My Visitors If you cann't read arabic you can know how I think you can visit this link

January 27, 2008

هتمشي يا ريس

هتمشي يا ريس

في اشاعة كدة رايحة و جاية
يا رئيس الجمهورية
انك في الفترة الجاية
هتسيبنا و ترحل عنا

ازاي انا مش مصدق
دي اشاعة صحيح تقلق
و إن صدقناها هنغرق
دة انت عملهالنا جنه

هتسيبنا كدة في النار
وسط الغلا و الاسعار
و الشعب يعيش محتار
و النبي ترجع و ارحمناه

بصراحة انا مش كداب
جبتلنا الاكتئاب
بالظلم و الارهاب
بس فراقك وجعنا

و اكملك الاشاعات
دة قالوا حاجات و حاجات
انك ابو الواجبات
على طول دايما فاكرنا

بس اوعى لصوتنا تسمع
دة شعب عايز يدلع
و فاكرك آل اية مجدع
على طول نفسك تكرمنا

ما تقلي بجد يا ريس
انا ضايع و لا كويس
انا فايق و لا بهيس
اصل انت حبيبنا اللي فهمنا

طب كلمة و خدها بجد
و ابقى اسأل أي حد
في بينا و بينك سد
شيله و حاول تسمعنا

19 comments:

احمد الجيزاوى said...

يمشى ايه
مرة حسنى مبارك راجع من جنوب افرقيا ومديلوة هديه زحلفه فسئل نظيف ايه معنه الزحلفه دة ققاله نظيف دة معنه كبير
انه بتعيش 200سنه
فرد مبارك وقله
طيب ادينا قعدين لمه نشوف
وافهم انت
تحياتى يا شاعر المدونين
احمد الجيزاوى

MeDoOoOoOo said...

أنا لازم أحيك علي القصيدة الجامدة دي بجد والله حلوة

محمد مارو said...

ايه ده ياض انت الجمال ده ؟
يخرب مطنك

انت بجد رائع

دى بتاعك بجد ؟
و لا سرقها
اعترف
اعترف
الانكار مش هيفيدك

المكان كله محاصر

قوووووووووووووول

و لا اقولك خلاص انا مصدق انك اللى كتبها
بس بجد رائعه
ساااااااااااااااااااااانكس

سهر الليالى said...

هههههههههه
صحيح شر البليه ما يضحك

بس بجد جامدة موت وهلكت من الضحك
وبمناسبه النكت اللى اتطرحت

بيقولك واحد لقى مصباح فحكو طلعلو العفريت قالو عاوز ايه .. قالو عاوزك تعملى كوبرى من مصر للصين ... قام العفريت قالو لا دى صعبه اوى .. شفلك حاجة تانية .. قالو طيب عايزك تشيل حسنى مبارك من الرئاسه .. قاول طب انت عاوز الكوبرى رايح جاى ولا رايح بس

تحياتى وتسلم ايديك

حسن مدني said...

لا حيشيل السد
ولا حيسمعك
ولا حيسمعنا

ولا حيمشي طبعا

تحياتي

Empress appy said...

لا هيسمع وهيشيل كل حاجه وهيقعد على قلبك مش ماشى
انت يا ابنى ناوى على حبسنا انا عارفه انت هيست بدرى يا شمس وكان بدرى عليك يا قلبى

Desert cat said...

يمشى
اه يا شمس هو فعلا هيمشى
بس ان شاء الله فى حياة احفاد احفاد احفاد احفادك كدا ربنا يدى احفادنا طولة العمر يااااااارب

إنسان || Human said...

محاولة جميلة ياشمس ...ربنا يوفقك
ده أولاً
ثانياً أن بعتذر إن أن ماردتش على التاج اللي انت كنت عامله الشهر اللي فات وللأسف أن ماشفتوش إلا النهاردة اصل انا كنت مشغول بسبب الإمتحانات ..وان شاء الله هارد على التاج قريب على
lightwhispering
وخلي بالك انا مستني تعليقك وأوعى تزعل

ابن رشد said...

احمد الجيزاوي
تحياتي ليك يا مناضل
بس مش مستحيل يمشي و لا حاجة

ابن رشد said...

حقوقي
ربنا يخليك يا ابو جولدا بس مش عايزنها اخر زيارة

ابن رشد said...

محمد مارو
قصيدتي و الله يا كابتن
و سانكس على واجب

ابن رشد said...

سهر الليالي
اية حكاية النكت معاكوا
بس كفاية ان القصيدة عجبتكوا

ابن رشد said...

حسن مدني
و لا اي حاجة طب نروح نموت يعني و لا اية

ابن رشد said...

appy
الهم و الغم يخلي الواحد يهيس اساسي

ابن رشد said...

desert cat
لية و احنا رحنا فين
هنقول
لالالالالالالالالالالالالالالالالا

ابن رشد said...

human
هجيلك ان شاء الله و مقدرش ازعل منك

عاشقة الوطن said...

السلام عليكم

ازيك ياشمس

كلامك كله منطق
ياترى ياريس هتحل عنا ولا انت ناوى تستنى لما احنا اللى نحل عنك

حياتنا كلها واقفة ومش عاوزة تتحرك
واقفة وراكدة بسبب معايك ياريس

هو صحيح ناوى يحل عنا فى يوم من الايام ولا ديه اشاعات

تصدق كلامك وجعنى
لان بجد نفسي عمك ده يحل عنا بقي

أحمد عبد الفتاح said...

جامدة جدا

Anonymous said...

بسم الله
والله القصيدة جميله الله يكرمك دايما بتمتع بقصايدك وكمان موضوعاتك كلها جميله وبتعجبنى وربنا يوفقك