزني اواجه مشاكل جيل لوحدي طب لية
التهامي : عشان انت مش جبان
محمد : الشجعان اضربوا و اتهانوا و اتحبسوا و اعتقلوا عايزني اتهان عايزني اتحبس
التهامي : ما انا في نفس ظروفك عاطل فقير مظلوم و شايف الظلم
محمد : و عملت اية يا اللي شايف الظلم
التهامي : ما شربتش مخدرات
محمد : احنا بهرب من المشكلة يا تهامي
التهامي : خلى الناس كلها تهرب و المشاكل تكبر صح
محمد : اديني حاجة واحدة تقويني على مواجهه المشاكل و انا اواجة
عندها سكت التهامي و لم يكن يحضر ردا لهذا السؤال حتى فاجئة اذان الفجر فرد قائلا
التهامي : متهيئلي في طريق ممكن تمشي فية
محمد : (و قد نظر الية مشتاق لمعرفة الاجابة )
التهامي : اية رايك تطلع تاخد حمامك و نصلي الفجر حاضر تفتكر ربنا هيسبنا و احنا متوكلين عليه
محمد : تهامي موبيلك فية رصيد
التهامي : يعني بس لية
محمد : عايزك تبعت رسالة لكل شاب في مصر يجي و يقابلنا في صلاة الفجر و يصلي معانا

July 26, 2007

واجب و لازم يتقال

بصراحة يا جماعة الواجب دة انا كان لازم اعملة من زمان لاصدقائي المدونين بس اتأخرت و ياريت يسامحوني لأني والله كنت مشغول جدا جدا
سامحتوني ابدأ اقول يعني
محدش ياخذني على الترتيب انا اللي بيجي في دماغي بكتبة
Thoughts مبدئياً لازم نبارك لباكينام
على النجاح و اقولها الف مبروك و عقبال كل النجحات في حياتك ان شاء الله
و نهني كمان مريام تخاريف من المعادي على النجاح و يارب كل المدونين و المدونات يفضلوا ناجحين على طول
منى وحدانية الف مبروك النجاح واضح ان التدوين يا جماعة بالنسبة للطلبة حاجة مفيدة كمان عايزين نقولها يارب رحلة المصيف تكون سعيدة و قرائها مستنين القلم الرائع و نقولها كمان الف سلامة و ان شاء الله تقومي لنا بالسلامة
استاذتي اللي انا تلميذها نوارة زعيمة جبهة التهييس الشعبية قلقانه على المدونة قوي احسن تتقفل عايز اقلها ممكن يكون الموقف طبيعي من ادارة بلوج سبوت ما تخديش الموضوع على محمل سياسي و حتى لو المدونة اتقفلت هنستناكي تكتبي تاني و مش هبطل نقرالك على اي مدونة
الاستاذ منذر و القاسم و ابن ناصر ثلاثة من اجمل المدونون بقلهم الف الف مبروك على ملتقي المناضلون و عايز اقلكوا ان مصر كلها بتناضل عشان مصر
و اخيرا و ليس اخرا بشكر الكمبيوتر بتاعي انه سابني اكمل البوست و مهنجش و الحمد لله

July 17, 2007

الجيزاوي خرج

و الله الحكومة بتاعتنا بنت حلال و طيبة و اميرة
و عـــــــــــــــــاشــــــــــــت الحكـــــــــــــومة
خرجت الجيزاوي و اديتوا افراج
الف مبروك يا احمد
و بصراحة انا احب اشكر الحكومة عشان لما عرفت اني نفسي اتسدت عن الكتابة قامت مخرجة الجيزاوي على طول عشان ارجع اكتب تاني
الف شكر يا حكومة

July 15, 2007

ما ليش نفس اكتب

بصراحة يا جماعة انا كنت بقالي فترة مش راضي ادون مع ان عندي حاجات كتير عايز اكتبها و حاجات كتير عايز اقلها بس قلت ادى فرصة لقعدة حوة عشان التعليقات لكن الصبح النهاردة قلت اتصفح الميل و لقيت اول الرسائل تقابلني بتكشيرة كاسرة للقلوب رسالة من نوارة نجم
محتواها

------------
15 يوليو, 2007
اعتقال معتز عادل واحمد الجيزاوي..يادي النكد اللي ع الصبحع الصبح كده مريم كلمتني وقالت ليان مها سكوت ح نصوت قالت لهاان معتز عادل و احمد الجيزاوي وتم الاتصال بالاستاذ احمد حلمي و الاستاذ احمد سيف الاسلام ابن يسري بيقول لي ان واحد اتقبض عليه من المترو و التاني من الطريق وبينما وفد من منظمة العفش الدولية و وزير العدل الامريكي السابق و مستشار ملكة انجلترا السابق بيحضروا المحاكمةبقية الناس واقفين برة وما سمحوش لمها سكوت ح نصوت انها تدخل الا لما سابت الموبايل والكاميرا برة طيببع د كده لما نحضر محاكم نبقى نصبغ شعرنا اصفر و نحط عدسات زرقا عشان ما حدش يتقبض عليه ولا حد يتحجز في الشارع وما يعرفش يدخل المحاكمة استر يا رب
----------
و تلاها رسالة من
احمد يسري من كلمتين

معتز طلع مع إستمرار إحتجاز الجيزاوى

--------------
بصراحة ايدي وقفت عن الكتابة مش عارف لية بس حسيت احنا نكتب لية و لمين لما كل اللي بيحاول يقول كلمة الحق بيتخرس طب نكتب لية
البلد حالها ما بيتغيرش و الشرفا بيقلوا مش بيزيدوا
و ما شاء الله بيقلوا في اتجاهين
اما شريف يتحول الي طاغية نظرا للظروف الاجتماعية و اقتدائاً باقرانه
اما شريف مناضل يصبح مسالم سلبي خوفا على نفسه
يمكن بصيص النور اللي بقول اني شايفة اقدر اقول انه بيقل
و اللي شايل همه دلوقتي لو ربنا رزقني بابن و كبر و سألني
كنت فين و البلد حالها بيسوء عملت اية اقوله اية ؟
اجوبة باية
و حجتي هتبقى اية
اكيد هيتهمني بالجبن او التخاذل
ياريت كان معايا كاميرا فيديو بتسجل كل حاجة بدقة عشان اقول للتاريخ ان الشرفاء الموجودين دلوقتي مش جبناء و لا متخاذلين
بس ما باليد حيلة
عشان كدة مفيش فايدة اني اكتب




July 09, 2007

قعدة حلوة : الحلقة الثانية

بسم الله الرحمن الرحيم
قعدة حلوة

الحلقـــــــــــــــــــــــــة الثانيـــــــــــــــــــــــــة

محمد و يونس و ممدوح الذين اتفقوا على اللقاء تلاقوا عند مغرب الشمس في شارع من ارقى احياء القاهرة في سيارة ممدوح الفارهه و بمجرد ان تصافحا مع بعضهما و اغلقت عليهم السيارة

ممدوح : نبدأ بقى كدة نتعامل عشان نعرف نشوف الحياة بوشها الحقيقي
محمد : مش فاهم
ممدوح : خش على السيجارة دي بقلب
محمد : دة اية دي
يونس : دة نبات صحي مزروع و مفيد و اجتماعي يسمى الحشيش
محمد : انا اشرب حشيش !!!!!!
ممدرح : جربت قبل كدة
محمد : لا
ممدوح : و اية المانع
محمد : مفيش مانع نجرب
يونس : لعلمك الحشيش دة لو فوائد عديدة
محمد : افدني و سمعني
يونس : اولا لا توجد في الحياة مشاكل و ثانيا بيجعلك صريح جدا و متعرفش تكدب
محمد : صريح جدا انا فعلا محتاج للصراحة دي
ممدوح : اتفضل اشرب
محمد : ( بعد ما يبدأ في الشرب ثم يناولها ليونس ) كمل
و تتناوب سجائر الحشيش عليهم و فجأة

محمد : يا خبر ابيض احنا بشرب في وسط البلد
ممدوح : و اية يعني
محمد : طب و الناس و البوليس و الشرطة
ممدوح : محدش هيشوفك و لو شافك مش هيتكلم
محمد : طب و لو اتكلم
ممدوح : خمسين جنية تخليه يسكت
محمد : يا سلام طب و لو امين شرطة
يونس : يبقى عشرة جنية
ممدوح : يا بني احنا فاهمين الحكومة كويس اسكت انت
و استكمل الاصدقاء طريقهم و هم لا يعرفون الي اين ذاهبون ، التجول بالسيارة هو ما يفعلونه بشوارع القاهرة بالاضافة الي تعاطي الحشيش حتى انهم وصلوا الي حد الثمالة و بدء حديث المساطيل
ممدوح : تعرفوا ان الغنى لوحده مش كفاية
يونس : ازاي بقى
ممدوح : اه مش كفاية لازم تبقى غني و مركز
محمد : يعني مش مكفيك الفلوس عايز كمان النفوذ ما تخدوا البلد كلها احسن
ممدوح : انا مش عايز حاجة هي اللي عايزة
محمد : هي مين
ممدوح : اللي انا حبتها
يونس : انت مش حكيتلنا على الموضوع دة لية قبل كدة
ممدوح: قالتلي بابا عضو مجلس شعب يبقى لازم اتجوز ابن عضو مجلس شعب او ابن وزير عشان تبقى السلطات مع بعض
يونس : سلطات و مخلل و محبشات
ممدوح : انا مش بهرج ، سابتني عشان ابن عضو مجلس شعب زي ابوها مع اني انا احسن من ابوها
محمد : ازاي دة راجل بيمثل الامة
ممدوح : يا راجل امه مين انا اقلك انا احسن في اية
يونس : اية ؟؟؟؟؟؟؟؟؟؟؟؟؟؟؟
ممدوح : انا بشرب حشيش صح
محمد : صح
ممدوح : هو كمان بيشرب حشيش ، و بيتاجر فية انا بقى مش بتاجر فية
محمد : عضو مجلس شعب بيتاجر في الحشيش !!!!!!!!!
ممدرح : ايوة . و بيجيبة من برة كمان مش بيزرعوا هنا مع ان احنا بلد زراعي اساسا و لا لازم نستعين باسرائيل تبعت خبرا يزرعولنا الحشيش
محمد : كفاية كدة يا ممدوح بدل ما هيتقبض علينا مخدرات هيقبض علينا سياسة و دة اسخم
يونس : كفاية يا ممدوح و بعدين اعمل زيي انا خاطب و بحب خطيبتي و ناجح معاها عارف لية عشان انا اتبعت نصايح بابا قالي يا بني " انت ما عليك غير انك تقول ثلاث كلمات حاضر و الحمد لله و ماليش دعوة الثلاث كلمات دول سر نجاحك "
ممدوح : ازاي
يونس : انا اقلك الحكومة تقول يمين تقول انت حاضر تقول شمال برضة تقول حاضر دة من ناحية حاضر تبقى بعدت عن السياسة و قرفها
محمد : طب و ماليش دعوة تقولها امتى
يونس : انا اقلك عرفت ان على راي ممدوح عضو مجلس شعب مهرب تقول ماليش دعوة شفت النشرة و معجبتكش ماليش دعوة الدستور اتغير ما اتغيرش ماليش دعوة
ممدوح : طب و الحمد لله بتتقال في كل وقت عند باباك ليها وقت معين
يونس : طبعا اقلك لية
ممدوح و محمد : لية ؟؟؟؟؟؟؟؟؟؟؟
يونس : قبضت جنية تقول الحمد لله و تعيش بيه و تحوش منه قبضت الف تقول الحمد لله و تعيش بيهم و تحوش منهم فهمت . دة يخليك ناجح في حياتك زيي و ناجح مع خطيبتي .
محمد : خطيبتي حبيبتي مش فارقة
ممدوح : هو انت كمان مجروح
محمد : لا انا مش مجروح انا عازرها
ممدوح : ازاي
محمد : هي عندها حق
يونس : يا عم قول بقى اللي حصل
محمد : هي اللي قالت مش انا ، قالتلي انت من غير شغل و من غير فلوس و من غير ورث و ابوك مش موجود و معندكش ورث و لا حاجة و معندكش شغل و معندكش أي حاجة
ممدوح : امال عندك اية
محمد : عندي ام و اخوات عايز اساعدهم
يونس : هي قالتلك كدة بس
محمد : لا مش بس عشان انا مسكتش قلتلها دي مشكلة جيل و ان البطالة اصبحت مواصفات الشاب المصري المكافح قلتلها دي مش مشكلتي دي مشكلة شباب مصر ، قالتلي و انا مش وزارة القوى العاملة
ممدوح : و يعني هي لو وزارة القوى العامية كانت هتشغلك برضة لأ
محمد : قلتلها مفيش اجيب شقة و اتجوز فيها حاجة دي
يونس : لا ابداً
ممدوح : كدة بقى قلبتوها حزن بصوا تعالوا نركن العربية و ننزل نتمشى في التحرير و نطلع على النيل
محمد : فكرة كويسة
و اتجه الاصدقاء الي ميدان التحرير يتحسسون خطاهم التي تشابكت و تبعثرت و اشار يونس
يونس : انا مش ماسك نفسي مش هعرف امشي في وسط العربيات في حارة جنب المتحف المصري تعالوا نمشي منها
ممدوح : الحارة اللي عليها العسكري دي
يونس : ايوة
محمد : ( و قد ثقل لسانه مما هو فية من حال المساطيل ) هي عليها عسكري لية هو الدخول للحارة دى بوسطة كمان
ممدوح : هههههههههههههههههههه اه بوسطة بس انا فلوسي هتغني عن الوسطة
يونس : انا كمان بابا وكيل وزارة ممكن يعني اعدي ، انت يا محمد هتعدي ازاى ؟؟؟؟؟؟؟؟؟؟؟؟؟؟؟؟؟؟؟؟؟
محمد : هعدي و هتشوف

دخل كل من ممدوح و يونس الحارة و هم يعرفون انهم كانوا يمرحون بالحديث ليس اكثر و لكن محمد الذي ذهب عقله و لم يبقى إلا عقله الباطن يتحدث عنه تخيل ان دخول الحارة هو فعلا بالوسطة
و دخل محمد الحارة و هو يشير الي المتحف المصري و يتحدث الي العسكري
محمد : انا تابع لاخناتون
ممدوح : محمد اعقل انت اتسطلت بجد و لا اية
محمد : ( و يرد محمد باندفاع رافعا صوته جهوراً بغضب شديد ) لا انا ما اتسطلتش انت معاك فلوس و يونس وسطته وكيل وزارة و انا وسطتي اخناتون جدي ايوة جدي كل اللي جوه دول اجدادي و انا الوريث انا اللي حبيت البلد دي اكتر من نفسي انا اللي دافعت عن تراث اجدادي انا اللي اتحديت الظلم يبقى لازم يكونلي وسطة انا وسطتي ملاك الارض الحقيقيين انا وسطتي كل اللي جوه انا وسطتي اخناتون و حتشبسوت و احمس انا وسطتي عمرو بن العاص و صلاح الدين و قطز وسطتي الفراعنه اللي لسة بدافع عنهم
يونس : محمد فية اية ممدوح مقلش حاجة انت بدافع عن مين و اية وسطتك دي و اية دخل الفراعنه
محمد : ( و قد انتبه الي حاله ) فراعنه اية لالالالالالالالالا عادي كان مفيش حاجة انا اتسطلت بس ، تعالوا نكمل مشي
الي اللقاء في الحلقة القادمة

July 08, 2007

برج العقرب

برج العقرب
بصراحة يا جماعة لأني من مواليد برج العقرب و فخور بهذا البرج فقلت اقلكوا صفاته
برج العقرب
من تاريخ : 23 أكتوبر إلي تاريخ 22 : نوفمبر لعنصر : ماء أسعد أيامه : الثلاثاء والخميس اللون المفضل : الأحمر الداكن والقرمزي اسعد أحجاره الكريمة : الياقوت الأصفر والمرجان اسعد أرقامه : 9 خصائصه : محارب , مدافع , مشاكس , ذكي , صريح ومتطرف في كل مواقفه
طفل العقرب
يولد الطفل في برج العقرب مكتمل الصورة أكثر منه في الأبراج الأخرى , ويبدو أقوى عزماً وأهدأ نفـــساً من الأطفال الذين في مثل سنـّه . إن أول ما يلفت إليه الانتباه عيناه المتسلطتان على الرغم من ضعف الطفولة فيه وبراءتها . إذا لم تدرك والدته – على الأقل – صلابته ولم تعالجها من البداية بما هو أصلب أصبح أقرب إلى العقرب السام منه إلى الابن البار , وإذا لم تمنحه بالإضافة إلى صلابة المعاملة الحب الكافي تحوّل إلى ضب خائف مقهور . وهكذا نجد أن أمام الطفل المنتمي إلى برج العقرب طريقين أحدهما علوي والآخر سفلي – إذا جاز التعبير – وإن اختيار أحد الطريقين يتوقف إلى حد بعيد على نوع التربية التي يتلقاها منذ البداية . يحتاج تـقويم هذا الطفل إلى يد من حديد وقلب ملآن بالحب والصبر . من الصفات التي يجب أن يعتادها منذ الصغر مراعاة الضعيف , واحترام القانون , وغفران الإساءة , وقبول الخسارة بروح رياضية بناءة . أما الصفات الأخرى التي تولد معه ولا تحتاج إلى الرعاية فهي الجرأة والصراحة والاستـقامة والجاذبية . على الرغم من صراحته يرفض هذا الطفل الكشف عن جميع خصوصياته محتـفظاً ببعضها لنفسه , كما يرفض التخـّلي عن حاجاته وممتلكاته الخاصة مفضلا ً حفظها في مكان أو زاوية ما تخصه وحده دون أفراد العائلة . أما شجاعته التي لا تـُنكر فتجعله قادراً على احتمال الألم الجسماني الشديد دون أدنى خوف أو بكاء . أمر آخر لا يُنكر وهو إخلاصه لأهله وأصدقائه من جهة وتصلبه مع الآخرين وقسوته عليهم من جهة ثانية . طفل برج العقرب أيضاً حاد الفكر والذاكرة يستوعب دروسه بسهولة عجيبة وخصوصاً متى وجد المعلم الجيد . بقليل من الإشراف والمساعدة يصل إلى القمة بين أترابه وزملائه . عيبه الوحيد ميله إلى التمرد على القانون في بعض الأحيان . يجب أن يتلهى عن ذلك بالرياضة والمطالعة وخصوصاً مطالعة كتب الكيمياء والفيزياء وقصص الأشباح والجن والسحرة وغير ذلك . من أحب الهدايا إلى نفس هذا الطفل مجهر يكتشف بواسطته حقيقة الأشياء . تحت ستار الهدوء والبرود يخفي الطفل – العقرب شعور القلق الذي يساوره باستمرار . وبما أنه سريع الانفعال دون أن يُدرك الآخرون ذلك يتألم إلى درجة المرض إذا طرأ ما يُعكر صفو بيته وعائلته . ومع ذلك يُفضل أفلام الرعب وقصص الجن والسحرة كما ذكرنا قبلا ً . هذا وينجذب بشدة نحو مختلف العقاقير والأدوية , ولهذا السبب يجب أن تـُحفظ في مكان بعيد عن متناول يده . يحلم طفل برج العقرب بأن يكون في المستقبل بحاراً أو إطفائياً أو مهندساً فضائياً أو رجل دين أو حاكماً أو حتى رئيساً للبلد . وعلى كل حال , مهما كانت أحلامه تلك , لا يجوز أبداً مقابلتها بالهزء والسخرية لأن في وسعه تحقيقها دون ريب . لكن يجب أن تقوم حدة اكتفائه بذاته وإهماله للآخرين كي يعلم قبل فوات الأوان أن أساس السعادة هو المشاركة في الرأي والمبادلة في العاطفة

الرجل العقرب
رجل له قانونه الخاص وشرائعه الخاصة , يحلم بالتغيير , ثائر علي كل ما هو تقليدي وكلاسيكي , طموح إلي حد المجازفة في اغلب الأحيان
يمكن إن تصادف في حياتك رجلا كسولا , باردا غارقا في تأملاته , إلا إن هذا النوع يشكل النسبة القليلة من مواليد برج العقرب
الرجل العقرب محارب شجاع , لا يخاف ولا يتراجع إنما يتهور أحيانا ويكون الثمن غاليا
ذو شخصية فذة أو تكرهه أو تحبه وفي كلا الحالتين أنت مضطر للاعتراف انك أمام رجل ليس كسائر الرجال
يتفرد في اتخاذ قراراته ويدير إذنه الصماء لكل النصائح الموجهة إليه حتى من اقرب المقربين
هكذا هو صاحب موقف إنما بعناد , وكأنه ولد ليكون جاهزا للتحدي , للقتال , للهجوم حينا وللدفاع حينا أخر
يتطلع دائما إلي حيث النجاح , تغريه الشهرة وتتعبه , أما الهزيمة فتشعل فيه نارا ليس من السهل إخمادها أو رسم حدود لدائرة اشتعالها لأنها إذا اضطرمت أحرقت الأخضر واليابس
لا يطيق الغموض ويحاول جاهدا إن يسقط هذا القناع لتشرق شمس الوضوح ويتلذذ بطعم النجاح
في علاقاته مع أصدقائه وفي , صادق ومدافع عنهم , ثائر علي أعدائه لا يهادن ولا يسامح اجتماعيا لا يحاول إن يلبس قناعا ولا إن يستعير صفات ليست له بل يظهر كما هو , لا يرتاح لمعاشر أهل الثروات لأنه عفوي وغير متصنع أو متكلف
لا يرضي إن يبقي في عمل واحد لفترة طويلة فهذا يعتبره حدا لطموحاته وتطلعاته إلي تغيير دائم
الرجل العقرب عندما يحب , قد يظهر قوته في البداية وصعوبة الغرق في بحر المشاعر الرقيقة لكن إن دخلت أعماقه ستجدين عاشقا يجمع إلي الصلابة الرقة , والي القوة كل اللين والمحبة
العقرب المائي يعتبر الحب زورقا له وهو الربان , والعقرب إذا لم يعش قصة حب عاش في حلم الوصول إلي تحقيقها , وهذا لا يفاجئ فالجري في الحياة الاجتماعية والقوي في عمله هو أكثر الناس حاجة إلي الحب المجرد
الرجل العقرب له سحر خاص لا يقاوم وإياك إن تثيري غيرته فقد يعطيك درسا لن تنسيه , فالحب عنده عهد ووعد, إنما هو يحق له ببعض المغازلة إلا انه يكره فعلا الخيانة
العقرب الزوج يجهد للاستجابة لطلبات زوجته , لكنه لا يقبل منها امرأ أو حتى نصيحة وهذا لا يعني انه يحبها خاضعة فهو يميل إلي القوة حتى ولو لم يعترف بذلك
حازم مع أطفاله ومزعج مرات إلا انه يشكل عندهم المثال الأعلى في القوة والحضور واتخاذ القرارات
قد يكون العقرب الأب حنونا إلا إن مشاعره تبقي دفينة وهنا دور الأم في إفهام موقف الأب للأولاد
حضور وقوة , حزم وعاطفة متأججة , صعب التأقلم معه , جميل خلق توازن معه , إذا كنت قادرة فلك أكثر الرجال قوة وسحر
المرأة العقرب
إذا التقيت بامرأة جمالها غامض وفيه سر يغريك فتأكد إن برجها العقرب
امرأة تعرف كيف تحفظ سرا , كيف تحافظ علي صداقاتها , لها عالمها الخاص مهما توسعت دائرة معارفها
تثير فضولك لمعرفة ما يدور في رأسها إلا انك لن تستطيع ذلك فهي قادرة علي الاحتفاظ بإسرارها , بتمنياتها , بأحلامها الدفينة
المرأة العقرب تكره الخداع والمراوغة والمسايرة علي حساب شخصيتها , تتهم مرات بأنها باردة ولكن برودتها غلاف يقيها حرارة شوق الآخرين إلي معرفتها
نظرة واحدة تسرق إعجاب متلقي النظرة , جميلة بغموض , ساخرة بتساؤل , سر قد لا تستطيع معرفته
هناك نوعان من نساء برج العقرب
النوع الأول وهو النسبة ألكبري غامض , له عالم خاص ومزاج خاص , عاشق بهدوء , حالم بواقعية , واضح في تحديد الأمور
النوع الثاني منفتح علي كل ما هو جديد , محب للاختلاط , ساع لمعرفة كل جديد , عاشق للأضواء والشهرة , ضاربا عرض الحائط بكل التقاليد و بطريقة غير مقنعة
المرأة العقرب إن أحبت فاض حبها وان كرهت تحول إلي انتقام وحقد مريعين , فأقصي الحب عندها مثله مثل أقصي الكرة
تختار أصدقائها بدقة كذلك كلامها وثيابها تركن إلي بيتها كما قطة قرب موقد النار في الشتاء , قادرة علي تسلق سلم النجاح لأنه تملك من الإرادة ما لا تملكه معظم النساء , كذلك هي قادرة علي تبؤ المراكز العالية تتحدي الرجال
المرأة العقرب تفرح إذا التقت بمن هو اقوي منها من الرجال ترضي بالخضوع له بكل فرح طفولتي لأنها تري فيه الفارس الذي استطاع إن يكون في عينيه ضوء يبهر كل الأضواء التي تتغني بها
عندما تتزوج تحب إن تبقي ملكة في بيتها وتتخلي عن عملها بكل طيبة خاطر إلا إذا جأت الظروف معاكسة , فتتحمل كل المصاعب بصمت يشبه صمت العظماء
قد تختلف مع زوجها داخل البيت إنما تدافع عنه خارج البيت وتظهره علي انه الرجل المثالي لأنها مؤمنة إن تقدير الناس لها من تقديرها لزوجها
نظامية في بيتها وتحترم المواعيد , لا تحب الضجيج والثرثارات الفارغة بل تحب أن تقتصر زياراتها لأصدقائها الحميمين والواجبات الاجتماعية
العقرب الأم حريصة علي تربية أطفالها بطريقة مثالية وقليلا ما تظهر لهم كل عاطفتها لكي لا يغرقوا في بحر العواطف , ولكن ينقصها معرفة التصرف معهم مما قد يخلق بعضا من الخلل وعلي الزوج مساندتها
امرأة ساحرة , متوقدة , مستقلة في قراراتها وخاضعة لزوج مميز , قد تكون هي المرأة التي تفتش عنها في هذا الزمن

July 02, 2007

قعدة حلوة : الحلقة الاولى

قعدة حلوة

الحلقــــــــــــــــــــــة الاولــــــــــــــــــــــــــى

محمد و يونس و ممدوح ثلاثة جمعهم القدر ليكونوا ثلاث جنود بالجيش المصري يقضون اغلب الاوقات مع بعضهم البعض في عمل و تدريبات و الفة و ابتسامة و اكلة حلوة و سيجارة واحدة يشتركوا فيها سوا ،
ايام قضوها سويا حتى جاء موعد الاجازة
و كان راي ممدوح و اقتراحة الرائع ماذا لو التقوا هم الثلاثة ( و قعدوا قعدة حلوة ) ليقضون وقت سعيدا مع بعضهم البعض خارج حدود هذا المعسكر و اشكواكة و لأن الثلاثة عاشوا ايام سويا يتقاسمون كل شئ فقد اتفقوا جميعا على اللقاء في الاجازة
و تفرقا كل ذاهب الي بيته عارفا في قرارة نفسه يعرف انه على موعد مع صديقاه في اليوم التالي و ذهب كل الي طريقة يحدث نفسة

ممدوح : اكيد هتبقى خروجة حلوة و يوم جميل و لذيذ العيال دي دمها خفيف و لما هنظبط الدماغ كل حاجة هتبقى عالية على الاخر انا اطلب من مامي 500 او 600 جنية و اظبط الكلام

محمد : هنخرج بكرة طب يا ترى هلبس اية و اية اللبس الشيك اللي ممكن يليق بخروجة زي دي ، لاااااااااااااا انا مش عايز اتفضح قدامهم و لو حلينا عقدة اللبس عقدة فلوس الخروج هتتحل ازاي دة الحال وحش اوي يا ترى انا هقدر اجيب فلوس منين لخروجة زي دي و سألت والدتي في فلوس هيبقى منظري وحش قوي هي هتعمل اية و لا اية دي فلوس الاكل بتيجي بالعافية دي اتحملت كتير قوي و يا ترى هنخرج فين و المكان اللي هنروحه مش هيبقى غالى انا تعبت من التفكير انا هسيبها على الله

يونس : ياااااااه هنخرج طب يا ترى الخوجة دي منطقية صحيح كلنا متساويين في المستوى الاخلاقي و الثقافي لكن هناك اعتبارات اخى غير الشهادات الاعتبارات المادية ازاي هواجة بابا باني عايز فلوس اخرج هيسمعني درس جامد جدا في كيفية التوفير و التدبير و بصراحة عنده حق راجل جاهد و كافح عشان يبقى وكيل وزارة و مرتبة على قد المصاريف و بالعافية جمعلى ثمن الشقة اللي ممكن اتجوز فيها يعني الراجل عمل اللي عليها صحيح عايشها بالورقة و القلم بس دة الاسلوب العلمي في التفكير و التدبير احنا نحسبها مرتب الوالد و الحمد لله راجل وكيل وزارة مرتبة 700 ج بعد التوفير و التدبير و المصاريف و .......و........و .......( و بعد تفكير عميق ) خلاص انا هطلب من بابا 30 ج مرة واحدة عشان ابقى محتفظ بشخصيتي امام الجميع هو دة الكلام

و في اليوم التالي تحدث الثلاثة الي بعضهم تليفونيا حتى اتفقا على ميعاد و مكان اللقاء و قبل اللقاء

ممدوح : مامي انا خارج مع اصحابي و عايز فلوس

والدة ممدوح : يعني كام يا حبيبي

ممدوح : 300 ج مش كتير

والدة ممدوح : اوك يا حبيبي بس ما تحاولش تكون مبزر

ممدوح : اوكى ، و انت يا بابا مفيش أي حاجة

والد ممدوح :كفاية عليك زيهم يبقى معاك 600 و امشي بقى

ممدوح : اوك يا بابا باي

و على الجانب الاخر يقف يونس في منزلة يستمع الي المحاضرة المعهودة

والد يونس: خروج يعني صرف يعني تبزير اجيب منين انا اصرف على البيت و لا اكونلك مستقبلك انت و اخوك الحمد لله قدرنا نجمع حق الشقة بتاعتك ناقص شقة اخوك سيبوني ادبرها بقى

يونس : بابا انا عارف اني بتقل عليك بس يعني خليها عليك انت المرة دي معلش انا ابنك و نازل اجازة من الجيش

والد يونس : خلاص حاضر عشان بس تبقى مبسوط و مكنش قصرت معاك في حاجة عايز كام

يونس : 30 ج كويس

والد يونس : كااااااااااااااااام ؟؟؟؟؟؟؟؟ لا كتير مينفعش دة انا وكيل وزارة بمشي امك على الكورنيش و ابسطها بـ 2 ج لا مينفعش ................. و لا اقولك ماشي بس ما تخدش على كدة

طبعا اتشوقنا نعرف محمد هيعمل اية ........

والدة محمد : مالك يا محمد رايح جاي زي ما تكون عايز تقول حاجة
محمد : لا مفيش ربنا يديكي الصحة يا امي

والدة محمد : من مكالمة التليفون اللي جتلك شكلك خارج صح

محمد : صح

والدة محمد : و عايز كام عشان تكون مبسوط

محمد : لا اصلي انا ........... ممكن .......... يعني ......... هو كان .............

والدة محمد : متلخبط لية عايز كام

محمد : مش عارف بس مواصلاتي و بس يعني و انا اصلي .......... يعني ......... هو كان

والدة محمد : خلاص من غير كسوف خد 100 ج خليها معاك عشان تبقى باين وسط اصحابك

محمد : امي الحبيبة كدة كتير

والدة محمد : اسمع الكلام عشان اصحابك معاك يمكن تعزمهم على حاجة و ربنا يابني يسدد خطاك و يوقفلك ولاد الحلال

الي اللقاء في الحلقة القادمة