My Visitors If you cann't read arabic you can know how I think you can visit this link

August 31, 2007

لا انا كدة مجنون ؟

لا و الله انا كدة على راي الجيزاوي مجنون
اكلم نفسي و اكلم ابو الهول يبقى مجنون
بس المشكلة اني عايز اعرض وجهه نظرمصري للنهاية
طب انا حصلي النهاردة موقف غريب حلفت لاكتبه
كنت قاعد بتفرج على التغطية بتاعتي في ابناء مصر
و الواد اخويا دخل علية قلي اسكت يا شمس مش الريس مات
هو قلي كدة و سبني و انا تنحت
اه بقيت اخرس و ابكم و عيني خدت هادف ثابت و اتمسمرت
حوالي دقيقة و قمت فاتح
google
كاتب مبارك
و طلعتلي الصورة
و قمت ساكت
و بعدين سالت نفسي انا جايب صورتك اتفرج عليها لية
و الله الكلام دة حصل
و بعدين قمت زي اللي بيكلم نفسه
" نهار اسود انت مت طب و بعدين دة البلد مليانه تيارات بعدد شعر راسي الاسود عشان الابيض قليل
التيارات دي هتاكل البلد مين هيحميها
طب الاول هو انت كنت حاميها
تعرف انا عن ايمان داخلي عارف ان عهدك انا ما ينفعش اعيش فيه
في حاجة غلط يا اما الزمن مش مناسب لية يا اما عهدك اللي مش مناسب لاي حد عندوا كرامة
ما هو يا اما الغلط فية يا في عهدك
بس في الحالتين انت لو مشيت انا هخاف
يا ترى اللي جاي شكله اية
يا ترى هيحصل فينا اية
طب انا المفروض اعمل اية دلوقتي

بص هو ما ينفعش افرح احساسي مش جيبني مش قادر افرح

احزن جايز و لو ان عيون الناس هتتريق علية

تعرف يا ريس انت شبة شخصية عرفتها و كتبتله بوست نفسي يبقى لو يقراه

انتوا الاتنين اكتر ناس جرحتوني

و اكتر ناس مش عايزلهم حاجة وحشة

مع ان لعلمك الموت دة قدر مش حاجة وحشة

بس انا كدة

المهم اني قلت الكلام دة كله لنفسي في دقايق و بعدين فقت قلت طب اتاكد

بسال اخويا يقلي دي اشاعة

مرضتش امسح البوست قلت اسيبه

August 29, 2007

استفسار صغير يا ريس ممكن ؟

بصراحة كدة و عشان محدش يلف و لا يدور
انت قريت العنوان صح
انا عندي استفسار نفسي اسئلة للريس
ايوة الريس بتاعنا متستغربش
عادي يعني مواطن و من حقي اسئل
شاب و عايز اسئل
او مدون و عايز افضفض
المهم يا ريس عشان مطولش عليك
انت عارف اني من عشاق السادات
و كنت بسمعله كدة كذا خطاب
رحمه الله علية كان يقولك
"القوات المسلحة هي درع هذا الوطن و سيفه "
مش عارف يا ريس الايام دي بقيت اسمع
ان القوات المسلحة هي درع هذا الوطن بس
كنت عايز اعرف السيف راح فين
يعني وقع مننا السنين اللي فاتت
و لا اتخصخص مع الخصخصة
و لا راح فين
لا مؤاخذة يا ريس انا مش بتريق و الله
دة انا واحد مكبوت و بفضفض
و يجعله عامر

August 26, 2007

و ماذا بعد ؟؟؟؟؟؟؟؟؟؟


و مـــــــــــــــــــــــاذا بعـــــــــــــــــــــــد؟؟؟؟

و ماذا بعد الحب من اول لقاء
لقد ذاق القلب الظامئ طعم الماء
نسى مذاق الظمأ و لازال يقتله الجفاء
راى فيكي الطهارة و العفاف و الحياء

يا اميرة اصابت قلبي العاشق بالجنون
يا حبيبة تشتاق لرؤيتها العيون
يا من هى ابعد عن الحب ما يكون
يا من سجنت قلبها في سجن الوحدة الملعون


انا صاحب قلب مخلوق من ذهب و حديد
قل ظل عشاقة امراء و ملوك و عبيد
قلب القوة فيه بحر ينقص و يزيد
قلب ضم باحشائة نار و رياح و جليد

يا عروس للبحور يا من جعلت مني ملاك
انا سباح ماهر رمى نفسه للشباك
انا زاهد في كل القوم الا انت و سواك
هل تنظري الي قلب ينبت بين الاشواك

August 24, 2007

لية لأ


انا عارف يا جماعة ان البوست المرة دي كبير شوية بس استحملوا رغيي النهاردة معلش انا كل مرة بقصر
سيبوني النهاردة اناقشكوا في موضوع مهم
طبعا يا جماعة انا لما كتبت اخر بوست ( و الله مش معاهم ) جاتلي تعليقات كلها جميلة جدا منهم اللي قالي فعلا انه هو كمان مش معاهم
و منهم اللي نفسه يبقى مع حد بس مش لاقيه لان الحد دة مواصفاته غير موجودة على ارض الواقع
و منهم
sokoothansawat
اللي قالت انها مع حزب الجبهه
و منهم
omar مشروع بطل
اللي قال انه معاهم ( انتو طبعا عارفين مع مين ) كلام في سركوا يعني بس دة راية
و منهم
مدونه انا بحبك يا مصر
الجيزاوي اللي بيعلن على طول انه مع الاخوان
و كلهم زي ما قال ابو النجوم ورد مفتح في الجناين كلهم بيحبوا البلد دي جدا بس كل واحد بيحبها بتفكيره و بطريقته كلهم لو حطوا اديهم في ادين بعض هيعملوا حاجة جميلة اوي
و دة اللي انا نفسي اقوله من زمان
بس مش على مستوى المدونين لان الموضوع دة طرح كتير جدا و بدء مجال تنفيذة كتير اوي
اللي انا عايزه اكبر من كدة
اللي انا عايزة ممكن تلاحظة لو جبت واحد تبع الحكومة و سيبته يتكلم على المعارضة و حياة ابو الهول اللي تحت دة ما هيقول في المعاضة كلمة حلوة
و في نفس اللحظة هات واحد من المعارضة او كفاية او الاخوان يتكلم على الحكومة و حياة حبي ليكوا ما هيقول في الحكومة كلمة عدله
طب هنفضل نضرب في بعض لامتى
احنا عاملين زي اللي بياكل في نفسه
بلد بتاكل في بعضها
الحكومة بتقول ان كل من يعارضها يضر بالامن القومي
و المعارضين من رايهم ان كل من تبع الحكومة فهو فاسد
طب و العمل لية ما نبقاش ايد واحدة
تفتكروا مثلا لو حزب الوفد او الاحرار او الغد مكان الحزب الوطني اية اللي هيحصل
مفتكرش الحال كان هيتغير
سيبقى الوضع على ما هو علية كل الموضوع هو تغير الاسامي
يعني التوحد في اتخاذ القرار هو اللي غلط
زي ما كلنا جالنا ملل من الدوري المصري عشان ما بنشفش الا الاهلي
لية ما تبقاش الحكومة مرضية للجميع
هتقلي ازاي هقلك
لية متبقاش الحكومة مشكلة من الوطني و الوفد و الغد و الجبهة و الاحزاب المعروفة ة تضم كمان الاخوان و المستقلين
لية الحكومة ما تضمش كل دول
انا عارف انهم بينهم و بين بعض هياكلوا في بعض
بس لية نحسبها كدة
مش جايز نلاقيهم بيحاولوا يفوزا على بعض بالعمل
مش جايز اللي بيحاول يسرق ما يسرقش لا يخاف زميله من حزب تاني يفضحه
طب بلاش انا هقلك ان كلامي دة كله غلط و ان فكرة الحكومة الجامعة لكل الاتجاهات غلط
حاضر يا سيدي هي غلط بس لية منجربش لية نحرم نفسنا من خوض التجربة
اصل الدستور ينص ............قبل ما تقول
نغير الدستور
اشمعنا غيرنا الدستور في حاجات مالهاش لزمة
ما نحاول نصلح من نفسنا
نحاول نحط ادينا في ادين بعض
يا ترى نقدر
انا شخصيا مع اني مستقل و لا اتبع احد
بعلنها انا ايدي مفتوحة لاي حد من اي حزب حتى الوطني حتى الاخوان اللي قلت اني مش معاهم كل دول انا ايدي مفتوحة ليهم عشان نعمر بلدنا و نخليها في احسن حال
انت اية رايك ؟؟؟؟؟؟؟

August 22, 2007

جت علية و مش عايزيني اهيس


طبعا لان انا بقالي كتير منزلتش بوست جديد و انا مش متعود
فانا لازم انزل ببوست جديد
طب اكتب اية دلوقتي انا قاعد مخنوق و عندي اكتئاب
و الحمد لله
و لو كتبت اللي جوايا هعملكوا احباط نفسي مؤقت تستمر فاعليتة الي ما شاء الله
قلت اطلب واحد صحبي احكي معاه يمكن افضض شوية
لقيت الساعة بقت واحدة صباحا لو طلبت حد ابوه هيرد علية في التليفون و تبقى ليلة
و بعدين
حتى الماسنجر كلهم مش موجودين
البلد كلها سهرانه برة النهاردة باين مش عارف
بس انا عرفت انا هكتب اية النهاردة لحظة واحدة انا اتكلم في تليفون و اجيب الفكرة و اجي
شمس : الو الو اديني سنترال الهرم لو سمحت .....اكلم ابو الهول بعد ازنك
شمس : الو ابو الهول معايا
ابو الهول : ازيك يا شمس
شمس : ازيك يا عمنا عامل اية و الله وحشني
ابو الهول : و انا كمان مصر و اللي بيحبوها وحشوني
شمس : معلش بقى اعذرني مش بقدر اجي بعد ما خلوا التذكرة بـ 10 ج الموضوع بقى صعب
ابو الهول : و لا يهمك ابقى بص علية في الصور
شمس : ما هو دة اللي بيحصل انا مالي الجهاز عندي بصورك المهم انت عامل اية
ابو الهول : تعبان يا شمس
شمس : و الله عارف مقعدينك في الشمس طول النهار لا شمسية و لا بق مية
ابو الهول : هههههههههههههههههه بس مش دة تعبني
شمس : اية يا عم و حياة ابوك (اللي انا معرفوش و التاريخ بيختلف علية) ما تقلبها نكد
ابو الهول : انا ماشي يا شمس
شمس : رايح فين يا حج
ابو الهول : سايب البلد و ماشي
شمس : على فين ان شاء الله
ابو الهول : معرفش
شمس : حد يمشي ما يعرفش رايح فين
ابو الهول : اللي هيسرقوني ما قلوش هيودوني فين
شمس : يسرقوك يسرقوا مين يا عم ....صحيح في اثار بتتهرب برة البلد و عادي يعني البلد تعمل اية العالم كله طمعان في الحتتين اللي عندنا .....بس موصلتش انهم يسرقوك يا بو الهول مش ناقصة فشر على اخر الليل
ابو الهول : ما هو بعد ما يسرقوا الحتتين و الثلاث حتت و يسرقوا الخير و يسرقوا كل حاجة مش هيلاقوا غيرى هيسرقوني انا و الثلاث اهرام اللي ورايا
شمس : يا نهار ازرق يسرقوك انت و الاهرامات و اما اجي رايح شارع الهرم اقول لسواق الميكروباص اية شارع الحاجة المسروقة لا يا عم و النبي مش طالبة نتسرق تاني دة احنا بقالنا 7000 سنة بنتسرق عيب كدة بقى
ابو الهول : على العموم قبل ما يسرقوني و يحدفوني برة البلد هبقى اكلمك اسلم عليك
شمس : مكالمة الوداع يعني.......... لا انا عايزك اصل انا مش هسيب البلد دي و بحبك فانت كمان لازم تقعد فيها
ابو الهول :يعني هتقدر تعمل حاجة و تقعدني
شمس : اه طبعا هقــ................... هقـــ...........بص انا هعمل اللي يقدرني علية ربنا يا صحبي بس لو عرفوا غصب عني يسرقوك و يبيعوك و منقدرش نشوف بعض تاني عايزك تعرف اني اكتر واحد حبك في العالم دة كله
ابو الهول : خد بالك من نفسك يا شمس
شمس : ابو الهول ......... كنت عايز اقلك خد بالك من نفسك و من الاهرامات عشان انا رايح مشوار عايز لما ارجع اللاقيكوا زي ما انتوا

August 15, 2007

اول لقاء

اول لــــــقاء

امنت دائما بكل عجائب السماء
و صدقت ان هناك نيران تحت الماء
و اقسم اني تعقلت كل هذه الاشياء
ألا ان احب منذ اول لقاء

لم تأخذني تلك النظرات العابرة
و لم اتلهف بتلك الشفاة الساحرة
و برغم كل كلماتك المبهرة
ألا انك اصبحتي لقلبي اوله و اخره

انا فارس في زمن انتهى منه الفرسان
انا شاعر كتب قلمه عن الحب و الازمان
انا عاشق لكي يا اميرة ليس لها عنوان
انا مهار لكي و ان كان مهرك كل الجنان

و يرد قلبي بضعف و استبداد
ان كنت اميرها فاحكي لها دون عناد
صرح لها باختيارها من دون العباد
لتكون الحبيبة و العشيقة و الزوجة و الاولاد

لا يا قلبي فهذا هو المحال
لقد ادركت حبي من هذا المقال
و قصائد شعري خطاب لها بمرسال
لتعرف اني طالب قلبها للوصال

August 14, 2007

لازم اكتب البوست دة

اه بصراحة لازم اكتب البوست دة


هتقلي اية العبارة يا شمس


اقلك اني عايز اقلك اني كنت حاضر اجتماع الاخوة المؤسسين


لحركة ابناء مصر


طب و اية المشكلة


مفيش مشكلة كل الموضوع اني عايز اقلك اني خلاص معاهم و عايزك انت كمان معاهم


هتقلي عايزني ابقى معاهم لية


يبقى انت كدة هتسبني اتكلم و انا لما بتكلم ما بسكتش


كل الموضوع اني عايزك تبقى معاهم عشان دي مجموعة بتحب مصر جدا بغض النظر عن اتجهاتهم


و اكيد انت بتحب مصر و إلا مكنتش كملت في مدونتى لحد السطر دة


هتقلي طب انا منحبش اقوم باي نشاطات


اقلك يبقى اكيد عتزور الموقع بتاع ابناء مصر دة كتير جدا


عشان تعرف الاخبار في بلدنا اول باول لحظة بلحظة


عشان تتابع ازمة المية اللي مبهدلة الناس


عشان تعرف اخبار المحاكمة العسكرية اللي هتتعمل يوم الاحد و تتابعها لحظة بلحظة


و لو ملكش في دة كله هتلاقي اخبار رياضية


مبتحبش الرياضة مثلا في شعر و ادب


و ممكن تلاقي اشعاري هناك


اقلك انا مش هقنعك كتير


العنوان اهو


http://www.abna2masr.com/index.php?paged=2



خش انت بقى و اتفرج

August 09, 2007

عشان متبقاش سياسة و شعر بس اديها تاج

التاج دة اهدهوني جمعاوي روش طحن مدونة فكك مني
اسم مدونتك؟
مصري لللنهاية
لماذا اخترته ..وماهي نيتك من وراء اختياره؟
و الله انا اخنرته عشان بحب البلد دي قوي مرض بقى تقول اية و النية وراء اختيارة اني مش ناوي اتغير يعني مصري و بس لا شوية هبقى شاب هيبس و لا الكلام دة كله و لا ناوي اهاجر تل ابيب
هل فكرت في إغلاق مدونتك؟ والسبب؟
لا لم أفكر ف هذا مطلقا ...و السبب انا شخصيا معرفوش اصلي مفكرتش
صورتك في المدونة ورمزيتها ؟
اه صورة الصقر الجميل دة اصله فية شبة مني اصل الصقر عامه طائر شجاع غيور ودود ذوكبرياء عزيز النفس .فهو شجاع في هجومة ومعلاكته مع الفريسة ، قادر على منازلة فرائس اكبر منه حجما . وهو طائر غيور على عشه وصغاره وانثاه ، وودود لعائلته حيث شوهدت بعض الصقور تصطاد لوالديها . كما ان الصقر ذو كبرياء لايحب ان يغدر به او يخدع و ابقى روح انت بقى اقرا عنه
لماذا دخلت عالم التدوين من الاساس؟
عشان عايز اكتب حاجة لية و للاخرين عايز اكتب للناس لاخواتي و ابويا و امي و حبيبتي و البت بتاعتي و الواد صاحبي و عم طلعت القهوجي عايز اكتب لدكتوري في الجامعة اللي ميفتكرنيش اساسا بس عادي بقى
جمله قيلت لك فى وصف مدونتك؟
لا وو الله لسة منزلتش المدونة مسابقة جمال اول ما تنزل هبقى اقلك
التعليقات بالنسبه لك ,اهميتها؟
التعليقات دي عاملة زي الردار في الطيارة عجلة القيادة في العربية الشراع في المركب هي اللي بتهديني لطريقي و هي كمان اللي بتدفعني اكتب تاني
احلى بوست كتبته ...ضع اللينك , ثم اذكر لماذا؟
ميشكرش في بوستاته اللي ابليس خلي الناس هي اللي تقول
حد قل أدبه فى التعليق إيه رد فعلك؟
و الله لو الكلام كان خارج عن حدود الادب بشتيمة و سب همسح التعليق عشان شعور الاخوة الزوار و شعورى انا كمان ( اصلي عندي احساس ) غير كدة هناقش وجهه نظر المعلق
أسوأ مدونة؟
بصراحة انا متعودتش اقول رايي في حد بس فية مدونة انا متعاظ منها و بصراحة معايا الحق و ابقوا قولوا انتوا رايكم
اه انا نسيت المدونة دي اسمها انا مصري مفيش وراه حاجة غير انه يشتم في الاسلام
هيحصل ايه لإيميلك لما تموت ؟؟
ياراجل اية الافوال الحلوة دي طب قول بعد الشر دة انا لسة صغير
اديت الباسورد لحد قبل كده ؟
لا
اسمك؟
انت هطلعلي بطاقة
المشهور بيه وسط اصحابك؟
شمس الزناتي
شخصيتك نوعها إيه؟
سته سلندر ههههههههههههههههههه لا بص اقلك انا برج العقرب كلي برج العقرب
السفر بالنسبة لك؟
اني اسيب ناس انا عارفهم عشان اروح اقابل ناس معرفهمش و اعرفهم و يوحشني اللي انا سبتهم
وقت فراغك بتعمل فيه إيه؟
حاجات كتير قوي دة انا عايز صفح اصل انا متعدد النشاطات
المود بتاعك؟
الناس بتقول علية متفائل و دايما بضحك مع اني مش شايف حوليه حاجة تضحك
الاكلة المفضلة؟
الكرشة و الفتى و الممبار و الفول ابو طحينه و الفطير
الصفات اللي أخدتها من بابا؟
الثصميم على رايي
الصفات التي أخدتها من ماما ؟
الطيبة
اكتر ست حاجات بكرهها؟
اشمعنا سته
على العموم بلاش اكرها دي مش بعرف اكره
بس مش بحب الخيانه و لا الغدر و لا الانتظار
اكتر ست حاجات بحبها؟
ستة بس برضة
دة انا بحب حاجات كتير اوي
بحب الحب نفسه و بحب الاطفال و بحب الكمبيوتر و بحب النقاش المثمر و بحب سماع الاغاني و كتابة الشعر و القصص
و بحب البنات جدا
الشغل بالنسبة لك؟
هو انا لسة مش فاضي اشتغل عشان وقتي كله مقضيي في البطالة
بس الشغل بالنسبة لية سر حياتي
الانترنت بالنسبه لك؟
المكتبة بتاعتي و سماعة تليفوني و حياة تانية جميلة جدا فيها ناس كتير بحبهم بس برضة فيها الحلو و الوحش
امرره لمين ؟
اولا كدة لكل اللي يقراخ و ثانيا فية شوية ناس بحبهم و عايز اغلس عليهم
بصوا انا كدة هنسى ناس بحبهم انا بهدي لكل الناس

August 07, 2007

مواقف سريعة




بصراحة يا جماعة انا كنت ناوي اعمل تاج لذيذ جدا و طالع بيتنا و انا في دماغي اكتب التاج دة


بس حصلي موقف خلاني لازم اناقش قضية مهمة جدا


-


-


-


-


-


-


-


الموقف الاول


مستعجل تعرف الموقف لية هتعرفه


الموضوع ان احد اصدقائي اتهمنى ان ثقافتي في اللغة الانجليزية تقريبا ضعيفة


و منطقيا مني اني اسئل عن السبب اللي خلاه يكون راية دة


و كان سببه اني لا انقح عباراتي ببعض الكلمات الانجليزية و ان تدخلت في احد الحوارات الثقافية احاول ترجمة اي كلمة انجليزية او التعبير عن اي كلمة انجليزية باخرى عربية


و منطقيا حاولت اعمل لنفسي كام اختبار انجليزي كدة كانوا عندي على الكمبيوتر و لقيت ان مستويا كويس


و قبل ما اتجاهل الموضوع قعدت افكر مع نفسي شوية و ارقب اللي بيحصل حوليه لقيت ان اغلب الناس حوليه لازم كل دقيقتين ثلاثة كدة تلاقي كلام انجليزي ترقع كدة في وشك


طب لية هو انت مش قادر تعبر عن اللي جواك بالعربي و لا اللغة العربية فقيرة لدرجة انها مش قادرة تقول اللي انت حاسس بيه


الموقف التاني


الغريبة بقى اني كنت هقفل البوست على كدة


لكن قبل ما اقفله لقيت واحد صديق بيكلمني على الياهو الغريبة اني لقيتوا كاتب بالطريقة المسماه


franco arabic


و الغريبة ان صديقي دة بالفعل ثقافته الانجليزية ضعيفة طب انجليزي لية للدرجة دي مش بنحب العربي


الموقف الثالث


و الاغرب من دة كله انك لو تابعت اي قناه من قنوات الدش في مسلسل او فيلم او حتى مذيعة قاعدة هتلاقيها تلات اربع كلامها بقى انجليزي


ما هو يا اما العربي مش مكفينا فنلغية و نستعين باي لغة تانية


يا اما في حاجة غلط في زمن بقى كله غلط

August 02, 2007

بوست نفسي يبقى لو يقراه


هتقولي اية يا شمس احنا لحقنا نحلم معام لما حلمت و لا حتى نعلق و نشوف اية موضوع الامواج دة

اقلك نفسي اكتب البوست من زمان دة جواب لحبيبي

اصلي حاولت ابعته على ورقة مقدرتش حاولت ابعته على رسالة موبيل ما قدرتش و صدقني حاولت ابعته مع مرسال مقتدرتش و هو مش مديني الفرصة اكون شجاع و اقلهم في وشة

ايوة هقولها وشة بحبك و الله العظيم بحبك بس شايل منك كتير اوي انت بنيت بيني و بينك جدار بنيت فية لمدة عامين متتالين

تعرف انا مدين ليك بعمري كله بس انت مدين لية بحب كبير اوي

وعدتني بية مع كل حضن حضنتهولي و خليت بوعدك

انا عارف و الله العظيم عارف انك نفسك تطمن علية و تسال علية بعرفها من نظراتك الثائرة بعرفها بعرفها و خلاص احساس

عارف انك بتحلم ترجع لية و ارجع ليك

و صدقني هل دة حلمي انا كمان

يمكن انا عارف ان بنسبة 99.9 في المية انت عمرك ما هتقرا البوست دة و يمكن يدفن في تراث المدونة و ما تقرهوش دة لان انت بعيد عن كل ما هو نت و كمبيوتر و دة مش عيب فيك

بس اديني ببعتلك الكلام اللي حاولت اقوله حتى لوحدى خفت لا الحيطان تفتن علية

قلبي و الامواج

قلبي و الأمواج

موج كموج البحر على قلبي ينساب
اقتحم صخور القلب و العقل في غياب
تلاطمت امواجة على القلب دون حساب
ليرفع راية بقرب قدوم الأحباب

صخور القلب الجحودة تتفتت
ثغرات ملئت هذا القلب المشتت
ملئها الموج بلطماته فانسدت
و القلب يعلن فرحته و الاحزان قد ولت

ايتها الامواج هل انت بمرسال
من بعثك الي قلبي لتزيلي الاهوال
من اعطاك الحق لدخول قلب الابطال
من ارسلك الي ؟ لقلبي الف سؤال

و يشير الي قلبي بالصبر
هو مرسل الي قلبي برسالة امر
" من قلب فتاه ميمونة " من الحب لا مفر
قم من غفوة جحودك فالحب مصير و قدر