My Visitors If you cann't read arabic you can know how I think you can visit this link

January 03, 2008

عاطل لية يا بلادي

عاطل لية يا بلادي

فك قيودي انا عايز اتكلم
سبني احكيلك ازاي بتألم
سبني اقول كل اللي في قلبي
دة انا قلبي عايز يترمم

انا واحد زيك غلبان
عاش يحلم بحقه كانسان
شخصه كشخص الفارس
و قلبه دة قلب الفنان

الحكاية من اول المدرسة
كانت امي تقول كلمة كويسة
اتعلم و اكبر بشهادتك
علامك سند الجيوب المفلسة

ادينا خدنا شهادة العلم سلاح
شهادة كبيرة مضمونها فلاح
مكتوب عليها مبروك للمهندس
و المهندس جاي المهندس راح

قومي يا بلدي و ردي علية
انا جايلك و سماتي قوية
انا جاي بايع حبي لمصر
و في حبك طالب العبودية

من غير ما هطول و لا اماطل
كان رد بلادي " بقيت عاطل"
و دة ردك يا بلادي علية
اسمحيلي دة رد باطل باطل

يا مصر انا عايز حق الحب
انا عايز حق دموع القلب
حبيتك يا بلادي فين ردك
و لا الوطنية دي كدب في كدب

26 comments:

Unknown said...

اه يا شاعر يا زعيم يا واجع قلبنا
اسئله فعلا محتاجه اجابه
تبقي كارثه لو الوطنيه دي كدب في كدب
كلامك جميل اوي و علي الجرح اوي اوي

Anonymous said...

على راى المثل بتاع على حزب وداد :
متقولش ايه ادتنا مصر
قول :
الله يخرب بيت ساكن القصر

shimaa mahdy said...

ايه ده، حتى بتوع الهندسة مش لاقين شغل، دا أنا كنت فكراهم بيشتغلوا على طول، أمال مين اللى بيشتغلوا فى البلد ده؟؟

اسامة يس said...

ولا الوطنية دي كدب في كدب....

معاك حق يا صديقي ...

وكلامك سليم...

لكنه الخلط القائم بين مصر من جهه كوطن وبين نظام قائم من جهة اخرى...
واظن اني عالجت هذا الموضوع في بوست لك يا مصر السلامة ...

جميله هي صرختك ..
دمت بكل ود..
خالص تحياتي

Anonymous said...

اخى الفاضل
كل عام وانت والجميع بخير
واتمن من الله ان يكون العام القادم احسن من السابق
وان تتحقق امنياتنا جميعا
وان تجد اجابات على اسئلتك فى هذه القصيدة الجميلة

بنت الاسلام said...

كلماتك جميلة
وحزينة
ومشكلتك مشكلتنا كلنا

مش عارفة ااقولك ايه

ولا تعمل ايه

لانك اكيد حاولت

وتعبت

برده مش قادرة ااقولك حاول تاني

لانك اكيد حاولت تاني وتالت ورابع

اومال بس ااقولك ايه

بقولك ربنا كبير

ومين عالم

مين

ابو النجوم said...

عزيزى/ شمس
اولا انا فاكك قيودك واتكلم براحتك بس اتحمل مسئولية الكلام.انا عندى لك شغلانة فى دايرة بطال باشا تقعد انت والمقاطيع تعبوا الظل فى زجاجات وبطال باشا لة جروب مشهور على الفيس بوك اسمة انا عاطل وانا هااوصى عليك.
عادل نجم

سهر الليالى said...

بلدك تعبانه ومش راح تقدر ترد
عشان كات عايزة حد يحبها ويرعاها بجد
مش بنهبها ويبقى كلو هات ولا فيش مرة خد

كلامك جميل ويوجع
أما بالنسبه لحكايه العلم سلاح دى فسامحنى مش هقدر أرد لأنى حسيت أنهم كانو بينصبو علينا فى العلم نفسه
حسبنا الله ونعم الوكيل

تحياتى

ابن رشد said...

EmY
والله انت عسوله يا ايمي
اية رايك شاعر و زعيم و عاطل
و مكتر الجراح

ابن رشد said...

غير معرف
الله يخرببيت ساكن القصر ميت مرة
ربنا يحرقة

ابن رشد said...

shimaa mahdy
اخيرا نورتي مدونتي
بسعلى فكرة محدش بيشتغل في البلد دي
امال هي مدهورة لية

ابن رشد said...

osama
لذيذ اوي تعقيبك في فرقما بينمصر كوطن و كشعب ونظام
بس خلي بالك
الوطن يضم الشعب و النظام

ابن رشد said...

حسن توفيق
يارب يكون عامجميل علينا كلنا و اشتغل بقى

ابن رشد said...

بنت الاسلام
ربنا كبير على كل ظالم و على الحكومة بالذات

ابن رشد said...

ابو النجوم
الحمد لله انك فكتني كل اللي علقوا محدش فكني
انت سمتني بطال باشا زعيم البطالة
ماشي يا ابو النجوم

ابن رشد said...

سهر الليالي
و النبي كانوا بينصبوا علينا و جاية تقوليلي الصدمة دي بعد العمر دة كله

walaa said...

انا عايز حق دموع القلب
حبيتك يا بلادي فين ردك
و لا الوطنية دي كدب في كدب

الوطنيه مش كدب ولا حاجه يا شمس مصر هى كمان بتحبك وبتبصلك وكلها دموع علشان انت صعبان عاليها وبتقولك انقذنى من الاسر اللى انا فيه مصر منهوبه ومظلومه وشعبها واقف يتفرج عاليها وكمان بيلومها عاملنلاها ايه علشان نخلاصها من الاسر ونخلص احنا كمان مناللى احنا فيه
تحياتى لك ولاء

Anonymous said...

اخينا الفاضل
شمس
اتمنى من الله ان تكون بخير
فى انتظارك ضرورى اليوم على الياهو او الهوت ميل لامر هام يخص الاتحاد
انا موجود من السادسة مساءا
شكرا لك لا تتاخر

إسلام said...

شمس
احب احيك علي الوست الرائع
مما جاء فيه من شعر وكلامات معبره
بس اللي اقدر اقوله لك
انت عايز تكون عايش في مصر متكنش عاطل
ده نسبه الشغل في بلدك دي
متجيش نسبه واحد في المليون
نحياتي

shimaa mahdy said...

أنا بجى كتير على فكرة، بس كنت أول مرة أسيب تعليق

الشريف / جمال طة said...

سؤال الى الكونجرس ألأمريكى والمنظمة الدولية لحقوق الانسان

أين حقوق الانسان والديمقراطية من الأتجـــار بالبشر والعبوديـــــــــــة فى المملكة العربية السعودية
تحت أسم نظام الكفالة المقيت متـى تتحرك أمريكا والاتحاد ألأوروبى ومنظمات حقوق الانسان فى العالم لالغاء نظام الكفالة والاتجــار
بالبشر للقضــــــــــــــــــــاء على الارهاب والتطرف فى العالم


http://gamal51.blogspot.com

http://anameshm3ahom.blogspot.com/2007/12/blog-post_11.html

http://kalam3eal.blogspot.com/2007/12/blog-post.html

ابن رشد said...

walaa
طب تفتكري يا ولاء ننقذ البلد ازاي هنقدر نعمل اية يعني

ابن رشد said...

اسلام
طب الحمد لله ان البلد كلها عواطلية مش انا لوحدي

ابن رشد said...

shimaa mahdy
تنوري في اي وقت

Anonymous said...

الوطن يا شمس

مش وظيفة

مش بحر

مش أرض

مش أهرام

مصرنا جوانا

رمز كبير

رمز بيدينا الأمل

بيدينا القوة

وان شاء الله شمس الحق هتظهر

مهما طال الليل

تقبل تحيتى

أخوك نيجــر

ابن رشد said...

احمدسعيد
مصر جوانا حب كبير اوي و امل كبير و ام جميلة بس عجزت و صابها المرض