My Visitors If you cann't read arabic you can know how I think you can visit this link

March 27, 2007

هي دي الاغلبية و لا بلاش

بسم الله الرحمن الرحيم
زي كل يوم بحب صباحا اطالع الاخبار و اشوف اية اللي بيحصل في المحروسة و كان اول المقالات اللي قمت بقرائتها اليوم عن التعديلات الدستورية كان يقول ( و هو من موقع الس ان ان )
27 بالمائة نسبة المشاركة في التعديلات الدستورية
انا بصراحة مستغربتش لأن احنا قلنا يا جماعة من زمان ان التعديلات دي متستحقش حتى نقول عليها لأ انا كل اللي هقولة حسبي الله و نعم الوكيل ، بس ما علينا انا اسيب الخبر دة و اشوف اللي بعدة و الخبر اللي بعدة كان جميل خالص
75.9 بالمائة من المقترعين قالوا نعم للدستور
الله اكبر ما شاء الله يا فرحة قلبي 75.9 % من المقترعين وافقوا يا سلام على الديموقراطية اللي في البلد معلش بقى يا جماعة احنا حتى لو معترضين لازم نخضع لرأي الاغلبية شئ جميل انا من فرحتى محتاج اصرخ ، بس ما علينا انا مش لازم ازعل من اول اليوم عشان لسة الاخبار طول اليوم متوالية .
لكن و بالمصادفة و لأني عشان مهندس الحسابات بتجري في دمي قلت امسك الالة الحاسبة و العب شوية يعني مثلا
0.27 نسبة المشاكة × 70000000 ( عدد المواطنين ) =18900000
يعني اللي شاركوا كانوا ما يقارب ال 19 مليون نسمة يبقى كام واحد وافق و قال نعم
18900000 ( شاركوا ) × 0.75 ( نسبة الموافقة ) = 14175000
يعني بالعربي 14 مليون و شوية فكة نقول 15 مليون يعني من الشعب المصري وافق على الدستور الجديد 15 مليون مواطن و طبعا يا جماعة دول 15 مليون صوت انا متأكد من حكومتنا لم تزور صوتنا واحد ، يعني بالهندسة كدة وافق على الدستور من الاحياء على ارض المحروسة نسبة 21 بالمائة من المواطنين
لا فعلا يا جماعة دي اغلبية و واضحة انها اغلبية
و هصدق انها اغلبية بس يضعوا مادة جديدة في الدستور تنص على ان الاغلبية مش من 50 % بل من 20 %
( حسبي الله و نعم الوكيل )

2 comments:

Rania said...

قلبك ابيض يا مواطن يا مصرى
متحرقش فى دمك بقى
خلاص خلصت
و مبروك علينا التعديلات يا مصرى للنهاية
حسبى الله و نعم الوكيل
على فكرة من الواضح انك مغلول قوى
كلنا و الله

shams said...

مرسي قوي يا رانيا على زيارتك و بصراحة انا فعلا مغلول
و حسبي الله و نعم الوكيل