My Visitors If you cann't read arabic you can know how I think you can visit this link

February 01, 2008

عرفت الخبر و شفت اللي حصل

عرفت الخبر شفت اللي حصل ..........لا و النبي انت معرفتش طب اقلك بقى
سعاد اتخانقت مع سها
و محمد ادخل بينهم و محسن اتخانق معاه
و سعيد قال كلام وحش على سيد
و مصطفى عمل مقلب في عبده
و اكرم بقى هزق فاطمة و نجلاء
و لا ما شفتش انت بقى زينب شكلها بترسم على بهاء


طبعا يا جماعة الاسماء اللي فوق دي اسماء وهمية بس دة اللي لاحظتة في الفترة الاخيرة في المجتمع التدويني الفترة الاخيرة ان المدونين اللي حبيت قلمهم القوي اللي كان بيكتب عن كل كلمة و قضية انت حاسس بيها سواء كانت قضية وطنية او اجتماعية او حتى رومانسية


اتقلبت الاقلام دي كلها لتتوجه في طريق واحد و هو العداء لبعضها


و تلاقي فلان كاتب بوست يشتم فية فلانه و فلانه بترد على فلان بتعليق سخيف


و حاولت كتير ادور على الاسباب وراء كدة............ ملقتش


اية هو المانع وراء ان احنا نحافظ على اسلوبنا و رقي حديثنا و نتحدث مع بعض بالمنطق و من الصحي ان نختلف او نتفق و لكن بالدلائل و ليس بالشتائم


انا حبيت بس يا جماعة انوه عن الموضوع دة في كلمتين


ياريت يا جماعة نعود كما كنا و يعود لنا اسلوبنا الراقي في التحدث مع الاخر


و ان كنا افتقدنا هذا الاسلوب فيجب ان نتعلمه من جديد


و لنجعل الكلمة هي الثمرة على الشفاه


و النغمة على الاذن


دعونا نحول الامل الي حقيقة تعيش بيننا و تترعرع


******************************************


الموضوع التاني ان انا جالي كذا تاج و اصحاب التاجات كلموني و قربوا يزعلوا فكرني منفض عشان كدة انا هجاوبهم كدة في السريع




اول تاج وصلني من كل من




تاج الحصانة





دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
الكوز طبعا


عشان بيلم كتير و بيستحمل في قلبه كتير و انا هيطلع عيني عقبال ما انجح
كنت تفضل الدخول مستقل او تتبع حزب معين ؟؟؟؟
هو محدش سمع اني بكتب في مدونة انا مش معاهم


و دة معناه اني مش معجب بفكر اي حزب
اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
ما لقيتوش غير الوطني طب قولوا حاجة عدله


حزب وداد قلبي مثلاً


لا طبعا انا دخلت مستقل و سأظل مستقل
اول حاجه هتعملها لنفسك ولاسرتك ؟؟؟؟؟
طبعا اول حاجة هعملها لنفسي هجيب بطارية للموبيل عشان لما اهل الدايرة يكلموني الموبيل ما يفصلش كل شوية زي عادته


و لاسرتي هحاول اشغل كل العاطلين زيهم زي اهل الدايرة
ايه المشروع اللى ناوى تعمله لاهل دايرتك ؟؟؟؟ دون ذكر اسم الدائره
اولا عايز اعمل مستشفيات و اجيب مواصلات نظيفة و جديدة بدل المهانه الانسانية ، ههتم جدا بالمدارس اللي بقت صفايح زبالة ، الاهتمام بالطرق عشان لحوادث الكتير اللي على الطرق ، ههتم برغيف العيش في المنطقة ( معندناش حد بيبيع عيش إلا ابو نص جنية ) خلاص انا فلست


قعدت في المجلس جنب نائب مميز . من هو النائب ؟؟؟
طلعت السادات
قدمت سؤال للحكومه ايه هو السؤال ؟؟؟؟؟
سؤال مهم جدا : متى يمكن للحكومة ان تقدم استقالتها و ما هو المطلوب من الشعب لتقدم الحكومة على هذه الخطوة الجريئة ؟

طلب احاطه موضوعه ايه ؟؟؟ وبتقدمه لمين ؟؟؟؟


طلب احاطة هيبقى لرئيس الجمهورية و اقله ممكن يا ريس تسيب الحرس بتوعك و الديوان الملكي بقيادة زكريا عزمي و تنزل تعيش يوم واحد وسطينا في القلعة في الباطنية في الضرب الاحمر في كرموز و لا في طنطا


............ممكن ...........
استجواب لاتنين من الوزراء موضوعه ايه ؟؟؟؟وبتستجوب مين
السيد وزير الخارجية عملت اية في الاراضي المصرية المنهوبة ( ام الرشراش ) و ما تستعبطش و تقول فلسطينية


السيد وزير المالية : فلوس الشعب بتروح فيييييييييييييييييييييييييين
انت مع الخصخصه ؟؟؟؟؟؟
لا طبعا و لو ان الشعب كدة كدة مسروق بالخصخصة او من غيرها بس انا مش معاها
هل انت مع قطع العلاقه مع اسرائيل ؟؟؟؟؟


جدا جدا


يارب نقطع العلاقات من بكرة الصبح


لا بكرة بعيد من دلوقتي لو امكن
وما يترتب عليه من معامله العدو هل تؤيد الحرب على العراق ؟؟؟؟؟؟؟؟
اطلاقا


لا طبعا


دي دولة عربية شقيقية
هل تؤيد مرور الامريكان فى القناه ؟؟؟؟؟؟


مرور سلمي ممكن


مرور اسلحة و ذخيرة و الالات حرب يبقى لا و الف لا
هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟
مين .....فين ....اية


لا و النبي ما اعرف


بس لو اعرف كنت اشتركت


بتمرر التاج ده لمين ؟؟؟؟؟؟


هتعرف في التاج اللي بعده


********************************************


التاج دة بقى جاني من




نشوفه هيقول اية


هل توافق على حزف خانة الديانة من البطاقة الشخصية ؟


لا طبعا


دة في عيال انا مش بعرف ملتهم اية غير من البطاقة
ما رأيك فى المثليين ؟


منهم من هم مرضي نفسيين و ندعو لهم الله بالشفاء دة لو كانوا هما عايزين يتعالجوا


و منهم اللي بيستعبط و عايز الولعة بجاز


هل هى حرية شخصية ؟


مفيش حاجة تخالف الدين الاسلامي و يبقى اسمها حرية شخصية


الله يقطع الحرية على الشخصية لو دي نتيجتها


هل توافق على الإعتراف بالمثليين ؟


شمس الزناتي اساسا مش معترف بالمثليين يبقى هوافق على اعتراف المجتمع بيهم


هل لديك أصدقاء من المثليين ؟


صداقة بمعني الصداقة لا طبعا محصلتش الفرصة


بس اتكلمت مع بعض منهم


هل تعتقد بوجود إضطهاد للمسيحين فى مصر ؟


لا طبعا اطلاقا


انت بتصدق الاشاعات اللي المغرضين بيطلعوها


من هو الشخص الذى تختارة لرئاسة مصر ؟


اختار من الاسماء الاتية


طلعت السادات - عمرو موسى - كمال الجنزوري


أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟


طلعت السادات - عمرو موسى - كمال الجنزوري - مهدي عاكف - خيرت الشاطر -المشير طنطاوي - فاروق الباز - البابا شنودة - عمرو خالد - احمد زويل -


هل توافق على مشاركة كل من : الإخوان المسلمين - الأقباط فى الحكم ؟


اه طبعا مسموح لكل الفئات في المشاركة


فى رأيك الشخصى .. ما هى أفضل مدونة على بلوجر قمت بزيارتها ؟


كل اللي همررلهم التاجات دي زي العسل و في كتير بس اكيد انا عندي زهيمر


و في اكتر بس اكيد محصليش الشرف ازورهم


للذكور فقط : أيهما تفضل كزوجة .. إمراءه عاملة ، أم ربة منزل ؟


انا مع المرأة العاملة فلبا و قالبا


بس انا هتجوز ربة منزل


اذا تزوجت وأنجبت ولدين وبنتين .. أى الأسماء تحب أن تسمى ؟


تعرف اني لغاية دلوقتي مفكرتش في الموضوع دة


بس لما اوصل لنتيجة هتصل بيك اقلك


او هعدل البوست


هل تعتقد أن توريث الحكم فى مصر . . سيتم فعلا أم لا ؟


طبعا سيتم


احنا بنعمل اللي علينا بس الحكومة هتعمل اللي هي عايزاه


فى رأيك الشخصى : ماهو أفضل إنجاز لحكومة مبارك ؟


انجاز واحد يا راجل قول انجازات


و هي ضرب جميع الارقام القياسية


من اول معدلات الفقر لحد معدلات الظلم و الجهل


وما هو أسوأ عمل قامت به ؟


كتيييييييييييييييييييييييييير اوي


بس اللي حازز في نفسي لغاية دلوقتي


السكوت على الطائرة المصرية اللي سقطت على حدود القارة الامريكية و كانت تضم 36 ضابط مصري


و كفاية عشان كل ما افتكر الموضوع دة اتعكنن


ثم لمن تمرر هذا التاج ؟


خد عندك بقى يخدوا التاج دة و اللي قبله




اتكلم

طرقعات فجائية

Nidalpal
احمد سعيد - نيجر
هشام - بر مصر

32 comments:

يورو said...

ااجاباتك حلوه اوى يا شمس
بجد بحيك عليها
خفيفه وليها معنى

بس انت عايز الريس ينزل يعيش يوم وسطينا
الريس من كتر مشغولياته اصلا نسى الاماكن دى
اكيد مش هيبقى فاضى

تحياتى

محمد مارو said...

شمس
بخصوص الموضوع الاول
عجبنى اوى
بس انت نسيت تتكلم عن الناس اللى مليهاش لا راى و لا مبدا

الناس اللى معاهم معاهم عليهم عليهم

الناس اللى لما يكون فى موضوع معين يكونوا مع اصخحاب الموضوع و لما يكون فى هجوم ع صاحب الموضوع يرجعوا و يغيروا رائيهم و يقولوا ده غلط بالرغم انهم كانوا موافقين عليه

دول اللى انا بجد لا بحترمهم و لا بحب اكلمهم
دول اللى بجد المفروض تكتب فيهم بوست

لان كل واحد لازم يكون له راى
و موقف
الا اللهم لو رائيه اكتشف انه غلط
هنا اه ممكن يضصلحه

لكن ع طول الخط بيقول و يرجع يصلح حسب الرايجه و حسب الهيصه
هذا لا احبه و لا احترمه

Ahmed Al-Sabbagh said...

صديقى العزيز شمس

طبعا انت عارف انى كان نفسى أقول كلامك ده بخصوص خناقات المدونين وان الموضوع ده غايظنى

وانت عبرت بطريقة اجمل ما كنت اتخيل
وانا بالمناسبة السعيدة دى .. اقترح على كل مدون انه يشيل سلاح وهو داخل مدونتة

اما بالنسبة للتاجات
انت اجاباتك قوية
هو بصراحة فى أسئلة كتير ما كنش ينفع طريقة غير ساخرة للاجابة عليها
لكن كان فى اسئلة اتمنى اسمع اجابتها بجدية

بس انا لاحظت حاجة مؤسفة .. وصادمة ليا فى نفس الوقت

هى

أن اجاباتك حكومية بعض الشئ

بمعنى ان معظم الاشخاص اللى ذكرت فى اجاباتك على التاجات

هى اشخاص موجودين او كانو موجودين فى الحياة السياسية

وانا كنت متوقع انك هتختار حكومة ظل جديدة تماما

وعموما انا هعمل بوست فى شهر مارس

يتضمن مناقشة لكل اجاباتك الناس اللى ردو على التاج ونحلل الاجابات دى ونشوف الناس بقت بتفكر ازاى عن الحياة فى مصر

تقبل خالص تحياتى

أخوك
أحمد

mo'men mohamed said...

طب ازاى بقى مع المرأة العاملة
و تتجوز ربة منزل؟؟

انا اختار عمرو موسى

جزاكم الله كل خير
السلام عليكم

Anonymous said...

يا شمس يا منورة غيمى اية الجمال دة اجبات تنم عن تقافة عظيمة وبعدين بتمرر لى التاج طب هوة انا قد التاج ياشمس انا غلبانة عموما شكرا ليك

دنـيـا محيراني(ايناس لطفي said...

ازيج يا شمس بالنسبه للموضوع الاول انا اتخنقت بجد من الموضوع ده حاجه سخيفه فعلا كاني خلاص كل حاجه اتحلت و لم يبقي غير خناقات المدونينين حاجه سخيفه جدا الاول كنت اتكلم و اقول راي بصراحه لاقتني بتاخد في الرجلين فقررت لم ادخل اي مدونه ةوالاقي اي موضوع زي كده اخد بعضي و امشي مش ناقصه وجع دماغ وكلام فارغ و شتيمه و كلام غير مهذب يتقال و طلعت بنتيجه حلوه اوي ان بالفعل الاي بيهتم بكده يبقي فاضي و مش لاقي حاجه يكتب عنها
بالنسبه بقي لاجابتك رائعه بتقول انك شخص مميز جدا بس امسك هنا ازي مع المراه العامله و عايز تتجوز ربة بيت ده نفاق الرجال المتمدنين و لا ايه عايز افهم النقطه ديه لو سمحت
علي فكره انا علقت في مدونتك اتعلم واتنور و سئلت كام سؤال اتمني ان تفيدني
تحياتي

بنوته مصرية said...

طبعا كلامك صح ومية مية

وانا برضة بقولهم العبو مع بعض ومتتخنقوش

بنسبة للتاج بصراحه الاجابات تحفة وردك فيها عجبني


ودائما في تقدم
ودمت لنا

رودي

ابن رشد said...

يورو

اكيد الريس ينزل هو عيب يعني و لا حرام
و لا هو فوق البشر

ابن رشد said...

محمد مارو
مارو الناس دي اكيد غلطانة و تستاهل ضرب الجزمة
بس يا ترى عندك الشجاعة تقول على اسمائهم

ابن رشد said...

الصبااااااااااااااااغ

انا مش بعرف اشيل الا المسدس بتاعي دة اولا
بس بالنسبة للتاجات انا مش اجاباتي حكومية و لا حاجة بس دول اللي قدامنا هو انا هروح اجيب من بيتنا

ابن رشد said...

mo'men mohamed
بص يا سيدي انا بكل منطقي مع المرأة العاملة
اما بالنسبة لية انا رجل احتاج في منزلي الي امرأة غير عاملة لاني احتاج الي وقت كبير من الرعاية

ابن رشد said...

منال لطفي
استاذتنا
دة انتي ابو الثقافة كلها دة كلام بردة هنستني اجاباتك

ابن رشد said...

دنيا محيراني
انا الحمد لله تمام
انتي عاملة اية
اديكي قلتي حاجة شخيفة جدا
بس اديني بنحاول نعالج المشكلة

المسكة دي بقى اللي مسكتيها لسة مجاوب عليها
بصي فوق شوية

ابن رشد said...

بنوته مصرية

اه و النبي يا بنوته دول اطفال و عايزين اللي يداديهم

و مرسي على اعجابك بالردود

walaa said...

اولا فى الموضوع الاول عندك حق انا شفت كتييير فى المدونات منه بس هو مش عيب اللى احنا نتختلف فى اراى واختلاف الراى وارد جدا بس العيب اللى احنا نقعد نشتم بعض عندك حق
ثانيا مبروك التاجين وعجبتنى قوى منك سؤالك للريس بس انت بتكلم مين لواحد عايش لنفسه وفقط
تحياتى ولاء

Empress appy said...

يااااااااااااا ياااااااااا راجل قول كلام غير ده طيب ههههههههههه
بص يا شموس انا لما كتبت زيك كده متكلمتش عن المدونين بس انا اتكلمت كمان عن كل الناس اللى بقابلهم فى حياتى سواء مدونين او غير
وعموما جامد يا شمس عامل زى خالتى اطاطا هههههههههه
اجابتك جامده وان شاء الله معايا فى سجن مارينا قريب هههههههههههههه

Anonymous said...

.................. بسم الله الرحمن الرحيم .............................

الاخوة الاعزاء الافاضل

..................... تحذير ...............

مدونتى سرقت واحذركم من استخدامها فيما يغضب الله او يسئ الى

ارجو الانتباة

http://elbayomy.maktoobblog.com

برجاء مساعدتى فانا لا اعرف كيف اتصرف سوى تحذيركم فقط

........ حسبى الله ونعم الوكيل ................

اخوكم

حسن توفيق

احمد الجيزاوى said...

ماشى يا عم النائب خلاص انا كدة هنتخبك لانى انا بصراحه عوز اخرب المجلس دة وانت خير من يقوم بذلك
وانا جوبت على التاج دة عندى خلاص يعنى بقيت زميل معاك فى نفس المجلس
تحيانى يا زمل المجلس الشعب ويا رب ميكنش حاجه تنيه
احمد الجيزاوى

ابن رشد said...

walaa
مرسي اوي لرايك و واضح اني كتبت الكلمتين دول في الوقت المناسب
ثم ان مكلمش الريس لية يعني هو انا مش قدة

ابن رشد said...

appy
حلو اوي سجن مارينا دة هنروحه بالمايوهات برضة
على العموم انا موافق

ابن رشد said...

حسن توفيق
علم يا باشا

ابن رشد said...

الجيزاوي
انا و انت في مجلس واحد لازم يخرب طبعا دون شك ما انت عارف

Desert cat said...

طيب ياباشا انا جاوبت على تاج الحصانة قبل كدا
انا هاخد التاج التانى وامرى لله
المهم المقدمة دى لذيذه وفعلا وفعلالالالالالا
يارب منكنش من الناس دى

بنت الاسلام said...

شمس الجزء الاول قبل التاجات مهم جدااا

واصبحت ظاهرة مخيفة

مانقدرش ننكر ان المدونين بشر خطائين

لكن اكيد كل انسان دخل عالم التدوين كان قدامه رسالة وهدف بيتمني يحققه ولو بكلمات بتعبر عن الي جواه والي حاسس بيه

كون ان الرسالة تتحول لسكة تانية مفزعة سكة القيل والقال فالافضل اننا نخرج نبحث عن مكان اخر لنشر الرسالة بين اناس تانيين اهدافهم اسمي وارقي

اما بخصوص التاجات فردودك رائعة بجد

وعجبني قوي رمز الكوز ده

يالا مين عالم

جايز يتحقق

ونندهلك بسيادة النائب بعد كدة

وان شاء الله امرر التاجيين

تحياتي

Anonymous said...

صراحة ياشمس
برنامجك اجدع برنامج و الراجل الذى تحاوره %
100%%
أن أرشحك منذ هذه اللحظة....أفكارك صحيحة و شجاعه جدا

هشام بر مصر said...

يالا ياشمس الشموس ورينا الهمة
احنا وراك
______________
بغض النظر عن الفكاهة ...لديك عقلية حقيقة متعمقة فى النظر للأمور ...وفقك الله ومتع مصر بك وأمثالك من الشباب النقى
تحياتى و تقديرى

ابن رشد said...

desert cat
اكيد كل واحد فينا يتمني يبقى مش من الناس دي
و هستني اجاباتك على التاني

ابن رشد said...

بنت الاسلام
كلامك صح تماما بس الامر لا يحتاج الي ان نهجر هذا العالم فلدينا فرصة دائما للاصلاح

ابن رشد said...

هشام بر مصر
كدة كسبنا صوت يا مسهل كدة هنزل الانتخابات قريب

ابن رشد said...

هشام بر مصر
تحياتي لكلامك الذي اصبح وسام على راسي

عصفور المدينة said...

انت جميل ورائع ياشمس
برضه اضم صوتي لصوت الصباغ ليه الناس تفكيرهم في رئيس من الموجودين

ابن رشد said...

عصفور المدينة
طب هنجيب ناس منين و احنا منعرفش