My Visitors If you cann't read arabic you can know how I think you can visit this link

February 05, 2008

هييييييييييه .........اتعلمت اللغة

"اتعلم اللغة "
الكلمة دي اتقالت في فيلم " الكيف " مرتين مرة من بوسي و هي عايزة تعلم ابنها الصغير اللغة الانجليزية و مرة من محمود عبد العزيز و هو عايز يعلم اخوة لغة تجار المخدرات
و السؤال هنا احنا عندنا هنا في مصر بلدنا الحبيبة كام لغة
واحد ذكي اوي و نبيه يرد و يقول ----->اللغة العربية
اقله انت فالح اجابتك غلط و اخرج من المسابقة لان احنا عندنا اكتر من لغة
مبدئيا اللغة العربية اللي قال عنها الخالق عز و جل
إنا أنزلناه قرآناً عربياً
و اللغات الاخرى بقى خد عندك مبدئيا اللغة المنطوقة فيما بيننا اللي اختلفت و اقتحمتها اللغات الانجليزية و الفرنسية
و تيجي تكلم واحد يرد عليك بكل شياكة
merci
خلاص الفرنساوي واخد حقه قوى من الثقافة يعني لو كان رد و قال "شكرا " كان هيدفع دمغة مثلا
و يا سلام لو بتكلم واحد و بتسأله عن حاجة و بيجاوبك بالنفي
never never
خلاص اصل الاخ مثقف اوي و حتى لو لاحظنا نفسنا و احنا بنتكلم هنلاقي نفسنا بننطق بكلمات انجليزية كتير جدا مش عارف لية
و خد عندك بقى اخر اللغات اللي لسة نازلة مصر جديد
لغة حقيقي انا مش عارف اسمها لكن ممكن اقلكوا على بعض مفرادتها و انتوا هتعرفوها
نفض - كبر - احلق - ظبط - امرز - عيش - زنجف - هشك - بشك -فلسع - مانتم
و طبعا الكلمات دي حروفها عربية بس اتحداك لو جبت قاموس في العالم كلة يترجمها و عشان تترجمها يتوجب عليك في هذه الحالة ان تسئل ناطقها عن معناها و بعد ما تعرف معناها يتوجب عليك استخدامها و إلا فلن تصبح من هذا الجيل المتحضر
طبعا دة كان عرض سريع للغات اللي احنا بنحاول ننطقها
و هنا يأتي السؤال
هل نخجل من التحدث باللغة العربية ؟
هل اللغة العربية تورثت الينا ناقصة بعض الكلمات فاضطررنا للتعويض بلغات اخرى ؟
الاسئلة دي انتوا اللي هتجاوبوا عليها مش انا
نيجي بقى و نتكلم عن اللغة المكتوبة و دي موالها موال ، انا عايز حد و نفسي و منا عيني الاقي حد يديني تفسير اية سر الفرانكوا عرب المنتشر على الماسنجرات و رسايل المحمول دة
قال يعني خلاص الواد يا عيني ايدة مش بتعرف تروح الا على الحروف الانجليزي و بس
انا مش هحاول اطول في موضوع الفرانكوا عرب دة عشان اتكلمنا عنه قبل كدة في بوست سابق
طبعا انا ممكن الاقي حد ساب الموضوع كله و علق على الموضوع
طب ما انت يا شمس كاتب البوست اهو باللغة العامية
مش هقدر ارد غير اني بحاول اوصل لعقول و قلوب قرائنا بسرعة و ان كان هذا خطأ ممكن من الان فصاعدا اكتب باللغة العربية و لكن هل دة راي قراء مدونة مصري للنهاية ؟؟؟؟ دة كمان سؤال اخر كدة بقوا ثلاث اسئلة ناخد بالنا
------------
طب و الحل اية هل انا كاتب البوست دة عشان اقول المشكلة و امشي
لا طبعا و اطلاقا
بس قبل ما نقول الحل لازم نعرف حاجة مهمة جدا
ان الالماني او الفرنسي لو قابلته و حاولت تتكلم معاه بلغة غير لغته عن قصد ممكن يتجاهلك
لازم نعرف ان من اهم سمات الشعب الفرنسي الحفاظ على لغته
لازم نعرف ان لو فضلنا كدة بعد سنين مش قصيرة طبعا و ممكن تكون عقود هنلاقي المصريين كلهم لا يتحدثوا بالعربية و ساعتها يبقى لغة القران اندثرت في مصر
لازم نعرف ان اللي بيتكلم عربي فقط دة مش فلاح و لا بيئة ( و طبعا انا مش ضد تعلم اللغات الاخرى لزيادة ثقافتنا ) لكن انا ضد عدم الانتماء الي اللغة الام
طبعا انتوا بعد قصيدة لازم نعرف اللي عدت دي مستنين الحل
الحل بسيط مبدئيا نشعر بجمال اللغة العربية
ثانيا راجع سطور لازم نعرف اللي لسة كاتبها دي
و ابقى اشوف حد تاني بيكتبلي فرانكوا عرب عشان الموضوع دة بينرفزني جدا
و قبل ما اقول النهاية كنت عايز اخلي قرائنا كلهم يتفرجوا على المقطع دة لمصطفى محمود
و اخص بالشكر ربة السيف و القلم على ارسالها هذا المقطع لمدونة مصري للنهاية
و الي اللقاء في الحلقة القادمة
كان معكم
شمس الزناتي
من امام شاشة الكمبيوتر

22 comments:

Dr-Ahmed said...

الموضوع شيق جدا يشمس..وفعلا في الفيلم كانت حكايه اتعلمت اللغه باينه وظاهره اوي خاصه في الاخر لما اتلعمها فعلا لكن كان سقط في الهاويه..هاويه المخدرات..

بس انا ليا تعليق ...لو انت شفت الجزائر مثلا ..هتعرف ان مصر محافظه علي لغتها بالرغم من دخول المصطلحات الاجنيبه علينا كتير ذي اللي ذكرتها..

لو احنا مش متمسكين باللغه كنا هنبقي زي الجزائر بنتكلم فرنساوي واحنا دوله عربيه ...

لكن ...

اللغه العربيه لها حلاوه تانيه يكفي انها لغه القران الكريم ....

محمد عـنـانـى said...

بصراحه شجاعه ادبيه منك
الموضوع ده برضو على الفيس بوك
احنا عايزين نقول للناس احنا عرب
امتنا عربيه
ده غزو للثقافه العربيه
فى موقف حصل مع واحد اعرفو وهو فى المركز الثقافى الفرنسى
كان عايز كتاب فرنساوى بس مترجم
كان الرد من مدير المكتبه دى ثقافتنا
لكن احنا الثقافه عندنا مفتوحه على البحرى والبحر
مش كفايه الهجات الغريبه
شمس
تحياتى

hekaytna said...

يا عم شمس لغة ايه انا كتبت عنها قبلك طبعا انت عارف انا في ابو ظبي دلوقت معظم اللي هنا هنود وباكستانين وكلهم بيتكلمو عربي غريب قوي فوق ما تتصور وكمان حلقة الدكتور مصطفي محمودكويسه بجد
تحياتي

بنت الاسلام said...

دي اصبحت ظاهرة وعلامة مميزة للتمدن والتحضر انك ترطن وكلمة ترطن دي برده حيود عن اللغة بس عديها بقي انك ترطن باللغات الاجنبية نفسي افهم جت منين بقي ومين الي اصدر فرمان بان التمدن بقي بكدة

اما بقي المصطلحات الغريبة الي انت كاتبها واصبحت كلمات متداولة فعلا فدا علامة ان الواد ده مطقطق والبت دي روشة وخرجت من اطار المفروض لاطار حريتها زي ماهي فاكرة

الصراحة

ده جيل

مايعلم به الا ربنا

عيال اخر زمن

موضوع شيق

وللاسف واقعي مليون في المية

تحياتي

ريهام said...

الموضوع حلو يا شمس وفعلا مهم ويمكن كلنا حاسين بنفس الخطر وان اللغه العربيه دى هييجى عليها يوم وتندثر بس نعمل ايه ؟ غصب عنك مع التطور والتقدم وعصر السرعه اللى احنا فيه ان كل حاجه اصيله وقديمه تضيع . بس ان شاء الله نحاول نحافظ على اللغه العربيه ونتكلم بيها . يمكن السبب فى اللى بيحصل ده ان مفيش انتماء مفيش احساس بالامان وغصب عنك لازم تتعلم لغات اخرى ومش غلط اننا نتعلم لغات اخرى الغلطه ان اللغات دى تطغى على لغتنا الام ويارب نلاقى حل قريب للمشكله دى ايدى على كتفك

mo'men mohamed said...

مفيش مانع انك تتكلم بالعامية
لكن العيب انك تبدل العربية تبديل تام او تدخل عليها مصطلحات مش من اصلها كبديل عن أشمل واعم لغة على الأرض
السلام عليكم

عاشقة الوطن said...

السلام عليكم

ازيك ياشمس الزناتى

الناس اللى بتستخدم اللغات التانية فى وسط كلامها شياكة يعنى ورقة بقي
مش واخد بالك انت

هو حكاية اللغة العربية اكيد لازم نحافظ عليها ومبحبش برضه اللى يقعد يقول كلمة عربي وتلت كلامه لغات مختلفة
مش حلو النظام ده خااالص

لازم نتعلم ونعرف ان لغتنا من احلى اللغات اللى موجودة على وجه الأرض
لغة القرآن

تحياتى على الموضوع المهم والجميل

يورو said...

والله احنا كل يوم بنسمع لاول مره كلمه غريبه
يوم بعد يوم تتكرر الكلمه لحد م تبقى مألوفه بالنسبالنا
بعدين نبتدى نرددها
لحد م تبقى كلمه فى قاموسنا احنا

نرجع ندور عن اصل الكلمه ..نحتار فيها ويفضل السؤال
هو فعلا السبب انه كل جيل وليه اسلوب وفكر وحتى لغه خاصه بيه ؟؟
ولا زى م قولت يا شمس احنا بعدنا عن القران وعن اللغه الاصليه بتاعتنا او اللغه عندنا مش مكفيانا فبنستورد كلمات تعززنا ولا اى ؟؟

ابن رشد said...

Dr : Ahmed
و لية ندي لنفسنا امثال بالاخرين اللي مش بيحافظوا على لغتهم لية مش ندي مثال بالاحسن

ابن رشد said...

mohamed el3nany
تحياتي ليك بس لازم نبدأ بنفسنا لازم نتغير

ابن رشد said...

hekaytna
ربنا يخليك يارب يكون الموضوع عجبك و طمهنا عليك في الامارات

ابن رشد said...

بنت الاسلام
و بعد للاسف المطلوب نعيط على نفسنا و لا نعمل اية طيب نموت و ندفن عشان احنا من الطراز القديم

ابن رشد said...

ريهام
جبتي المفيد كله و الله تحياتي
قلتي العلاج و الصح و الغلطياريت كل اللي يخش يقرا تعليقك دة

ابن رشد said...

mo'men mohamed
لا يوجد بديل للغتنا احنا اللي بنعمله حاليا بنرقص على السلم

ابن رشد said...

عاشقة الوطن
و الله انا كتبت كدة عشان الناس تتعلم ة اديكي شايفة

ابن رشد said...

يورو
المشكلة مش ف ثقافة الجيل المشكلة في الجيل الذي قبل احتلال اللغات الاخرى

ahmed mefrh said...

السلام عليكم
ازيك حبيبى شمس
بصراحه اخى مقالك جميل جدا
اللغه العربيه للاسف فى مصر كانت ضحيه مؤامره كبرى و الضحيه كان المصرى
و سأل افلام الستينات و شكل مدرس الغه العربيه
و اسأل ماذا كان يفعل بمدرسى الغه العربيه فى عهد الاحتلال
و غير كده او كده اسأل امتحان اللغه العربيه فى المدارس و خصوصا النحو
تحياتى ابو مفراح

Anonymous said...

الأخوة الكرام
بعد قراءة متأنية لكل من مدونتي رباني ومدونة عربي وبس
علي الرابطين التاليين :-
http://rubbani.maktoobblog.com/
http://marwane90.maktoobblog.com

بعد ثبات رفض صاحبي تلك المدونتين لمبدأ الحوار , ومقارعة الحجة بالحجة , والبرهان بالبرهان ....

فإن الاتحاد الفيدرالي , تبعا لمواثيقه , ولائحة أهدافه , -وقبل كل هذا - غيرة أعضاءه ومؤسسيه على دينهم -, يعلن رفضه التام , لما في هاتين المدونتين من اساءة بالغة لله وللديانات السماوية ....
ورفضه لسلبية ادراة مكتوب , إزاء وجود هاتين المدونتين في الساحة التدوينية ....
وبناء عليه , فإننا , نطالب كل الغيورين على دينهم , بالتضامن معنا , من أجل القيام بحركة مناهضة لتلك المدونتين ومثيلاتهما

وسنبدأ بتفعيل اقتراح الزميل , العضو / أبو بكر الصديق ....الذي اقترح ما يلي :-

تقديم الشكوى ضد هذه المدونات بإحدى هذه الطرق : -
1- عن طريق وصلة أبلغ عن إساءة على نفس المدونة
2- عن طريق إرسال إيميل لإدارة مكتوب على العنوان blogs@maktoob.com
3- عن طريق إرسال إيميل لإدارة مكتوب على العنون abuse@maktoob.com

**ونرجو من الجميع , من كل غيور على دينه , بلا استثناء , التفاعل مع هذه القضية , التي تمس كراماتنا العقائدية جميعا ......

***على أن يتم الجد في ارسال الشكوى ضد هذه المدونات, للروابط السابقة, في الفترة ما بين تاريخ نشر هذا الادراج , حتى اليوم الخامس عشر من هذا الشهر , والذي سننتقل فيه إلى خطوة اخرى لمناهضتها, ما إن لم تستجب ادارة مكتوب , لشطب هاتين المدونتين , قبل هذا التاريخ ...

***ويمكن ارسال أي صيغة للشكوى , أو ما يحمل معناه , على أن تحتوى الشكاوى المقدمة اسمي المدونتين ورابطيهما بوضوح

ـــــــــــــــــــــــــــــــــــ
صيغة الاتحاد الفيدرالي للمدونين , لعريضة الشكوى :-

بسم الله الرحمن الرحيم

السادة الأفاضل / اداريي موقع مكتوب الموقر

تحية طيبة , وبعد

فإننا , بعد اطلاعنا على كل من مدونتي ( رباني ) و ( عربي وبس ) , على الرابطين التاليين , تباعا :

http://rubbani.maktoobblog.com/
http://marwane90.maktoobblog.com

, نعلن استياءنا من محتويهما , وما قام به صاحباهما من مساس بالكثير من المسلمات العقائدية , والسخرية السافرة من الديانات السماوية , بل والتطاول البذيء – والعياذ بالله – على الخالق عز وجل , رب المسلمين والنصاري واليهود بلا تفريق.

وبناء عليه:

فإننا نطالب ادارتكم الموقرة , بشطب هاتين المدونتين , لما فيهما من تناقض مع مواثيق التدوين بموقع مكتوب، ولما فيهما من خدش لكل غيور على دينه , وخروج سافر عن أصول التدوين المتبعة حتى في مقارعة حجة الرأي الحر وحرية التعبير , بحجة الديانات التي نؤمن بها , ولا نقبل المساس بها ولا برسلها الكرام , سلام الله عليهم أجمعين.

نطالبكم بهذا , ثقة , ورغبة منا , في بقاء موقعكم الكريم , صرحا سامقا للكلمة النظيفة , ومنبرا طاهرا للتدوين الراقي ، ونرجو من حضراتكم أخذ الأمر على محمل الجد , كما نتوسم بكم دائما

الاتحاد الفيدرالي للمدونين
http://fbu.maktoobblog.com

حسن مدني said...

أخي شمس
كالعادة أتيت متأخرا كثيرا

إهمال اللغة العربية، والمصطلحات الجديدة، والحديث المطعم باللغات الأجنبية. كلها في النهاية موضوع واحد
الهوية

أظن أن المصطلحات الجديدة، سببها الأول حاجة الإنسان للتعبير عن فكرة لا يجد لها لفظ في قاموسه.. فهو إما يبحث في قاموس اللغات الأخرى، أو يخترع لفظ جديد..
وهذا ناتج عن إهمال اللغة العربية وحتى اللغة العامية المصرية.. أو بعبارة إخرى التخلي عن الهوية العربية والمصرية معا.
ومن جانب آخر بشعر بعض المتظاهرين بالثقافة أن تطعيم حديثهم بكلمات أجنبية يظفي عليهم مظهر العالم والباحث والمثقف. مع أن الكلمات التي تستخدومنها ذات مرادف سهل وبسيط ومشهور في اللغة العربية في كثير من الأحيان.ولكنه إما التعالم، أو الجهل بمدلول الكلمة في اللغة العربية.
وكنت أدعو دائما إلى استخدام لغة عربية فصحى بسيطة في المدونات، كنوع من الحفاظ على لغتنا من جهة، والتواصل مع بقية إخواننا العرب من جهة أخرى.

تحياتي

ابن رشد said...

ابو مفراح
و بعد ان نسال يجب ان نتحرك و نفعل و نذكر دائما

ابن رشد said...

عضو الاتحاد
انا متضامن معكم

ابن رشد said...

استاذ حسن
دعوتك مستمرة و احنا معاك فيها بأذن الله