My Visitors If you cann't read arabic you can know how I think you can visit this link

August 20, 2008

البداية

شمس الزناتي : انا هروح بقى يا مدير
المدير : بدري كدة يا شمس
شمس الزناتي : مجلس الشورى بيولع هروح اصلي و ادعي على الشعب ، عادي بقى يا ريس افرجها
المدير : بكرة تعوض الشغل دة
شمس الزناتي : ماشي الكلام
المدير : سايب شغل من النهاردة
شمس الزناتي : اه
المدير : امشي يا شمس بسرعة عشان لو وقفت تاني هقلك اقعد ما تمشيش

------------------

و على القهوة

----------------


شمس الزناتي : اه يا شلة فقر اغيب اغيب و ارجع الاقي نفس المنظر الشاي و الشيشة

الاصحاب : شمس الزناتي اية الغيبة دي كلها

شمس : وحشتوني

صديق شمس : سمعت عن حريقة مجلس الشوري

شمس : سمعت

الصديق : بيقولوا وصلت لوزارة الصحة

شمس : و وصلت مبنى الضرايب العقارية كمان يا مسهل عقبال كل الوزرات اللي في بالي على العموم في وزارة في لاظوغلي قريبة يعني و الله نفسي ربنا يستجيب و يكرمها

الصديق : نفسك ترجع تكلم في السياسة

شمس : ما قلنا بطلناها ، انا خلاص من البيت للشغل و من الشغل للبيت


الصديق :تفتكر فعلا ماس كهربي


شمس : الراجل الكبير فاضي قال عود كبريت و يولع في البلد عملها قبله الملك فاروق


الصديق : بتكلم في السياسة تاني


شمس : من بكرة الناس كلها هتكلم


الصديق : هتكتب ؟؟؟؟؟


شمس : هههههههههههههههههههههههه


الصديق : ههههههههههههههههههه


شمس : ارحم شجاعتي اللي عمال تتهمها بالانهيار


الصديق : هتكتب ؟؟؟؟


شمس : انا هقوم امشي


الصديق : طب هات حساب الشاي


شمس : حاسب انت


الصديق : يبقى هترجع تكتب


شمس : لسة البلاد دي بلادي و الحريق كان البداية


الصديق : ابقى اكتب اللي قلتها دي عشان تتحبس


شمس : مش قلتلك اروح احسن


الصديق : انت عندك حق الحريق اللي في صدورنا اكبر


شمس : يبقى هكتب


----------------------------


اللي عايز اكتبه كلمتين الاولى مش عايز حد يزعل اني مش برد على التعليقات عشان كل بوست بيكون رد على تعليقات البوست اللي قبله


و التانية اني مع طلعت السادات و بأيده في انتخابات نقابة المحامين


و هعلق صوته من دلوقتي


و السلام ختام




عـــــــــــــــــــــــــاشت مصر

19 comments:

بنت الاسلام said...

وهو لسة اي ماتحرقش في بلدنا ياشمس

هي ضياع امالنا واحلامنا مش حرايق

طيب دي و9 ساعات طفوها

انما اللي جوانا هيطفوها ازاي

وهي بتحرقنا لوحدنا

مش شايفينها

ربنا يصبرنا

ميرا ( وومن ) said...

شمس

مش عارفة متهيئلي عارفة مين الصديق دة
اصلي بفكر ابلغ عندكم علشان اختبار الشجاعة

ههههههههههههههههههه
نتكلم جد بقي

بالرغم من ان الحريق حاجة وحشة ويارب ماحد يشوفها يارب

الا ان الحريق بيفتح باب لآسئلة كتيرة وعلامات استفهام اكثر

الأمر الغريب ان الحدث دة محرج للحكومة جدا اللي بان مدي عجزها عن إدارة الأزمة واللي سمحت لإهمالها انه يدمر مبني تاريخي زي دة
ياتري التاريخ بيعيد نفسة ولا ايه
شكلها البداية فعلا

ابو النجوم said...

شمس
انا مع الاخت وومن فى ان التاريخ بيعيد نفسه ومثل ماكان حريق القاهره فى فيراير 52 من الاسباب التى عجلت بثوره يوليو فالظاهر ان الحريق ده هيكون اشاره للثوره القادمه. بس بجد مع ان كان نفسى المنطقه كلها تولع لحد لاظوغلى وانت عارف انا اقصد ايه لكن الواحد كان زعلان لان ده ملكنا مش ملك صفوت ولا عز ده ملك مصر وثروه مصر

Anonymous said...

السلام عليكم و رحمة الله و بركاتة

اولا ... شكرا علي الدعوة

ثانيا ... في رأيي الشخصي , انه ولا هيحصل اي حاجة ... لان ببساطة الجميع يتفرج ولا احد يريد ان يسوق الاحداث ...

و حتي لو مصر كلها ولعت ... ولا هيحصل حاجة

حتي لو مصر اسرائيل دخلتها بكرة تاني يوم ... لا هنقدر نحارب ولا تعمل اي شئ علي الاطلاق

عادي , لان الشعب بقي عبارة عن اشباح مش ناس حقيقية

بنت القسام said...

اممممممم
احنا في نص الطريق
ولا بدايه ولا نهايه
تحياتى
جيلان

Rania Lelah said...

كل سنه و انت طيب يا شمس
فينك طالت غيبتك قوووى
تحياتى
و رمضان كريم

ابن رشد said...

بنت الاسلام
الحريقة اللي جوانا محتاجة الحب هو اللي يطفيها يا بطوط دة اللي مفروض ندور علية

ابن رشد said...

وومن
هتبلغي عننا طب ابقى بلغيني الاول هتبلغي امتى

فعلا التاريخ بيعيد نفسه و المشكلة لا تحصل ثورة

ابن رشد said...

ابو النجوم
و الله يا ابو النجوم انا ش عندي اي ثقة في الشعب دة انه ممكن يقوم بثورة

ابن رشد said...

شمس الدين
اليأس مش للدرجة دي
صحيح احنا واقعين و منكسرين بس مش قوي قوي كدة
لس في امل

ابن رشد said...

جيلان
افهم اية انا كدة

ابن رشد said...

اي حد
انا بحييك على تحليلك و هسيبه زي ما هو و الناس هي اللي هتناقشك فية

ابن رشد said...

رانيا
و انتي طيبة يا اجمل بنوته
و ان شاء الله ارجع قريب
ادعيلي

Beram ElMasry said...

ان كنت ممن يتذوقون الشعر العامى والزجل ، ارجو زيارة مدونتى والتفضل بالتعليق

Anonymous said...

يدعوكم اتحاد المدونين المصريين الى مساندة ودعم زميلنا العزيز

الاستاذ

خالد الصاوى

صاحب مدونة

منارة العرب

فى محنته المرضية التى يمر بها ..

لمزيد من التفاصيل برجاء زيارة مدونة الاتحاد

منال لطفى said...

انت فين يا ابنى عيب عليك
اظهر وبان عليك الامان عموما انا رجعت من الاجازة كل سنة وانت طيب واية اللى حصل بقى لما روحت تتفرج على المجلسي؟؟

كلام على بلاطة said...

;كل عام وانت بخير

canary said...

هى وزراة اللى تقصدها فى لاظوغلى ولا مبنى معين بيتنفخ فيه الناس؟؟
معلش حدد قصدك
وبعدين والله العظيم ولو كانت ولعت كلها ما كانت هتفرق ابدااااا
هى اصلا مش بلدنا
وكان العشم فى النار اكبر من كدة
انها تشد حيلها شويه وتمشى فى كام اتجاة اخر وتعمل مصلحه وخدمه لينا بس للأسف
معلش خيرها فى غيرها
تحياتى على البوست الجميل
وتقبل مرورى

م/ الحسيني لزومي said...

شارك في الحملة الشعبية للقيد بالجداول الانتخابية بوضع بنر الحملة علي مدونتك.
البنر موجود علي مدونتي