My Visitors If you cann't read arabic you can know how I think you can visit this link

October 29, 2007

نقول كمان و اللي مش فاهم يركز

يا جماعة انا هحكي تاني في موضوع الاقصر عشان اللي مش فاهم حجم القضية يركز معايا شوية
و محدش يفتكرني مغرور و عامل نفسي فاهم
بس انا و الله بخاف على البلد دي و بحبها
و عارف ان كل واحد بيقرا كلامي دلوقتي بيحبها جدا
بكل بساطة حضرتك لو قمت الصبح رسمت شخصية كارتونية و كتبت عليها ميكى ماوس
امريكا ترجع عليك بالتعويض
و انا لو قمت الصبح عشان انا مبرمج و عملت برنامج سميتة وندوز
مايكروسفت تبيعني هدومي
دلوقتي اسم الاقصر دة بتاعنا احنا
بتاع المصريين
لما امريكا تطلع و تعمل مدينة اسمها الاقصر لاس فيجاس
يبقى احنا لينا حق في هذه المدينة نتيجة استغلال الاسم
و المصيبة الاكبر لما الاقصر لاس فيجاس دي يبقى بيمارس فيها الدعارة و القمار
يبقى شبهه لكل غريب عن مصر ان الاقصر دي مدينة الفحشاء يعني سمعه تاريخية بايظة عننا
و لما نلاقي زاهي حواس راح وافق على انهم يستخدموا اسم الاقصر فعلا يبقى باع الاسم اللي هو بتاعنا اساسا
يعني احنا خسرنا ماديا و خسرنا تاريخيا و معنويا
اللي مفكر الموضوع تافه
نوارة كانت كاتبة بوست بخطاب مرسل من الدكتور أحمد يحيي محمد جمال الدين راشد
و دة يبقى رئيس قسم الهندسة المعمارية – جامعة المنصورة
بجواب مرسل من سيادته للدكتور نظيف رئيس الوزراء بيطالبه بحقنا راح فين
حقنا في حقوق الملكية الفكرية
اللنكات اهي
و على فكرة يا جماعة الدول المحترمة زي فرنسا رفضت رفضا قاطعا ان دبي تنشأ مدينة و تمثل فيها نسخة من متحف اللوفر
عشان الفرنسين ناس بيخافوا لى بلدهم و تاريخهم
الله اعلم بالمصريين
يعني يا جماعة الموضوع قصره ان احنا اتسرقنا من امريكا و غيراها و في الوقت الحالي بنوافق على السرقة و بنأيدها و سكوتنا هيأيدها اكتر
عشان كدة هصوت تاني و اقول يا جماعة ما نسكتش نطالب بحقنا
فية اقتراحات عديدة اولها
التقدم بشكاوي لمجلس الشعب و مجلس الوزراء
و انا بقترح نثير الموضوع اعلاميا اكتر عشان الشعب كله خارج الشبكة العنكوبوتيه او داخلها يعرف
و على العموم اهم القنوات الاعلامية اللي قدرت احصل عليها اهي
عشان لو حب حد يشارك في الحملة
ايميل الاستاذ خيرى رمضان
ايميل الاستاذ احمد رجب
ايميل الاستاذ مصطفى بكرى
ايميل الاستاذ بلال فضل
ايميل الاستاذ هانى شمس
العاشرة مساء
برنامج 90 دقيقة
جريدة اخبار اليوم
جريدة المصرى اليوم
الاستاذة هبه عمر
عمو حليم
على العموم يا جماعة انا عشان عارف ان المرحلة الجاية منيله
اللي هيبدأ بجد يبقى معانا و عارف ان احنا مصريين بجد و بنحب بلدنا
انا اقسمت القسم دة و هحطة على جنب حالا هيبقى قسم المدونة
اقسم بالله العظيم ان اكون مخلصا
لجمهورية مصر العربية
متمثله في كل مصري محب لوطنه يعيش على ارضها
، و ان ابذل جهدي لرفعتها و الدفاع عنها ضد كل عدو و كل غاصب في الداخل او الخارج
و الله على ما اقول شهيد
-----------------------------
تعديل بسيط
افادتنا الاستاذة الغالية بطة بكر
بايميل و تليفونات الاعلامي عمرو اديب
0127755555
8555338
يلا يا جماعة شغل بقى

14 comments:

محمد مارو said...

يا شمس
عارف و فهمك و الله
بس هتعمل ايه فى مجموعه خونه مسكين البلد
و اللى يغيظك عملين نفسهم بيفهوا
و انهم الصح و احنا اللى عندنا قصر نظر
تعليقى اللى فات ع البوست اللى قبل كده كان تهكم مكنش موافقه ع الامر
اقول لك ايه لنا الله

Unknown said...

اكيد يا شمس كلنا معاك ولازم نتحرك
ماينفعش نسكت لحد ما في يوم يبيعوا الشعب
ده تهريج و الحكايه زادت اوي لازم صوتنا يعلي

سارة said...

شمس

انا عايزة اتأكد من حاجة منك

هما اخدوا الاسم زى مابنوا اهرام وابو الهول كدة

ولا زاهى حواس باع الاسم فعلااا؟؟؟
ولو باعه
هل ده حقه يعنى ؟؟عالاقل قانونا

ابن رشد said...

محمد مارو
لنا الله
و مع جهود بعضنا يا مارو هنعمل حاجة

ابن رشد said...

EmY
الله عليكي يا ايمي هو دة اللي مستنية من كل الناس

ابو النجوم said...

ياعم شمس
يعنى هى جت على اسم ماكل حاجة فى البلد متباعة واللة لو لقو بيعة للبنى ادمين فى مصر هيبيعوهم .البلد اتباعت من ساعة ماشفنا عاطف عبيد وعاطف صدقى وعلاء مبارك وعز للحديد وكل العيون المفتحة لنا .ياريت تشوف تاريخ امريكا وانت تعرف انها مش غريبة عليهم .فى الاول سرقوا الهنود الحمر فى اراضيهم وبعدها سرقو الانجليز فى المدنية والحضارة .بلد قايمة على سرقة العالم مستكتر عليهم يسرقوا اسم الاقصر .ياخوفى ليكونوا سرقوا مصر واحنا مش واخدين بالنا .
عادل نجم

Anonymous said...

يا شمس

الخونه دول من زمااااااان

باعوا كل حاجه فى البلد

ولما كل حاجه فى البلد خلصت

راحوا يبيعوا الأسماء والتاريخ

مش بعيد نقوم الصبح

نلاقى نفسنا مصر اسمها حاجه تانيه

ربنا على كل ظالم

أخوك دائماً..أحمد سعيد

Coca said...

اكيد لازم نتحرك ونعمل حاجه وان شاء الله تيجي بفايده
الموضوع اكبر ما تصورته

جبهة التهييس الشعبية said...

انا نزلت اوبريت عواد عندي ع المدونة
هو موجود على منوعات سواري
ممكن تيجي تلطشه مني
وتنزله عندك

عايزين نعمل لعواد جرصة

ابن رشد said...

ابو النجوم
يسرقوا كل الناس يا بو النجوم الا المصريين دة احنا مش بنيب حقنا و لو بعد 7000 سنة

ابن رشد said...

أحمد سعيد
ربنا معانا
بس الله لا يغرير ما بقوم حتى يغيروا ما بانفسهم

ابن رشد said...

coca
ربنا يخليكي يارب
و ان شاء الله انتي معانا

ابن رشد said...

جبهة التهييس الشعبية
ماشي يا نوارة

ابن رشد said...

سارة
متهيئلي انا كدة وضحت