My Visitors If you cann't read arabic you can know how I think you can visit this link

August 24, 2007

لية لأ


انا عارف يا جماعة ان البوست المرة دي كبير شوية بس استحملوا رغيي النهاردة معلش انا كل مرة بقصر
سيبوني النهاردة اناقشكوا في موضوع مهم
طبعا يا جماعة انا لما كتبت اخر بوست ( و الله مش معاهم ) جاتلي تعليقات كلها جميلة جدا منهم اللي قالي فعلا انه هو كمان مش معاهم
و منهم اللي نفسه يبقى مع حد بس مش لاقيه لان الحد دة مواصفاته غير موجودة على ارض الواقع
و منهم
sokoothansawat
اللي قالت انها مع حزب الجبهه
و منهم
omar مشروع بطل
اللي قال انه معاهم ( انتو طبعا عارفين مع مين ) كلام في سركوا يعني بس دة راية
و منهم
مدونه انا بحبك يا مصر
الجيزاوي اللي بيعلن على طول انه مع الاخوان
و كلهم زي ما قال ابو النجوم ورد مفتح في الجناين كلهم بيحبوا البلد دي جدا بس كل واحد بيحبها بتفكيره و بطريقته كلهم لو حطوا اديهم في ادين بعض هيعملوا حاجة جميلة اوي
و دة اللي انا نفسي اقوله من زمان
بس مش على مستوى المدونين لان الموضوع دة طرح كتير جدا و بدء مجال تنفيذة كتير اوي
اللي انا عايزه اكبر من كدة
اللي انا عايزة ممكن تلاحظة لو جبت واحد تبع الحكومة و سيبته يتكلم على المعارضة و حياة ابو الهول اللي تحت دة ما هيقول في المعاضة كلمة حلوة
و في نفس اللحظة هات واحد من المعارضة او كفاية او الاخوان يتكلم على الحكومة و حياة حبي ليكوا ما هيقول في الحكومة كلمة عدله
طب هنفضل نضرب في بعض لامتى
احنا عاملين زي اللي بياكل في نفسه
بلد بتاكل في بعضها
الحكومة بتقول ان كل من يعارضها يضر بالامن القومي
و المعارضين من رايهم ان كل من تبع الحكومة فهو فاسد
طب و العمل لية ما نبقاش ايد واحدة
تفتكروا مثلا لو حزب الوفد او الاحرار او الغد مكان الحزب الوطني اية اللي هيحصل
مفتكرش الحال كان هيتغير
سيبقى الوضع على ما هو علية كل الموضوع هو تغير الاسامي
يعني التوحد في اتخاذ القرار هو اللي غلط
زي ما كلنا جالنا ملل من الدوري المصري عشان ما بنشفش الا الاهلي
لية ما تبقاش الحكومة مرضية للجميع
هتقلي ازاي هقلك
لية متبقاش الحكومة مشكلة من الوطني و الوفد و الغد و الجبهة و الاحزاب المعروفة ة تضم كمان الاخوان و المستقلين
لية الحكومة ما تضمش كل دول
انا عارف انهم بينهم و بين بعض هياكلوا في بعض
بس لية نحسبها كدة
مش جايز نلاقيهم بيحاولوا يفوزا على بعض بالعمل
مش جايز اللي بيحاول يسرق ما يسرقش لا يخاف زميله من حزب تاني يفضحه
طب بلاش انا هقلك ان كلامي دة كله غلط و ان فكرة الحكومة الجامعة لكل الاتجاهات غلط
حاضر يا سيدي هي غلط بس لية منجربش لية نحرم نفسنا من خوض التجربة
اصل الدستور ينص ............قبل ما تقول
نغير الدستور
اشمعنا غيرنا الدستور في حاجات مالهاش لزمة
ما نحاول نصلح من نفسنا
نحاول نحط ادينا في ادين بعض
يا ترى نقدر
انا شخصيا مع اني مستقل و لا اتبع احد
بعلنها انا ايدي مفتوحة لاي حد من اي حزب حتى الوطني حتى الاخوان اللي قلت اني مش معاهم كل دول انا ايدي مفتوحة ليهم عشان نعمر بلدنا و نخليها في احسن حال
انت اية رايك ؟؟؟؟؟؟؟

22 comments:

فى القلب said...

طبعاً الطبيعى بتاعى الأولى
أحم أحم
وسع كده يا بنى هقول كلمتين جمدين
أحم
..
..
طيب صبرك هقول أهو
أحم

تسلم أيدك يا أستاذ خليييييييييفااااا

أيه يابنى الجموديه دى دى فى الجون عدل
لو الكل بيفكر كده
كنا مشفناش مشاكل كتير ومكنش أجيال كتير عاشت وهى حاسه بموت

دعوه جميله أتكل على الله
كلنا معاك ومش معاهم

انتصار عبد المنعم said...

أنا موش معاهم ولا مع أحد تاني
هم كلهم بشر
يخطئ ويصيب
لو قلت معاهم هم موش حايخلونا معاهم ولو اتقبض عليك وعلي
مافيش حد منهم حايفكر فينا
أما موضوع ان الدنيا تبقى زي ما بتقول كدة بمبي وكل واحد حر والحكومة تعمل جدعة مع الكل
أنا بقولك
صح النوم
ياريت ماتحلمش
عشان ما ننزلش على جدور رقبتنا
ويومين في الحجز بيفوقوا أجدع واحد

maro said...

ايه ده ؟
هو انت بتقول انت مش معاهم ع الاخوان ؟
يا راجل فكرك بتقول ع الحزب الوطنى
ثم ما علينا
المشروع اللى انت طرحته مشروع مهم و دول كتير عملاه اللى هو مشروع الحكومه النيابيه اللى بتمثل الشسعب و فيها من كل طوائف الشعب
ده مش هيكون فى لا سرقه و لا فساد و لا ظلم لان لو حزب من الاحزاب عمل اى حاجه الكل هياكله ع شان يطاع هو الحزب الافضل
و طل واحد هيمسك للتانى ع الغلطه و فى الاخر احنا المستفيدين
لكن هيمنه حزب واحد ع السلطه ده بيخليه يقتل و يسرق و يغرق و ينهب و يظلم و يعذب ووووووووو

ارحم دماغك! said...

طب مين اللي في إيده يعمل كدة مش الحكومة؟
هي اللي كلها فاسدين عايزين يتحكموا في رقابينا وبس!

أحمد المصري said...

ده ممكن يحصل بس في الأحلام00يابني الناس نسيت البلد وفضيه إما لصرعات شخصية أو صراعات فكرية على أحقية العمل السياسي أو أحقية الوجود من الأصل0
مفيش فايدة الدعوة كويسة بس مفيش حد بيسمع0

Monzer said...

بص والله انا زيك
وهافضل مع الحق
لان العملية ملغبطة
وبصراحة مش عاوز اتساق
وخايف ان أثق فى حد
ويطلع فى الآخر شيطان كبييييييييييييير
أي كان الحد ده اخوانى او علمانى

لان الشحصيات الكاريزمية لما تقرب منها بيبقى فيه احتمالين لاما تعرفها على حقيقتها وتطلع حقيقتها مزيفة فتجيلك صدمة واكتئاب شديدين
أو تحبها جدا لدرجة انها تستغلك وتسوقك قدامه
وبصراحة انا مش عاوز اتساق فى الوقت الحالى لغاية ما اعرفراسى من رجلى
صح ولا ايه
تحياتى ليك يا شاعر يا كبير

صاحب البوابــة said...

ويبقى حب الوطن

هو الرابط الذي يجمع الكل

تحياتي عزيزي

ibn nasser - ابن ناصر said...

والله علي قولك لو الناس تعمل للبلد
والناس اللي بتعمل للبلد بتمشي ورا ناس مش عاوزة غير مصالحها الشخصية
موضوع رائع جدا
تحياتي

sokoothansawat said...

تثير عندي حب الجدل يا شمس

شوف...تعالى نتفق على إتفاق

إحنا الجيل الي باقي..وكل القيادات في كل الإتجاهات دي هما الجيل الي رايح

تعالي كمان نتفق على إن مصالح حزب لابد ان تتعارض بالضرورة مع مصالح الأخر

عشان كده...إحنا لازم ندور إزاي نبني نفسنا إحنا صح..و نخلق مزيج الأفكار الخاص بينا..بعيدا عن فكرة الإنسياق الي منذر خايف منها

خلونا نخرج برة هالة التقديس..ونتفق على ان الصواب والخطأ ليسوا ذو معيار واحد...و عشان كده كل واحد فاكر نفسة بيخدم البلد بطريقته

الحل بقى...إننا ما نقفلش قنوات التواصل ما بينا مهما إختلفنا

يعني مثلا....حزب الجبهة متضامن مع حزب الوفد في حملة الإكتتاب الي يقودها الوفد ضد بيع بنك القاهرة...رغم ان الحزبين متعارضين شكلا و موضوعا...لكن إتفقوا على رؤية مشتركة...هو ده الي احنا محتاجينة

اننا نوحد جهودنا مهما إختلفنا في المضمون....لحد لما نحقق هدف افضل...وهدفي إننا نخلق مناخ صحي لممارسة الديموقراطية...,نربي نفسنا اننا شعب محترم حتى لو الحكومة اقنعتنا كل يوم بعكس كده


و عشان كده..انا معاك المرة دي

فى القلب said...

ضفنا سيادتكم على الما سنجر ولا حس ولا خبر

shams said...

في القب
و الله اجمل حاجة قلتيها بجد
فهمتي اللي عايز اقوله

shams said...

انتصار عبد المنعم
حبة تفائل شوية
مش انا اللي هقلكوا على التفائل

shams said...

maro
انت كدة فهمت قصدي بالظبط و يارب يحصل

shams said...

ارحم دماغك
لو الحكومة في ايدها كل حاجة احنا فين

shams said...

احمد المصري
يمكن يكون عندك حق مفيش فايدة
بس تفتكر ما نحلمش يعني

shams said...

Monzer
بصراحة يا منذر عندك حق و رايك في الشخصيات الكبيرة صح
بس اللي ملوش كبير لازم يشتليوا كبير

shams said...

صاحب البوابة



خير الكلام ما قل و دل
و بصراحة قلت المفيد

shams said...

ابن ناصر
ما هم لازم يمشوا ورا حد
عشان السن الصغير و قله الخبرة هي اللي بتخلينا محتاجين قدوة

shams said...

سكوت هنصوت
بصي انا هقلك على حاجة
معيار الصح و الغلط موجود و احنا نقدر نحكم علية
بس بينهما امور متشابهة
لامز يكون حد قائد يحكم فيها عشان كدة لازم ندور نبقى مع مين
اما عن مسئلة ان احنا نتبع المبدا اللي نقتنع بيه او نتفق على المصلحة العامة فدة اللي بنعمله دلوقتي لحد ما نلاقي حل

shams said...

في القلب
متهيئلي كدة بقينا فريق واحد

nosha said...

أنت طبعاً عارف ردي عليك وعلى البوست الجميل ده ..... لأني أنا نفسي مش معاهم من الأساس
بس كل اللي أقدر أقوله ليك إن أحلامك زي الفل ويمكن جزء كبير منها أحلام كل اللي بيحبوا البلد دي بجد بس !!! لما تفوق يا حبيبي وتصحى هتلاقي يافطة كبيرة قدامك تقولك مرحباً بك في مصر (الدخول لأعضاء الحزب الوطني فقط )
وساعتها بس هتعرف أنك في كابوس كبير ومحدش عارف نهايته فين يا شمس يا عاشق
تحياتي يا صاحبي

shams said...

على فكرة انا محتاج ضروري اجنة و شاكوش عشان اشيل اليافطة دي